မိဘနှင့်နေထိုင်ရန်၊ မိဘအနီးအပါး နေထိုင်ရန် တိုက်ခန်းဝယ်ယူသူများအတွက် ထောက်ပံ့ကြေးများ စင်္ကာပူအစိုးရ တိုးမြှင့်

စင်္ကာပူတွင် အစိုးရက မိသားစုများအတွင်း သက်ကြီးရွယ်အိုစောင့်ရှောက်မှုအား ပိုမိုအားပေးရန်အလို့ငှာ မိဘများနှင့်နေထိုင်ကြစေရန် သို့မဟုတ်
မိဘများ၏အနီးအနား နေထိုင်ကြစေရန်အတွက် ခွင့်ပြုထားသော
ထောက်ပံ့ကြေးအစီအစဉ်တစ်ရပ်အား ဖြည့်စွက်တိုးမြှင့်လိုက်ပြီဖြစ်သည်။

မိဘ၊ မိသားစုများနှင့် နေထိုင်ရန် သို့မဟုတ် မိဘများ၊ သားသမီးများနှင့်
နေထိုင်ရန် တိုက်ခန်း (ထပ်ဆင့်ရောင်းချသော HDB တိုက်ခန်း) ၀ယ်ယူသော
လူလွတ်များနှင့် မိဘများအနီးအပါးရှိ တိုက်ခန်း (ထပ်ဆင့်ရောင်းချသော HDB
တိုက်ခန်း) အား ၀ယ်သူသော မိသားစုများအတွက် ထောက်ပံ့ကြေးပေးသော
"မိဘအနီးအပါးအိမ်ရာထောက်ပံ့ကြေး (PHG)" တစ်ရပ်ကို စင်္ကာပူ၌ ၂၀၁၅ ခုနှစ် သြဂုတ်လကတည်းက စတင်ကျင့်သုံးလာခဲ့ပြီးဖြစ်သည်။

HDB တိုက်ခန်းဆိုသည်မှာ အိမ်ရာနှင့် ဖွံ့ဖြိုးရေးဘုတ်အဖွဲ့ Housing and
Development Board (HDB) ၏ စီမံမှုအောက် ၉၉ နှစ်အတွက်သာ
ယာယီအငှားချသော စင်္ကာပူပြည်သူ့အိမ်ရာများမှ တိုက်ခန်းများ ဖြစ်သည်။

ဘဏ္ဍာရေးဝန်ကြီး ဟန်ဆွီကိက ၂၀၁၈ ခုနှစ် အသုံးစရိတ်မိန့်ခွန်းကို တနင်္လာနေ့ (ဖေဖော်ဝါရီ ၁၉) တွင် ပြောကြားခဲ့သည်။ ယင်းမိန့်ခွန်းအတွင်း ၀န်ကြီးက ၂၀၁၅ ခုနှစ် သြဂုတ်လတွင် ထုတ်ပြန်ခဲ့သည့် "မိဘအနီးအပါးအိမ်ရာထောက်ပံ့ကြေး (PHG)" အား ဖြည့်စွက်တိုးမြှင့်လိုက်ပြီ ဖြစ်ကြောင်းနှင့် ဖြည့်စွက်တိုးမြှင့်မှုအသေးစိတ်ကို ကြေညာခဲ့သည်။

၎င်း PHG အသစ်အရ လူလွတ်များအတွက် ဖြည့်စွက်မှုအဖြစ် လူလွတ်များသည် မိဘများအနီးရှိ ထပ်ဆင့်ရောင်းချသော တိုက်ခန်းတစ်ခန်းကို ၀ယ်ယူပါက
တစ်ဦးလျှင် ထောက်ပံ့ကြေး ဒေါ်လာ ၁ သောင်း ရရှိတော့မည်ဖြစ်သည်။
မိဘများနှင့်အတူနေထိုင်ရန် ထပ်ဆင့်ရောင်းချသော တိုက်ခန်းအား ၀ယ်ယူသူ
လူလွတ်များကမူ ဒေါ်လာ ၁ သောင်းခွဲသို့ တိုးမြှင့်ရရှိတော့မည် ဖြစ်သည်။

မိသားစုများအနေဖြင့် ဖြည့်စွက်မှုအရ မိဘများ သို့မဟုတ် သားသမီးများနှင့်
နေထိုင်ရန် ထပ်ဆင့်ရောင်းချသောတိုက်ခန်းအား ၀ယ်ယူပါက ထောက်ပံ့ကြေး
ဒေါ်လာ ၃ သောင်း ရရှိမည်ဖြစ်ပြီး မိဘများအနီးအပါး နေထိုင်ရန် ထပ်ဆင့်ရောင်းချသော တိုက်ခန်းအား ၀ယ်ယူသော မိသားစုများအတွက်မူ ယခင်အတိုင်း ထောက်ပံ့ကြေး ဒေါ်လာ ၂ သောင်း သတ်မှတ်ထားဆဲ ဖြစ်ကြောင်း
သိရသည်။

ခင်အေးချမ်း မှ iMyanmarHouse.com (အိုင်မြန်မာဟောက်စ်ဒေါ့ကွန်း) အတွက် အထူးဘာသာပြန် ရေးသားဖော်ပြသည်။
Credit: iMyanmarHouse.com