ပြည်ပ အိမ်ခြံမြေ သတင်း | Posted by ဇာနည်ကျော်
Spider-Man ရုပ်ရှင်ဇာတ်လမ်းတွဲများ၊ Avengers ဇာတ်လမ်းတွဲများတွင် ပါဝင်သရုပ်ဆောင်ခဲ့သူ Jacob Batalon သည် ၎င်းနှင့် စေ့စပ်ကြောင်းလမ်းထားသော ဒီဇိုင်နာမိန်းကလေး ဗရော်နီကာ လီဟော့ဗ် (Veronica Leahov ) နှင့်အတူ နယူးယောက်မြို့၊ ဘရွတ်ကလင်းခရိုင်၊ Greenpoint အရပ်တွင် မကြာသေးမီက အိမ်လိုက်ရှာနေသည်ကို တွေ့ခဲ့ရကြောင်း နယူးယောက်ပို့စ်သတင်းဌာနက ဖော်ပြသည်။
၎င်းတို့စုံတွဲသည် ထိုဒေသမှ ဒေါ်လာ ၂ ဒသမ ၄၅ သန်းတန် penthouse ခန်းကို ကြည့်သွားသည်ဟု ဆိုသည်။
Penthouse ခန်းသည် ဗိသုကာပညာရှင် Morris Adjmi ဒီဇိုင်းရေးဆွဲဆောက်လုပ်သော The Huron အမည်ရှိ ကမ်းခြေတာဝါကြီးတွင် တည်ရှိသည်။
“သူက ဘရွတ်ကလင်းမှာပဲ နေတာပါ။ အခုက ကမ်းစပ်ကို ပြောင်းဖို့ စိတ်ဝင်စားနေပါတယ်” ဟု ၎င်း၏ မိတ်ဆွေတစ်ဦးက ပြောသည်။
Batalon သည် Spider-Man ရုပ်ရှင်ထဲတွင် Peter Parker (အဓိကဇာတ်ဆောင်) ၏ အရင်းနှီးဆုံး သူငယ်ချင်းအဖြစ် သရုပ်ဆောင်ခဲ့မှုဖြင့် လူသိများသည်။
(အခန်းဖွင့် ခင်းကျင်းထားပြီး ကြီးမားသော ပြတင်းပေါက်ကြီးများ ပါဝင်သည်။ ဓာတ်ပုံ-Redundant Pixel)
(လင်းလင်းချင်းချင်းရှိသော ပင်မအိပ်ခန်း။ ဓာတ်ပုံ-Redundant Pixel)
(Jacob Batalon နှင့် ဗရော်နီကာ လီဟော့ဗ်တို့စုံတွဲက penthouse ခန်းကို လာရောက်ကြည့်ရှုသွားသည်။ Getty Images for Paramount Pictures)
အိပ်ခန်း ၂ ခန်းနှင့် ရေချိုးခန်း ၂ ခန်းပါဝင်ပြီး ၉၆ စတုရန်းပေ ကျယ်ဝန်းသော လသာဆောင်တစ်ခု ရှိသည်။
ဒီဇိုင်းလက်ရာများအနေဖြင့် မြင့်မားသော မျက်နှာကြက်များ၊ ဝက်သစ်ချသား ကြမ်းခင်းများ၊ အရှေ့မြစ်နှင့် မန်ဟက်တန်၏ ကောင်းကင်မြင်ကွင်းကို စီးမိုးတွေ့မြင်နိုင်သော ကြမ်းပြင်မှ မျက်နှာကြက်ထိ မြင်မားသော ပြတင်းကြီးများ ပါဝင်သည်။
အဝင်ခန်းမမှ ဝင်လိုက်ပြီးနောက် ဧည့်ခန်းနှင့် မီးဖိုဆောင်တို့သို့ ပေါက်သည်။
ပင်မအိပ်ခန်းတွင် walk-in closet နှင့် ရေချိုးခန်းတို့ ပါဝင်သည်။
ထိုအဆောက်အအုံတွင် စတုရန်းပေ ၃၀၀၀၀ ခန့်ကျယ်ဝန်းသော Amenities များ ထည့်သွင်းပေးထားရာ အလျား ပေ ၅၀ ရှိ ဆားရေကူးကန်၊ အားကစားလေ့ကျင့်ခန်းမ၊ မှန်များ ကာရံထားသော အကစတူဒီယို၊ အရက်ဘားများနှင့် Sauna တို့ အပါအဝင် ဖြစ်သည်။
(အဆောက်အအုံတွင်း မြင်ကွင်း။ ဓာတ်ပုံ-Redundant Pixel)
(အဆောက်အအုံတွင် နေထိုင်သူများ အသုံးပြုနိုင်သော ကျယ်ပြောသည့် နားနေဆောင်။ ဓာတ်ပုံ-Donna Dotan)
(နေထိုင်သူများ မျှဝေအသုံးပြုနိုင်သည့် အားကစားလေ့ကျင့်ခန်းမ။ ဓာတ်ပုံ-Donna Dotan)
အရောင်းဈေးကွက်တင်ပေးသည်မှာ Serhant အိမ်ခြံမြေကုမ္ပဏီမှ အကျိုးဆောင်များဖြစ်သော Kayla Lee နှင့် Lancelot Watson-Taffe တို့ ဖြစ်သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: ‘Spider-Man’ star seen touring trendy $2.45M Brooklyn penthouse with panoramic Manhattan views
Photo Credit-Donna Dotan
