နယ်သာလန် ကမ္ဘာလှည့်ခရီးသည်များ မလေးရှားတွင် လည်ပတ်ရာ “စင်္ကာပူမှာပဲ မိုးမျှော်တိုက်ကြီးတွေ ရှိတယ်ထင်ခဲ့တာ” ဟု တအံ့တသြပြောခဲ့မှုအပေါ် မလေးရှားလူမှုကွန်ရက်သုံးစွဲသူတို့က အမျိုးမျိုးအဖုံဖုံ မှတ်ချက်ပေးလျက်ရှိ

နယ်သာလန်မှ ကမ္ဘာလှည့်ခရီးသည်အုပ်စုတစ်ခု မလေးရှားနိုင်ငံသို့ ရောက်ရှိလည်ပတ်ခဲ့ကြရာတွင် မလေးရှား၏ ခေတ်မီဖွံ့ဖြိုးမှုအပေါ် အလွန်အံ့အားသင့်ခဲ့ကြပြီး မိုးမျှော်တိုက်ကြီးများဟူသည်မှာ စင်္ကာပူတွင်သာ တွေ့နိုင်သည့်အရာမျိုးဖြစ်သည်ဟု မှတ်ထင်ခဲ့မိကြောင်း ဖွင့်ဟပြောကြားကြသည်။

နယ်သာလန် ကမ္ဘာလှည့်အုပ်စုသည် မလေးရှားသို့ ၃ ရက်တာ အလည်အပတ်ခရီး ရောက်ရှိနေခြင်း ဖြစ်သည်။

@janganstresskitatravel အမည်ရှိ TikTok အကောင့်က အဆိုပါ ကမ္ဘာလှည့်ခရီးသည်အုပ်စုကို လမ်းပေါ်တွင် တွေ့ဆုံမေးမြန်းခန်း ပြုလုပ်ခဲ့ရာ၌ နယ်သာလန်ကမ္ဘာလှည့်တို့က ၎င်းတို့၏ ထင်မြင်ချက်များကို ဖွင့်ဟပြောပြခဲ့ခြင်း ဖြစ်သည်။

“ဒီလို မိုးမျှော်တိုက်ကြီးတွေက စင်္ကာပူမှာပဲ တွေ့ရနိုင်တာလို့ ထင်ခဲ့တာ။ ဒါပေမယ့် မလေးရှားမှာလည်း ကျွန်တော်တို့ တွေ့ရတယ်။ ဒါက တော်တော် အံ့သြစရာကောင်းပါတယ်” ဟု နယ်သာလန်ခရီးသည်တစ်ဦးက ပြောသည်။

အခြားခရီးသည်တစ်ဦးက ပြောသည်မှာ မလေးရှား၏ ထိရောက်သော အများပြည်သူ သယ်ယူပို့ဆောင်ရေး စနစ်၊ သဘာဝအလှနှင့် ခမ်းနားသော ဗိသုကာတို့ ပေါင်းစည်းမှုအပေါ် အံ့အားသင့် အထင်ကြီးလေးစားမိ ကြောင်း၊ နယ်သာလန်နှင့် များစွာခြားနားကြောင်း ပြောသည်။

အခြေခံအဆောက်အအုံများသာမက မလေးရှားပြည်သူတို့မှာ နွေးထွေးဖော်ရွေ လှိုက်လှဲပျူငှာကြကြောင်း၊ မိမိတို့၏ ခရီးစဉ်တလျှောက် သက်သောင့်သက်သာဖြစ်မှုကို ခံစားရပါကြောင်း နယ်သာလန် ခရီးသွားအုပ်စုက ပြောသည်။

၎င်းတို့ အထင်ကြီးမိဆုံး အကြောင်းရပ်မှာ ယဉ်ကျေးမှု စုံလင်ခြင်း ဖြစ်ကြောင်း ပြောသည်။

“ဒီလိုမျိုး မတူညီတဲ့ ယဉ်ကျေးမှုတွေ ပေါင်းစည်းနေထိုင်ကြတာမျိုး အရင်က တခါမှ မတွေ့ခဲ့ဖူးပါဘူး” ဟု ခရီးသွားတစ်ဦးက ပြောသည်။

လူမှုကွန်ရက်တွင် ပျံ့နှံ့နေသော အဆိုပါဗွီဒီယိုဖိုင်နှင့် စပ်လျဉ်းပြီး မလေးရှားလူမှုကွန်ရက် သုံးစွဲသူတို့က အမျိုးမျိုးအဖုံဖုံ မှတ်ချက်ပေးကြသည်။

“မလေးရှားက ဘယ်လောက်အံ့သြစရာကောင်းတယ်ဆိုတာ ဒီအနောက်တိုင်းသားက အခုမှသိတယ်။” ဟု Razali_esa@62 အမည်ရှိ အကောင့်က မှတ်ချက်ပြုသည်။

“သူတို့ရဲ့ အသိပညာဗဟုသုတက ငါတို့ထက်တောင် တော်တော်နိမ့်နေတယ်။ ကမ္ဘာ့အမြင့်ဆုံး အမြွှာမျှော်စင် ကိုတောင် မသိဘူးလား” ဟု adam6898 အကောင့်က မေးခွန်းထုတ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: “Thought only S’pore had skyscrapers!” — Dutch tourists amazed, M’sians react with sarcasm