အိန္ဒိယတွင် ဟိမဝန္တာတောင်တန်းကြီးပေါ်မှ သိဝဘုရားကျောင်းတော်ရှိရာသို့ မိုင် ၂၀၀၀ ကျော် လမ်းလျှောက်ကာ ဘုရားဖူးသွားခဲ့သော အသက် ၇၀ အရွယ် အဘိုးတစ်ဦးအကြောင်း

အိန္ဒိယနိုင်ငံ၊ ကာနာတာကာပြည်နယ်၊ ကာလာဘူရာဂီ (Kalaburagi) ခရိုင်တွင် နေထိုင်သော အသက် ၇၀ အရွယ် အဘိုးတစ်ဦးသည် မိုင်ထောင်ချီ ခြေလျင်ခရီးရှည်ကြီးတစ်ခုကို အောင်မြင်စွာ သွားရောက်နိုင်ခဲ့သည်။

၎င်းသည် မိုင်ထောင်ချီ ဝေးကွာသော ဥတ္တရခန်ပြည်နယ်အတွင်း တည်ရှိသော ဟိမဝန္တာတောင်တန်းကြီးပေါ်ရှိ သိဝနတ်ကွန်းရှိရာသို့ လမ်းလျှောက်သွားခဲ့ခြင်း ဖြစ်သည်။

ဟိမဝန္တာမှ ဘုရားကျောင်းအထိ ၂ လနီးပါး ခြေလျင်ခရီးသွားခဲ့ရသည်။

X လူမှုကွန်ရက်တွင် ပျံ့နှံ့ဂယက်ရိုက်နေသော ဗွီဒီယိုဖိုင်တစ်ခုထဲ၌ ထိုအဘိုးက ပြောကြားထားသည်မှာ ဤခြေလျင်ခရီးကို ကာနာတာကာပြည်နယ် ကာလာဘူရာဂီမြို့မှ မတ်လ ၃ ရက်နေ့တွင် စတင်ခဲ့ခြင်း ဖြစ်ကြောင်း၊ အခြားသော ဘုရားဖူး အုပ်စုတစ်ခုနှင့်အတူ ခရီးထွက်ခဲ့ခြင်းဖြစ်ပြီး ဟိမဝန္တာတောင်ပေါ်မှ Ketarnath နတ်ကွန်းရှိရာသို့ မေလ ၁ ရက်တွင် ရောက်ရှိခဲ့ကြောင်း ၎င်းက ပြောသည်။

(▲ ဟိမဝန္တာမှ ဘုရားကျောင်းသို့ ရောက်ရှိရန် ၂ လခန့် ကြာမြင့်ခဲ့သည်။ ဓာတ်ပုံ-X)

၎င်းတို့ အုပ်စုသည် လွင်ပြင်များ၊ တောအုပ်ကြီးများ၊ တောင်တန်းများကို ဖြတ်သန်းကာ ၂ လကျော် ခြေလျင်ခရီးထွက်ခဲ့ပြီး မိုင်ပေါင်း ၂၂၀၀ သွားရောက်ခဲ့ခြင်း ဖြစ်သည်။

ဟိန္ဒူဘာသာဝင်တို့၏ ချားဒမ် (မြင့်မြတ်သော ၄ နေရာ) အနက် တစ်ခုအပါအဝင်ဖြစ်သော ဥတ္တရခန်ပြည်နယ်မှ ဘုရားကျောင်းရှိရာသို့ ရောက်ရှိခဲ့ပြီးနောက် အောင်ပွဲခံ ခဲ့ကြသည်။

ဗွီဒီယိုဖိုင်တစ်ခုထဲတွင် ထိုအဘိုးနှင့်သူ၏ မိတ်ဆွေများ အောင်ပွဲခံနေပုံကို တွေ့ရသည်။ ယင်းမှာ ၎င်းတို့၏ စူးနစ်သော ကျားကုတ်ကျားခဲ ဇွဲကြီးမှုကို ပြသနိုင်သည့် အောင်ပွဲလည်း ဖြစ်သည်။

ထိုအဘိုးက ပြောသည်မှာ ဘုရားသခင်၏ ကောင်းချီးပေးခံရသူတစ်ဦးအနေဖြင့် ယခုကဲ့သို့ ခရီးမျိုး အထမြောက်အောင်မြင်နိုင်ကြောင်း ပြောသည်။

ထို့အပြင် မိမိ၏ စိတ်ဇွဲကြောင့်လည်း အထမြောက်ခဲ့ခြင်းဖြစ်ကြောင်း ၎င်းက ပြောသည်။

မေလ ၁၅ ရက်တွင် X လူမှုကွန်ရက်တွင် တင်ခဲ့သော ဗွီဒီယိုဖိုင်မှာ လက်ရှိအချိန်အထိ ကြည့်ရှုမှု အကြိမ်ရေ ၂၀၀၀၀၀ ကျော် ရှိနေပြီ ဖြစ်သည်။

အဆိုပါ ဗွီဒီယိုဖိုင်မှာ ကြည့်ရှုရသူတို့၏ စိတ်နှလုံးကို လှုပ်ခတ်စေလျက်ရှိပြီး ၎င်းတို့၏ ဘာသာရေးကိုင်းရှိုင်းမှု၊ သက်လုံကောင်းမှုနှင့် ဇွဲကြီးမှုတို့ကို အများက ချီးကျူးလျက် ရှိကြသည်။

လူမှုကွန်ရက်သုံးစွဲသူတစ်ဦးက မှတ်ချက်ပြုသည်မှာ “အရှင်သီဝမှာ မယိမ်းမယိုင် တကယ်ယုံကြည် ကိုင်းရှိုင်းတဲ့စိတ်ကြောင့် ဒီလိုမျိုး အောင်မြင်ခဲ့တာ ဖြစ်ပါတယ်။ ဟားရ် ဟားရ် မဟာဒေ့ဗ်။ (ကြီးမြတ်သော အရှင်သီဝ) ”ဟု မှတ်ချက်ပြုသည်။

အခြားတစ်ဦးက မှတ်ချက်ပြုသည်မှာ “သူတို့အားလုံးဟာ သေလွန်ပြီးတဲ့နောက် နိဗ္ဗာန်ဘုံကို ရောက်ရှိကြမှာ အသေအချာပါပဲ”ဟု ဆိုသည်။

“ဘာသာရေးကို မမှိတ်မသုန် ကိုင်းရှိုင်းတဲ့စိတ်ဓာတ်ကို ဦးညွှတ်ပါတယ်။ ဒီသက်ကြီးရွယ်အို အဘိုးတွေဟာ ကာနာတာကာပြည်နယ်ကနေ ဟိမဝန္တာက နတ်ကွန်းအထိ ရက်ပေါင်း ၆၀ လမ်းလျှောက်ခဲ့ကြတာ ဖြစ်ပါတယ်။ တကယ့်ကို ယုံကြည်သက်ဝင်မှု ပြင်းထန်တဲ့ အားထုတ်မှုပါပဲ”ဟု များစွာသော သူတို့က ၎င်းတို့၏ လေးစားမှုကို မှတ်ချက်ပြုကြသည်။

“တကယ့်ကို ပြိုင်ဘက်ကင်းတဲ့ ဘာသာရေးကိုင်းရှိုင်းမှုပါပဲ”ဟု အခြားတစ်ဦးက X လူမှုကွန်ရက်တွင် မှတ်ချက်ပြုသည်။

အဆိုပါ ဘုရားကျောင်းသည် ပင်လယ်ရေ မျက်နှာပြင်အထက် အမြင့်ပေ ၁၁၇၀၀ တွင် တည်ရှိပြီး နှင်းဖုံး တောင်ထွက်များ ဝန်းပတ်ထားကာ အံ့မခန်းရှုမျှော်ခင်းများ တည်ရှိသော နေရာဖြစ်သည်။

နှစ်စဉ် ရာနှင့်ချီသော ဘုရားဖူးများ၊ ခြေလျင်ခရီးသွားများ လာရောက်လေ့ရှိသော နေရာတစ်ခုလည်း ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: This Karnataka Man Walked For 60 Days To Kedarnath And Internet Can’t Get Enough