ဘီလ်ဂိတ်က သမီးဖြစ်သူ မြင်းစီးလေ့ကျင့်ရန်အတွက် ဖလော်ရီဒါမှ မြေဈေးကောင်းသောနေရာတွင် ၁၈ ဧက ဖြန့်ကျက်တည်ရှိသော တစ်လမ်းလုံးကို ပေါက်ဈေးထက် ၂ ဆ၊ ၃ ဆပေးကာ ဝယ်ပေးခဲ့ပုံ

ဘီလ်ဂိတ်နှင့် ဇနီးဖြစ်သူ မီလင်ဒါ ဖရန့်ချ်ဂိတ်တို့သည် ၂၀၁၁ ခုနှစ်အတွင်းက အမေရိကန်ပြည်၊ ဖလော်ရီဒါပြည်နယ်၊ ဝယ်လင်တန်မြို့ရှိ အိမ်တစ်လုံးကို ဒေါ်လာ သန်းဝက်ခန့်ပေးကာ ၄ လတာ ငှားခဲ့ဖူးသည်။

ထိုစဉ်က ဆယ်ကျော်သက်အရွယ်သာရှိသေးသော သမီးဖြစ်သူ ဂျနီဖာဂိတ်က အမေရိက၏ ထိပ်တန်း မြင်းစီးအားကစားသမားဖြစ်လာရန် လေ့ကျင့်နေချိန်ဖြစ်သောကြောင့် မြင်းစီးကွင်းများနှင့် ပြိုင်ပွဲနေရာနှင့် နီးစပ်သော အဆိုပါနေရာ၌ အိမ်ငှားပေးခဲ့ခြင်း ဖြစ်သည်။

ယင်းနောက် ဘီလ်ဂိတ်သည် ထိုဒေသရှိ အိမ်များကို တစ်လုံးပြီးတစ်လုံး ဝယ်ယူလာခဲ့ရာ ၂၀၁၆ ခုနှစ်တွင်ကား မြင်းလုပ်ငန်းကျေးရွာဟု လူသိများသော တစ်လမ်းလုံးကို ဝယ်ယူနိုင်ခဲ့ကာ ထိုလမ်းမှာ သူ၏ ကိုယ်ပိုင်လမ်း ဖြစ်လာခဲ့သည်။

ဘီလ်ဂိတ်သည် ၂၀၁၃ ခုနှစ်တွင် မြင်းမွေးမြူရေးခြံတစ်ခုကို ဒေါ်လာ ၈ ဒသမ ၇ သန်းဖြင့် စတင်ဝယ်ယူခဲ့ခြင်းဖြစ်သည်။

ယင်းနောက်ပိုင်း တစ်ခြံပြီးတစ်ခြံ ဆက်တိုက်ဝယ်ယူခဲ့ရာ ဝယ်လင်တန်မြို့မှ ကမ္ဘာကျော် မြင်းစီးအားကစား ရပ်ဝန်းဖြစ်သော Mallet Hill Court ဝန်းကျင်ရှိ မြေ ၁၈ ဧကခန့်ကို စုစုပေါင်း ကန်ဒေါ်လာ ၃၈ သန်း သုံးစွဲကာ ဝယ်ယူခဲ့ခြင်း ဖြစ်သည်။

၎င်းဝယ်ယူခဲ့သည်များတွင် အသစ်စက်စက် စံအိမ်တစ်လုံး၊ မြင်းဇောင်း ၂၀၊ မြေကွက်လွတ်များ၊ နေအိမ်များစွာ အပါအဝင် ဖြစ်သည်။

ဘီလ်ဂိတ်က ကပ်လျက်ခြံများကို မရရအောင် ဝယ်ယူပိုင်ဆိုင်နိုင်ရေးအတွက် ရာဖြတ်ပေါက်ဈေးထက် ၂ ဆမှ ၃ ဆခန့်အထိ ပေးကာ ဝယ်ယူခဲ့ခြင်း ဖြစ်သည်။

ထိုဒေသတစ်ခုလုံးကို ဝယ်ယူလိုက်ခြင်းအားဖြင့် မြင်းစီးအားကစားလေ့ကျင့်လိုသော သမီးငယ်အတွက် လမ်းပိတ်ခြင်းအပြင် ဘေးဝန်းကျင်အိမ်များက privacy အတွက် စိုးရိမ်လာကြမည့်အရေးကို ဖြေရှင်းပြီးသားလည်း ဖြစ်စေသည်။

ခြံရောင်းလိုက်သူတစ်ဦးက ပြောပြသည်မှာ ယခုလမ်းမှာ သီးသန့်ဝန်းကျင်တစ်ခုဖြစ်သည့်တိုင် အလွန်လူရှုပ်သည်ဟု ဆိုသည်။

ထို့ကြောင့် တစ်လမ်းလုံးဝယ်လိုက်ခြင်းအားဖြင့် ဘီလ်ဂိတ်က ထိုပြဿနာကို ဖြေရှင်းလိုက်ခြင်းလည်း ဖြစ်သည်။

မီလင်ဒါဂိတ်က ပြောသည်မှာ ကလေးများကို ရိုးရိုးကုပ်ကုပ် ခြိုးခြံချွေတာမှုဖြင့်သာ ပျိုးထောင်ခဲ့ကြောင်း၊ အသုံးစရိတ်များကို အတိုင်းအတာဖြင့်သာပေးခဲ့ကြောင်း၊ အိမ်မှုဝေယျာဝစ္စများလည်း လုပ်ဆောင်စေခဲ့ကြောင်း၊ ကိုယ်ပိုင်ဂျက်လေယာဉ်ကြီးများဖြင့် ကြီးပြင်းစေခဲ့ခြင်း မရှိကြောင်း ပြောသည်။

သို့တိုင် ယခုကဲ့သို့ တစ်လမ်းလုံး ဝယ်ယူလိုက်ခြင်းကို မဆိုထားနှင့် မြင်းစီးခုန်အားကစား လိုက်စားရေးသည်ပင် ကုန်ကျစရိတ်မြင့်မားလှသည်။

အမြင့်ခုန်နိုင်သော အကောင်းစားမြင်းမျိုးစိတ်တို့၏ ဈေးနှုန်းမှာ ဒေါ်လာသန်းချီသည်။ ယင်းအပြင် ထရိန်နာများ၊ တိရ စ္ဆာန်ဆေးကုဆရာဝန်များ၊ မြင်းများ ပြုစုစောင့်ရှောက်စရိတ်များမှာ လစဉ်အမြဲကုန်ကျနေမည် ဖြစ်သည်။

ကမ္ဘာ့အဆင့်ပြိုင်ပွဲကြီးဖြစ်သော ဝယ်လင်တန်တွင် ကျင်းပသည့် ဆောင်းရာသီမြင်းပွဲတော်ကျင်းပရာနေရာနှင့် နီးကပ်စွာတည်ရှိသောကြောင့် ထိုဒေသမှာ အိမ်ခြံမြေ ဈေးမြင့်သည်။

ယခု ဝယ်ယူမှုကိုကြည့်ကာ သမီးအတွက် ငွေအလုံးအရင်းသုံးစွဲခဲ့သည်ဟုဆိုနိုင်သော်လည်း ကန်ဒေါ်လာ ၁၃၀ ဘီလီယံအထက်ကြွယ်ဝသော ဘီလ်ဂိတ်အတွက် ရေပုံးကြီးထဲမှ ရေတစ်စက်ခန့် ဖိတ်ကျသွားသလောက်သာ ရှိသည်။

ဥပမာ- ဒေါ်လာ ၁ သန်း ချမ်းသာသူတစ်ဦးက ဒေါ်လာ ၃၀၀ တန် ပစ္စည်းတစ်ခု ဝယ်လိုက်ခြင်းနှင့် တူညီသည်။

((သမီးအတွက် ဘီလ်ဂိတ် ဝယ်ယူခဲ့သော ခြံများ))

■ ၂၀၁၃ ခုနှစ်၊ ၄ ဒသမ ၅ ဧကကျယ်သော ခြံ ၊ ဒေါ်လာ ၈ ဒသမ ၇ သန်း ■ ကပ်လျက်တွင် တည်ရှိသော ၄ ဒသမ ၅ ဧကကျယ်သောခြံကို ၂၀၁၆ တွင် ဒေါ်လာ ၁၃ ဒသမ ၅ သန်းဖြင့် ဝယ်ယူ ■ မြေကွက်လွတ် ၂ ခုကို ဒေါ်လာ ၅ သန်းနီးပါးဖြင့် ဝယ်ယူခဲ့ ■ စပါးကျီများ ပါဝင်သော ၅ ဒသမ ၂ ဧက ခြံကို ဒေါ်လာ ၈ ဒသမ ၇ သန်းဖြင့် ဝယ်ယူ ■ နောက်ဆုံးအားဖြင့် ၁ ဒသမ ၃ ဧကရှိ မြေကွက်ကို ဒေါ်လာ ၂ ဒသမ ၅ သန်းဖြင့် ဝယ်ယူခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Bill Gates Paid $38 Million To Buy An Entire Street In Palm Beach For Daughter's Equestrian Hobby — 'Gobbled Up Properties Like Pac-Man'