တရုတ်ပြည်၊ ရှန်ဟိုင်းမြို့တွင် မြေအောက်ဘူတာရုံ၊ ဈေးဝယ်စင်တာနှင့် မြေအောက်ဟိုတယ်များ ဆောက်လုပ်ရန်အတွက် တန်ချိန် ၇၅၀၀ ကျော်ရှိသော အဆောက်အအုံကြီးကို စက်ရုပ်ပေါင်း ၄၃၂ ခုဖြင့် နေရာရွှေ့ပြောင်း

တရုတ်ပြည် ရှန်ဟိုင်းမြို့ကြီးတွင် တန်ချိန် ၇၃၈၂ ( မက်ထရစ်တန်ချိန် ၇၅၀၀)၊ စတုရန်းပေ ၁၃၂၂၂ ( ၄၀၃၀ စတုရန်းမီတာ) ရှိသော အဆောက်အအုံ ကွန်ပလက်စ်ကြီးတစ်ခုကို စက်ရုပ်ငယ်များ အလုံးအရင်းသုံးကာ တစ်ရက်လျှင် ၁၀ မီတာနှုန်း နေရာရွှေ့ပြောင်းလျက်ရှိသည်။

ရှိကူးမန်း ဗိသုကာဟန် အဆောက်အအုံကွန်ပလက်စ်ကြီး တည်ရှိသောနေရာတွင် မြေအောက်၌ ၃ ထပ် ဖွဲ့စည်းဆောက်လုပ်ရေးများ လုပ်ဆောင်နိုင်ရန်အတွက် ယခုကဲ့သို့ နေရာရွှေ့ပြောင်းနေခြင်း ဖြစ်သည်။

မြေအောက်စီမံကိန်းတွင် ဈေးဝယ်စင်တာနှင့် ယဉ်ကျေးမှုဆိုင်ရာနေရာ စတုရန်းပေ ၁၇၃၈၈၅ ( ၅၃၀၀၀ စတုရန်းမီတာ)၊ ကားအစင်း ၁၀၀ ကျော် ထားရှိနိုင်မည့် မြေအောက် ကားပါကင်နှင့် မြေအောက် ရထားလိုင်းများဖြစ်သော Metro Line 2, 12 နှင့် 13 တို့အတွက် မြေအောက်ဘူတာရုံတို့ ပါဝင်မည် ဖြစ်သည်။

နေရာရွှေ့ပြောင်းနေသည့် အဆောက်အအုံကြီးကို ဝှါယန်လီ ကွန်ပလက်စ် (Huayanli) ဟုခေါ်ပြီး ၁၉၂၀ မှ ၁၉၃၀ ပြည့်လွန်ကာလများအကြား ဆောက်လုပ်ခဲ့ခြင်းဖြစ်သည်။ ဝှါယန်လီ ကွန်ပလက်စ်ကို အနောက်တိုင်းနှင့် တရုတ်ဗိသုကာဟန်များဖြင့် ပေါင်းစပ် ဆောက်လုပ်ထားသည်။

((လမ်းလျှောက်စက်ရုပ် ၄၃၂ ခု))

ယခုအဆောက်အအုံမှာ ၁၉၂၈ ခုနှစ်က ဆောက်လုပ်ခဲ့ခြင်းဖြစ်ပြီး ၁၉၄၀ ပြည့်လွန်ကာလများအတွင်း မျိုးချစ်ပညာရေးအတွက် ညကျောင်းတစ်ခုကို ဖွင့်လှစ်ခဲ့ဖူးကြောင်း ရှန်ဟိုင်းမြို့ ဒေသအုပ်ချုပ်ရေးအဖွဲ့၏ သတင်းထုတ်ပြန်ချက်တွင် ဖော်ပြသည်။

ယခုကဲ့သို့ နေရာရွှေ့ပြောင်းမှုမှာ ယာယီဖြစ်ပြီး မြေအောက်ဆောက်လုပ်ရေးလုပ်ငန်းများ ပြီးစီးပါက အဆောက်အအုံကြီးကို မူလနေရာသို့ ပြန်လည်ရွှေ့ပြောင်းမည် ဖြစ်သည်။

ရှန်ဟိုင်းမြို့အုပ်ချုပ်ရေးအဖွဲ့၏ official လူမှုကွန်ရက်စာမျက်နှာတွင် ဖော်ပြချက်အရ လမ်းလျှောက် စက်ရုပ်ငယ်ပေါင်း ၄၃၂ ခုဖြင့် ဆောင်ရွက်ခဲ့သည့် မယုံနိုင်ဖွယ် civil engineering အောင်ပွဲတစ်ရပ်ဖြစ်ကြောင်း ဖော်ပြသည်။

စက်ရုပ်ငယ်များသည် အဆောက်အအုံကို ဖြေးညင်းစွာ မ,တင်ပေးပြီးနောက် ရှေ့သို့ ဖြေးညင်းစွာ တွားသွားရွေ့လျားသည်။

အရွယ်အစား၊ အလေးချိန်နှင့် ရှုပ်ထွေးမှုအရ ယခုစီမံကိန်းမှာ တရုတ်ပြည်၏ အကြီးမားဆုံးသော နေရာရွှေ့ပြောင်းမှု စီမံကိန်းလည်း ဖြစ်သည်။

အဆောက်အအုံတည်ရှိရာ ရှန်ဟိုင်းမြို့၊ ကျန်းယွမ်အရပ်မှာ လမ်းကျဉ်းလေးများ၊ ခေတ်ဟောင်း အဆောက်အအုံများ ပြည့်နှက်နေပြီး ကျဉ်းကျဉ်းကြုပ်ကြုပ်ရှိသောကြောင်း သမားရိုးကျ ဆောက်လုပ်ရေး လုပ်ငန်းသုံး ကိရိယာများ အသုံးပြု၍ မရနိုင်ချေ။

ထိုသို့သော စိန်ခေါ်မှုများကြောင့် ယခုစီမံကိန်းတွင် ဖောင်ဒေးရှင်းလုပ်ငန်းများအတွက် ကျဉ်းကျပ်သော နေရာများတွင် သွားလာလုပ်ဆောင်နိုင်သော မြေတူး စက်ရုပ်များ၊ လက်တံများ ပါသည့် မြေသယ် စက်ရုပ်များ အသုံးပြုကာ လုပ်ဆောင်လျက်ရှိသည်။

မြေသယ်စက်ရုပ်များမှာ ၁ ဒသမ ၂ မီတာ (၃ ဒသမ ၉ ပေ) ခန့်သာ ကျယ်ဝန်းသည့်နေရာများတွင် သွားလာလုပ်ဆောင်နိုင်မှုရှိသည်။

သမားရိုးကျ ဆောက်လုပ်ရေးလုပ်ငန်းတွင် မြေတူးလုပ်ငန်းများကို မြေတူးစက်ကြီးများဖြင့်လည်းကောင်း၊ မြေသယ်လုပ်ငန်းကို မြေသယ်ကားများဖြင့်လည်းကောင်း လုပ်ဆောင်မည်ဖြစ်သော်လည်း ယခုစီမံကိန်းမှာ မြေအောက် စီမံကိန်းဖြစ်သဖြင့် လုပ်ဆောင်ရသည့် နေရာကျဉ်းမြောင်းမှုကြောင့် စက်ရုပ်များ အသုံးပြုရခြင်း ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: 432 robots move 7,500-ton building in Chinese city to make way for new construction