ပြည်ပ အိမ်ခြံမြေ သတင်း | Posted by အေးမြတ်သူ
ဗြိတိန်တွင် မန်ချက်စတာမြို့၏အရှေ့ဘက် Peak ခရိုင်ရှိ စားသောက်ဆိုင်တစ်ခုသည် ဆိုင်တွင် လာရောက် စားသောက်သော အများလေးစားခံရသည့် မိသားစုအပေါ် ငွေမရှင်းဘဲ ထွက်သွားသည်ဟု မှားယွင်းစွပ်စွဲခဲ့သောကြောင့် အဆိုပါမိသားစုအား ဒေါ်လာ ၁၀၀,၀၀၀ လျော်ကြေးပေးလိုက်ရသည်။
ပြီးခဲ့သော ၂၀၂၄ ခုနှစ် ဇူလိုင်လအတွင်း သန်းကြွယ်သူဌေးမိသားစုဖြစ်သော Peter McGirr နှင့် Ann McGirr ၊ ၎င်းတို့၏ သားသမီးများဖြစ်သော Peter Jr နှင့် Carol တို့သည် Peak ခရိုင်တွင် တည်ရှိသော The Horse & Jockey Inn အမည်ရှိ စားသောက်ဆိုင်တစ်ခုသို့ ဝင်ရောက် စားသောက်ခဲ့ကြသည်။
Peter တို့မိသားစုသည် အရိုးလွတ် အမဲနံရိုးသား ၂၇ ပေါင်ဖိုး၊ ၁၅ ဒသမ ၂၅ ပေါင် တန်ကြေးရှိ ဒါဘီရှိုင်းယား ဝက်ပေါင်ခြောက် ၂ ခုအပြင် ဘီယာခွက်ရေ အများအပြား မှာယူစားသောက်ခဲ့ကြသည်။
ထိုဆိုင်တွင် စားသောက်ပြီးနောက် Peter တို့ မိသားစုသည် အိုင်ယာလန်မြောက်ပိုင်း၊ Omagh မြို့ရှိ နေအိမ်သို့ ပြန်ခဲ့ကြသည်။
Peter တို့ မိသားစု ဆိုင်မှထွက်သွားပြီး မကြာမီတွင် The Horse & Jockey ၏ Facebook စာမျက်နှာတွင် Peter တို့ မိသားစုသည် ကျသင့်ငွေ ဒေါ်လာ ၂၀၀ ( ပေါင် ၁၅၀) မရှင်းဘဲ ဆိုင်ထဲမှ ထွက်သွားသည်ဟုဆိုကာ CCTV မှတ်တမ်း ဗွီဒီယိုဖိုင်ကို တင်ခဲ့သည်။
Peter တို့မိသားစုမှာ စားသောက်ပြီး ငွေမရှင်းဘဲထွက်သွားသည်ဟုဆိုကာ ဗြိတိန်တဝန်း ဟိုးဟိုးကြော်ခဲ့ရာ ၎င်းတို့မိသားစု၏ ဂုဏ်သတင်းကို အကြီးအကျယ် ထိခိုက်စေခဲ့သည်။ ထို့ကြောင့် Peter တို့ မိသားစုက မိမိတို့ နာမည်မှ အမည်းစက်များ ပယ်ပျောက်စေရန်အတွက် ထိုစားသောက်ဆိုင်ကို တရားစွဲရန်မှတပါး ရွေးချယ်စရာ မရှိတော့ချေ။
(Peter တို့ မိသားစု စားသောက်နေပုံကို The Horse & Jockey စားသောက်ဆိုင်က လူမှုကွန်ရက်တွင် ဗွီဒီယိုဖိုင် တင်ခဲ့သည်။ ဓာတ်ပုံ-Facebook/ The Horse & Jockey)
(Peter တို့ မိသားစု စားသောက်ပြီး ပြန်သွားကြပုံ။ ဓာတ်ပုံ- The Horse & Jockey)
(The Peak ခရိုင်တွင် ဖွင့်လှစ်ထားသော The Horse & Jockey စားသောက်ဆိုင်။ ဓာတ်ပုံ-Google Maps)
သို့သော် မကြာမီတွင်ပင် ၎င်းတို့၏ စွပ်စွဲချက်မှာ မှားယွင်းနေကြောင်း ပေါ်ပေါက်လာပြီး Peter တို့ မိသားစုက တရားစွဲခဲ့ခြင်း ဖြစ်သည်။
Peter တို့ မိသားစုက ကျသင့်ငွေကို ကတ်ဖြင့် အပြည့်အဝ ပေးချေခဲ့သည်။
သို့သော် ဝန်ထမ်းက စာရင်းသွင်းရန် မေ့နေခဲ့ခြင်းဖြစ်ကြောင်း၊ ဝန်ထမ်းမှာ အတွေ့အကြုံ နည်းပါးသူဖြစ်ကြောင်း စားသောက်ဆိုင်က ထုတ်ပြန်ကာ Peter တို့ မိသားစုကို တောင်းပန်ခဲ့သည်။
Peter တို့ မိသားစုက စားသောက်ဆိုင်အား တရားစွဲခဲ့သည်။
Peter တို့ မိသားစုသည် အိုင်ယာလန်မြောက်ပိုင်း Tyrone ခရိုင်ရှိ အချမ်းသာဆုံးပုဂ္ဂိုလ်များတွင် ပါဝင်သူဖြစ်ပြီး နိုင်ငံတကာအထိ ကျော်ကြားသော McGirr Engineering ကုမ္ပဏီကို တည်ထောင်ထားသူ ဖြစ်သည်။
McGirr Engineering သည် ဆောက်လုပ်ရေးလုပ်ငန်းများတွင် အသုံးပြုသော ဘလောက်တုံးထုတ်သည့် စက်များ ထုတ်လုပ်သည့်ကုမ္ပဏီ ဖြစ်သည်။
စားသောက်ဆိုင်ပိုင်ရှင် ဂျွန် ဝပ်ဆန်သည် အိုင်ယာလန်မြောက်ပိုင်း ဘဲလ်ဖတ်မြို့အထိ သွားကာ Peter အား မိမိဆိုင်တွင် အခမဲ့လာရောက် စားသောက်တည်းခိုပါရန်နှင့် အမှုပိတ်သိမ်းပေးရန် တောင်းဆိုခဲ့သော်လည်း Peter က လက်မခံခဲ့ချေ။
တရားရုံးတွင် တရားစွဲဆိုထားသောအမှုအတွက် ဆိုင်ရှင်ဘက်က Peter တို့ မိသားစုကို လျော်ကြေး ဒေါ်လာ ၁၀၀၀၀၀ ပေးကာ တရားရုံးပြင်ပ ညှိနှိုင်းလိုက်ပြီး အမှုပိတ်သိမ်းလိုက်ကြောင်း သိရသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Family wrongly accused of pub dine & dash and awarded £75,000 ‘are MILLIONAIRES who rejected pleas to drop lawsuit’ Photo Credit- The Horse & Jockey, Google Maps
