အိန္ဒိယတွင် နေအိမ်ဧည့်ခန်းမှ ရူပီး ၂ သိန်းတန်ကြေးရှိ Smart TV ပေါ်၌ နားနေသော ခြင်တစ်ကောင်ကို ကြက်တောင်ရိုက် ဘတ်တံဖြင့် ရိုက်ရာ ခြင်မည်သို့ရှိသည်မသိရသော်လည်း တန်ဖိုးကြီး ရုပ်သံစက် ဆုံးရှုံးခဲ့ရပုံ

အိန္ဒိယတွင် ရယ်စရာ၏ နောက်ကွယ်၌ ရင်မောစရာများ ပါလာသော ရယ်စရာမောစရာ သတင်းတစ်ရပ် လူမှုကွန်ရက်တွင် ပျံ့နှံ့လာသည်။

များစွာ အန္တရာယ်မကြီးလှဟု ယူဆရသော ခြင်ကြောင့် ရူပီးသိန်းနှင့်ချီ၍ တန်ကြေးရှိသော high-end Smart TV တစ်လုံး ပျက်စီးမှု ဖြစ်ပွားခဲ့ခြင်း ဖြစ်သည်။

အဆိုပါသတင်းကို အိန္ဒိယနိုင်ငံ ဥတာ ပရာဒက်ရှ်ပြည်နယ်၊ Noida မြို့အခြေစိုက် News18 သတင်းဌာနက ဖော်ပြခဲ့ခြင်းဖြစ်ပြီး CNN က ကျောထောက်နောက်ခံပေးထားသော သတင်းဌာနဖြစ်သည်။

မည်သည့်မြို့တွင် ဖြစ်ပွားခဲ့ခြင်းဖြစ်သည်ကိုမူ ဖော်ပြထားခြင်း မရှိချေ။

(အမျိုးသားတစ်ဦးသည် ကြက်တောင်ရိုက်ဘတ်တံဖြင့် ခြင်ရိုက်ခဲ့ရာ သူ၏ high-end smart TV ဆုံးရှုံးခဲ့ရသည်။ ဓာတ်ပုံ-Instagram/ @bhala_studios)

လူရွယ်အမျိုးသားတစ်ဦး၏ နေအိမ်ဧည့်ခန်းတွင် ဖြစ်ပွားခဲ့ခြင်းဖြစ်သည်။

ထိုနေ့က သူ၏ သားငယ်မှာ ကာတွန်းရုပ်ရှင်များ အေးအေးလူလူ ထိုင်ကြည့်နေခဲ့သည်။

ကလေးငယ်မှာ ကာတွန်းကားထဲတွင် အာရုံနစ်မြောနေစဉ် အခန်းထဲသို့ ခြင်တစ်ကောင် တဝီဝီဖြင့် ဝင်လာပြီး ရုပ်မြင်သံကြားစက်ပေါ်တွင် နားလိုက်သည်။

ကလေးငယ်၏ ဖခင်မှာ ခြင်တစ်ကောင်ဝင်လာသောကြောင့် စိတ်အနှောင့်အယှက်ဖြစ်သွားသည်။

နေအိမ်တွင် ခြင်ဆေးခွေ၊ ခြင်ဖြန်းဆေး၊ ခြင်ရိုက်ဘတ်တံ အစရှိသည့် ခြင်နှိမ်နင်းရေးပစ္စည်းလည်း မရှိချေ။

ထို့ကြောင့် ဖခင်ဖြစ်သူက ကြက်တောင်ရိုက် ဘတ်တံကို ယူပြီး ခြင်ရိုက်လိုက်ရာ ခြင်မှာ သေသည် ၊ ရှင်သည် မရှိရသော်လည်း တန်ဖိုးကြီး ရုပ်သံစက်မှာမူ အသံမထွက်နိုင်ရှာတော့ချေ။

ကြက်တောင်ရိုက်တံမှာ ရုပ်မြင်သံကြားစက်၏ မျက်နှာပြင်ကို ရိုက်မိပြီး ပြန်လည်ပြုပြင်၍ မရလောက်အောင် ကွဲကြေပျက်စီးသွားခဲ့သည်။

ခြင်ကြောင့် သာမန်စိတ်အနှောင့်အယှက်ဖြစ်ရမှုကို ဖြေရှင်းလိုက်ပုံမှာ ထိခိုက်ဆုံးရှုံးရမှု ကြီးမားသွားခဲ့သည်။

“သားက ကျွန်တော့်ကို လှမ်းကြည့်နေရင်း….ပါပါး…ဘယ်လိုလုပ်လိုက်တာလဲ…လို့ ပြောပါတယ် ” ဟု ဖခင်ဖြစ်သူ လူငယ်က ပြောပြသည်။

တန်ဖိုးကြီး ရုပ်မြင်သံကြားစက် ပျက်စီးသွားမှုအပေါ် ဇနီးဖြစ်သူက ပြောသည်မှာ “နောက်တစ်ခါကျရင် TV မဝယ်ခင် ခြင်ဖြန်းဆေး အရင်ဝယ်ရမယ်” ဟု ဆိုသည်။

ထိုဖြစ်ရပ်မှာ ၎င်းတို့မိသားစုလေးအတွက် ရယ်စရာမောစရာ ကိစ္စတစ်ခုဖြစ်ခဲ့သော်လည်း စိတ်လိုက်မာန်ပါ လုပ်တတ်မှုနှင့် ပတ်သက်ပြီး သင်ခန်းစာတစ်ခုလည်း ဖြစ်ခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Wanted To Kill Mosquito, Killed His Rs 2 Lakh Smart TV Instead Photo Credit- Instagram/ @bhala_studios