ပြည်ပ အိမ်ခြံမြေ သတင်း | Posted by အေးမြတ်သူ
သာမန်လူတို့မှာ ပစ္စည်းတစ်ခု မှာယူပါက delivery ပို့ဆောင်သူက အိမ်ရှေ့တွင်အထိသာ ပို့ပေးမည်ဖြစ်ပြီး အထပ်မြင့်တွင်နေသူဆိုလျှင် အောက်သို့ ဆင်းယူရသည်။
ကမ္ဘာ့အချမ်းသာဆုံးပုဂ္ဂိုလ်များတွင် ပါဝင်သူ ဂျက်ဘေးဇော့စ် (Jeff Bezos) ကမူ ၎င်းမှာယူသော ပစ္စည်းများကို မိမိအခန်းရှိရာသို့ သယ်ယူရန် မြို့လယ်လမ်းပိုင်းတစ်ခုလုံးကိုပင် ပိတ်ထားနိုင်ပုံမှာ ဓန၏ တာသွားပုံကို ပြသလိုက်သည့် next-level version တစ်ခုလည်း ဖြစ်သည်။
TikTok လူမှုကွန်ရက်တွင် ပျံ့နှံ့နေသော ဗွီဒီယိုဖိုင်တစ်ခုအရ ဂျက်ဘေးဇော့စ်၏ penthouse ခန်းသို့ ပစ္စည်းများ တင်ဆောင်ရန်အတွက် နယူးယောက်မြို့လယ် ပဉ္စမရိပ်သာလမ်းပိုင်းတစ်ခုလုံး ပိတ်ထားခဲ့ပုံကို တွေ့ရသည်။
မန်ဟက်တန်အရပ် ပဉ္စမရိပ်သာလမ်းနှင့် ၂၆ လမ်းထောင့်တွင် ဝန်ချီစက်ကြီးတစ်ခုတွင် ထုပ်ပိုးထားသော ပရိဘောဂကြီးတစ်ခုကို ကြိုးတစ်ချောင်းဖြင့် တွဲလောင်းဆွဲကာ အထပ်မြင့်ရှိရာသို့ ဖြေးဖြေးချင်း တင်ဆောင်နေပုံကို တွေ့ရသည်။
ထိုလမ်းတစ်လျှောက်လုံးတွင် သတိပေး ကြိုးတန်းများ၊ အတားအဆီးတုံးများချထားကာ စက်ယန္တယားကြီးများ၊ ကုမ္ပဏီထရပ်ကားများဖြင့် အလုပ်လုပ်နေပုံကို တွေ့ရသည်။
(▲ ဂျက်ဘေးဇော့စ်က နယူးယောက်မြို့လယ်မှ သူ၏ penthouse ခန်းရှိရာသို့ ကရိန်းဖြင့် ပရိဘောဂ ပစ္စည်းများ တင်ရန်အတွက် ပဉ္စမရိပ်သာလမ်း၏ လမ်းပိုင်းတစ်ခုလုံးကို ပိတ်ထားခဲ့သည်။ ဓာတ်ပုံ-William C Lopez/New York Post)
အလုပ်သမားများစွာ အုတ်အုတ်သဲသဲဖြင့် ယာဉ်ကြောလမ်းလွှဲပေးနေကြသည်။
ပဉ္စမရိပ်သာလမ်း၊ အမှတ် ၂၁၂ မှ ၂၄ ထပ်တိုက်ကြီး၏ ထိပ်ဆုံးထပ်ဆီသို့ ကရိန်းဖြင့် ပရိဘောဂပစ္စည်းများ တင်နေပုံကို ဖြတ်သွားဖြတ်လာများက ဝိုင်းဝန်းကြည့်ရှုခဲ့ကြသည်။ ဂျက်ဘေးဇော့စ်သည် ထိုအဆောက်အအုံကြီး၏ ထိပ်ဆုံး ၄ လွှာရှိ အခန်း ၅ ခန်းကို ပိုင်ဆိုင်ထားပြီး တန်ကြေးအားဖြင့် ကန်ဒေါ်လာ ၁၁၉ သန်းရှိသည်။
ဂျက်ဘေးဇော့စ်၏ အခန်းသို့ ပရိဘောဂများတင်နေပုံကို ဗွီဒီယိုရိုက်ကူးခဲ့သူမှာ Thompson Ferrier အမည်ရှိ luxury ဖယောင်းတိုင်ကုမ္ပဏီ ပိုင်ရှင် ဖြစ်သူ Raffi Arslanian ဖြစ်သည်။
“ဂျက်ဘေးဇော့စ်က သူ့အိမ်က ပရိဘောဂတွေ ဘယ်လိုသယ်လဲဆိုတာ ခင်ဗျားတို့ ကြည့်ချင်ကြလား။ ကျွန်တော်ပြမယ်” ဟု Arslanian က ပြောသည်။
၎င်း၏ ရုံးခန်းမှာ ဂျက်ဘေးဇော့စ်၏ penthouse ခန်းနှင့် တစ်ဘလောက်ခန့်သာ ဝေးကွာသည်။
မိမိတို့အနေဖြင့် ပရိဘောဂများသယ်လျှင် ကိုယ်တိုင်သယ်လျှင်သယ် ၊ သို့မဟုတ်က အိမ်ပြောင်းရွှေ့ကုမ္ပဏီထံ ချိတ်ဆက်ကာ သယ်ယူကြမည်ဖြစ်ကြောင်း၊ သို့သော် လမ်းကိုမူ ပိတ်လိုက်၍ မရကြောင်း Arslanian က ပြောသည်။
သူ၏ ဗွီဒီယိုမှာ လူမှုကွန်ရက်တွင် ကြည့်ရှုမှုအကြိမ်ရေ ၉၇၀၀၀၀ ကျော်ရှိနေပြီး မှတ်ချက်ပြုမှု ထောင်နှင့်ချီကာ ရှိနေသည်။
အချို့ကမူ ကရိန်းဖြင့် သယ်သည့်ပစ္စည်းမှာ မည်သို့သောပစ္စည်းဖြစ်နိုင်ကြောင်း အမျိုးမျိုးအဖုံဖုံ မှန်းဆထင်ကြေးပေး မှတ်ချက်ပြုကြသည်။
(▲ ဂျက်ဘေးဇော့စ်သည် အပေါ်ဆုံး ၄ ထပ်ကို ပိုင်ဆိုင်ထားသည်။ ဓာတ်ပုံ-William C Lopez/New York Post)
(▲ ဂျက်ဘေးဇော့စ်၏ penthouse ခန်းရှိရာ အဆောက်အအုံအပြင်ဘက်တွင် ကရိန်းကြီးကို တွေ့ရပုံ။ ဓာတ်ပုံ-Newsflare)
“အဲဒါ ရေပူစိမ်ကန်တစ်ခုပါ” ဟု လူမှုကွန်ရက်သုံးစွဲသူတစ်ဦးက မှတ်ချက်ပြုပြီး အခြားတစ်ဦးကမူ Grand Piano တစ်လုံးဖြစ်ကြောင်း မှတ်ချက်ပေးသည်။
အချို့ကမူ ထိုသို့ လမ်းပိတ်ကာ ကရိန်းဖြင့် ပစ္စည်းများ တင်ဆောင်မှုအတွက် မည်မျှကုန်ကျခဲ့သည်ကို စိတ်ဝင်စားနေကြသည်။
(▲ ဂျက်ဘေးဇော့စ်က ယခုအဆောက်အအုံကြီးတွင် အခန်း ၅ ခန်း ပိုင်ဆိုင်ထားသည်။ ဓာတ်ပုံ-Dave Benett/ amfAR/Getty Images for amfAR)
ကရိန်းဖြင့် ပစ္စည်းများတင်ဆောင်ခြင်းမှာ တစ်ရက်လျှင် ဒေါ်လာ ၂၀၀၀၀ ခန့်အထိ ကုန်ကျနိုင်ပြီး လမ်းများကို ပိတ်ထားရန်အတွက် ခွင့်ပြုချက်လည်း လိုအပ်သည်။
“ကျုပ်တို့လည်း ဒေါ်လာ ၁၀၀ ဘီလီယံလောက် ချမ်းသာရင် ဒါမျိုးလုပ်မှာပါပဲ” ဟု လူမှုကွန်ရက်သုံးစွဲသူ တစ်ဦးက မှတ်ချက်ပြုသည်။
Forbes မဂ္ဂဇင်းကြီး၏ ဖော်ပြချက်အရ ဂျက်ဘေးဇော့စ်၏ ကြွယ်ဝမှုမှာ ကန်ဒေါ်လာ ၂၂၃ ဘီလီယံခန့်ရှိကြောင်း ခန့်မှန်းထားသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Video shows crane delivers Jeff Bezos’ furniture to penthouse after billionaire closes down 5th Ave
Photo Credit- Dave Benett/amfAR/Getty Images for amfAR, William C Lopez/New York Post, Newsflare
