ဘရာဇီး စတန့်သမားတစ်ဦးက ကောင်းကင်ဒိုင်ဗင်ထိုးကာ အမေဇုန်တောကြီးအတွင်း မျိုးစေ့ပေါင်း သန်း ၁၀၀ ကြဲချ

ဘရာဇီးစတန့်သမား လူဝီဂျီ ကာနီ (ပေါ်တူဂီ အသံထွက်အားဖြင့် လွီဂျီ ကာနီ) သည် အံ့မခန်း အားကစားသမားတစ်ဦး ဖြစ်သည်။

ကာနီသည် ကောင်းကင်ဒိုင်ဗင်လောကတွင် နာမည်ကြီးတစ်ဦးဖြစ်ပြီး ကောင်းကင်ဒိုင်ဗင်ထိုးမှု အကြိမ်ရေ ၁၄၀၀၀ နီးပါး လုပ်ဆောင်ခဲ့ကာ နှစ်ပေါင်း ၂၀ ကာလအတွင်း ကမ္ဘာ့စံချိန် ၁၁ ခု ချိုးထားသည်။

ကာနီက သူ၏ ကျွမ်းကျင်မှုကို ပိုမိုကောင်းမွန်သောကမ္ဘာကြီးဖြစ်လာစေရေးအတွက် အသုံးပြုလာသည်။

၂၀၂၂ ခုနှစ်အတွင်း ကာနီသည် အမေဇုန်တောကြီးထဲမှ တောပြုန်းနေသော နေရာများတွင် ဒေသမျိုးရင်း အပင်မျိုးစိတ် ၂၇ ခု၏ မျိုးစေ့ပေါင်း သန်း ၁၀၀ ပါဝင်သည့် သေတ္တာတစ်လုံးကို ကောင်းကင်ဒိုင်ဗင်ထိုးကာ မျိုးစေ့ကြဲခဲ့သည်။

၎င်းလုပ်ဆောင်ခဲ့သမျှ စတန့်များအနက် ကျောချမ်းဖွယ်အကောင်းဆုံး လုပ်ဆောင်မှုတစ်ခုလည်း ဖြစ်သည်။

သူ၏ ရည်ရွယ်ချက်မှာ မျိုးစေ့သေတ္တာကို လေထဲတွင် ဖွင့်လှစ်ပြီး မျိုးစေ့များ ကြဲချကာ သစ်ပင်ပေါင်း သန်း ၁၀၀ စိုက်ပျိုးနိုင်ရန် ဖြစ်သည်။ကာနီသည် သူ၏ အကြံကို အကောင်အထည်ဖော်ရန်အတွက် အစိုးရထံမှ ခွင့်ပြုချက်ရရန် ၅ နှစ်ခန့် ကြာမြင့်ခဲ့သည်။

မျိုးစေ့များ ကြဲချနိုင်မည့် သေတ္တာမှာ ဇီဝနည်းဖြင့် အလိုအလျောက် ဆွေးမြေ့ပျက်စီးလွယ်သော သေတ္တာမျိုးလည်း ဖြစ်ရမည်ဖြစ်ပြီး ဘရာဇီးအစိုးရထံမှ ခွင့်ပြုချက်တောင်းခံခဲ့ရသည်မှာ မလွယ်ကူခဲ့ချေ။

သစ်တောပြုန်းတီးနေသော နေရာအနီးရှိ တောအုပ်တစ်ခုမှ မျိုးစေ့များ ရယူရွေးထုတ်ခြင်းအတွက် ၂ လခန့် အချိန်ယူခဲ့ရသည်။ အမေဇုန်တောကြီးနှင့် ဂေဟဗေဒ သဟဇာတရှိစေရေးအတွက် ဒေသမျိုးရင်းများကိုသာ ရှာဖွေခဲ့ခြင်း ဖြစ်သည်။

လတ်ဆတ်ကာ မျိုးအောင်နိုင်သော မျိုးစေ့ပေါင်း သန်း ၁၀၀ ကို အချိန်တိုအတွင်း ရွေးချယ်ရသည့်အလုပ်မှာ မလွယ်ချေ။

၂၀၂၂ ခုနှစ်၊ ဇန်နဝါရီတွင် ကောင်းကင်ဒိုင်ဗင်ထိုးကာ မျိုးစေ့များ ကြဲချခဲ့ခြင်းဖြစ်ပြီး ထိုနေ့မတိုင်မီ ရက်ပိုင်းအလိုအထိ မျိုးစေ့ထည့်မည့်သေတ္တာ စမ်းသပ်မှုမှာ မအောင်မြင်ခဲ့ရာ ၎င်းတို့အဖွဲ့မှာ နေ့မအိပ် ညမအိပ် အဖြေရှာခဲ့ရသည်။

မျိုးစေ့သေတ္တာမှာ ကောင်းကင်သို့ သယ်ဆောင်စဉ် အချိန်မတန်မီ ပေါက်ကျ၊ ကွဲကျခဲ့ခြင်းကြောင့် ဖြစ်ပြီး ထိုအပေါက်နေရာကို ဆွေးမြေ့လွယ်မည့်အရာဖြင့် ပြန်လည်ဖာထေးနိုင်ရန် နည်းလမ်းကို အပြင်းအထန် စဉ်းစားခဲ့ရသည်။

မျိုးစေ့သေတ္တာမှာ လိုရာအရပ်သို့ ရောက်၍ ဖောက်ချသောအခါတွင်မှ မျိုးစေ့ကျမှသာ ရည်ရွယ်ချက် အထမြောက်နိုင်မည် ဖြစ်ပြီး မလိုအပ်သည့်နေရာတွင် တပြုံတည်းကျသွားပါက တောပြုန်းသည့်နေရာများ ပြန်လည်ထူထောင်နိုင်ရေး ရည်မှန်းချက် အထမြောက်မည် မဟုတ်ချေ။

ကာနီအနေဖြင့် သေတ္တာကို မြဲမြံစွာကိုင်တွယ်ကာ အချိန်ကိုက် ကြဲချနိုင်ရန် လိုအပ်သည်။ ထိုကိစ္စမှာ မလွယ်ချေ။

“ကျွန်တော် သေတ္တာကို ကိုင်နိုင်ဖို့ ခက်ခက်ခဲခဲ ကြိုးစားခဲ့ရပါတယ်။ လက်ကောက်ဝတ်နဲ့ လက်ချောင်းတွေ ကျိုးမလို ဖြစ်ခဲ့ရသေးတယ်။ ပေ ၆၀၀၀ လောက်အမြင့်မှာ ကိုယ့်ကိုယ်ကိုယ် ငြိမ်အောင်နေဖို့လည်း ကြိုးစားရတယ်။ ပြီးတော့ ရောက်စေချင်တဲ့နေရာရောင်အောင် မျိုးစေ့တွေချရပါတယ်။ ဒါက တကယ့်ပီတိကို ခံစားရပါတယ်”

ကာနီက ထိုအချိန်ပိုင်းသည် မိမိဘဝတွင် အသက်ပင် မရှူဝံ့လောက်သည့် တစ်ခုတည်းသော ကောင်းကင်ဒိုင်ဗင် အတွေ့အကြုံဖြစ်ကြောင်း ပြောသည်။

ကာနီကြဲချခဲ့သော မျိုးစေ့တို့မှာ အစေ့ပေါက်နှုန်း ၉၅ ရာခိုင်နှုန်းခန့်ရှိသည်ဟုဆိုရာ အမေဇုန်တောကြီး၏ တောပြုန်းနေသော နေရာများ ပြန်လည်စိမ်းလန်းလာစေမည့် အခွင့်အလမ်းရှိနေပြီ ဖြစ်သည်။

မျိုးစေ့ချခဲ့သည့်အပင်များသည် အမြင့် မီတာ ၅၀ အထိ ကြီးထွားလာနိုင်ပြီး ကာနီတို့အဖွဲ့က ဂြိုဟ်တုပုံရိပ်များမှတဆင့် အမြဲစောင့်ကြည့်နေသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: 100 Million Seeds From Native Plants Are Released Into the Brazilian Amazon by Daring Skydiver (mymodernmet)