Bon Jovi က သူ၏ ဖလော်ရီဒါမှ ကမ်းခြေစံအိမ်ကြီးကို ဈေးကောင်းပေးကာ မရမက ဝယ်နေသူရှိသော်လည်း မရောင်းဘဲ တင်းခံနေ

အမေရိကန်တွင် အမည်မဖော်သော သူဌေးကြီးတစ်ဦးက ဖလော်ရီဒါပြည်နယ်၊ Palm Beach ရှိ ကမ်းခြေစံအိမ်ကြီးကို ဈေးကောင်းပေးကာ မရမက ဝယ်နေသော်လည်း ရော့ခ်ကြယ်ပွင့်ကြီး Jon Bon Jovi က တင်းခံနေသည်။

အမည်မဖော်သော သူဌေးကြီးသည် Palm Beach မှ ကပ်လျက်စံအိမ် ၄ လုံးကို အကြမ်းဖျင်း ဒေါ်လာ သန်း ၂၅၀ ခန့် သုံးစွဲကာ ဝယ်ယူနေခြင်းဖြစ်သည်။

အမည်မသိသော အဆိုပါဝယ်လက်က Bon Jovi ပိုင်သော စံအိမ်ကို ဒေါ်လာ ၄၂ သန်း ဈေးပေးထားသည်။

သို့သော် Bon Jovi က မရောင်းဘဲ တင်းခံနေကြောင်း ထိုအကြောင်းရပ်ကို သိရှိထားသည့် သတင်းရင်းမြစ်က Wall Street Journal သို့ ပြောသည်။

(Jon Bon Jovi က ဖလော်ရီဒါပြည်နယ်၊ Palm Beach ရှိ ကမ်းခြေစံအိမ်ကြီးကို ကန်ဒေါ်လာ သန်း ၄၀ ကျော်ဖြင့် ဝယ်ယူထားခြင်းဖြစ်သည်။ BACKGRID UK)

အမေရိကန်နှင့် နိုင်ငံတကာမှ ဒိတ်ဒိတ်ကြဲသူဌေးကြီးများက Palm Beach ကို အလွန်သဘောကျသောကြောင့် high-end အိမ်ခြံမြေဈေးကွက်တွင် ဝယ်လိုအားမြင့်မားသည်။

ယခုခြံကွက်များကို ဝယ်ယူရန် ကြိုးစားနေသူအဖြစ် အများက ခန့်မှန်းထားသည်မှာ ဘီလ်ဂိတ်၊ မိုက္ကရိုဆော့ဖ်နှင့် ဆက်နွှယ်သည့် ဘီလျံနာကြီးများဖြစ်သော Steve Ballmer နှင့် Charles Simonyi တို့ ပါဝင်နေသည်။

“ဝယ်လက်ဟာ privacy ရှိမှုနဲ့ ဘေးကင်းလုံခြုံမှုကို လိုလားသူဖြစ်ပါတယ်။ သူတို့က ကိုယ့်ခြံကိုယ့်ဝန်းထဲမှာ သက်သောင့်သက်သာနေချင်တယ်။ ဒါကြောင့် ကပ်လျက်ခြံဝန်းတွေကိုလည်း ဝယ်ယူနေတာပါ” ဟု Corcoran Group အိမ်ခြံမြေကုမ္ပဏီမှ အကျိုးဆောင် Dana Koch က Telegraph သတင်းဌာနသို့ ပြောသည်။

(အမည်မသိ သူဌေးကြီးက Palm Beach မှ ကပ်လျက်ခြံကွက်များ ဝယ်ယူနေရာတွင် တင်းခံနေသူမှာ Bon Jovi တစ်ဦးတည်းသာ ကျန်နေသည်။ ဓာတ်ပုံ-Drew Gurian/Invision/AP)

အမည်မသိ သူဌေးကြီးက ကပ်လျက်ခြံကွက်များ ဝယ်ယူနေပြီး ခြံဝန်းသောခြံကြီးအဖြစ် ပေါင်းစည်းရန် စီစဉ်နေမှုတွင် Bon Jovi ၏ အိမ်မှာ ပဉ္စမမြောက် ခြံကွက်ဖြစ်သည်။ အမည်မသိ သူဌေးကြီး ဝယ်ယူနေသော ယခုခြံများမှာ အမေရိကန်သမ္မတ ဒေါ်နယ်ထရမ့်၏ မာရာလာဂို စံအိမ်ကြီးနှင့် ၅ မိုင်ခန့်အကွာတွင် တည်ရှိသည်။

လက်ရှိအချိန်အထိ ထိုသူဌေးကြီး ဝယ်ယူထားပြီးသော ခြံများတွင် ဘီလျံနာသူဌေး William Lauder ပိုင်သော ခြံ ၂ ကွက် ပါဝင်သည်။

Mr Lauder က အဆိုပါ ခြံ ၂ ကွက်ကို ၂၀၂၃ ခုနှစ်အတွင်း ၂ ကွက်ပေါင်း ဈေးနှုန်း ကန်ဒေါ်လာ သန်း ၂၀၀ ဖြင့် အရောင်းဈေးကွက်တင်ခဲ့ဖူးသည်။

ယခုနှစ် အစောပိုင်းတွင် အဆိုပါ ခြံ ၂ ကွက် ရောင်းထွက်သွားသည်။ သို့သော် ဈေးနှုန်းမည်မျှဖြင့် အရောင်းအဝယ်ဖြစ်သွားသည်ကိုမူ မသိရချေ။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Bon Jovi standing in way of mega-deal for mystery Palm Beach buyer (yahoo.com)