(ဗြိတိန်၏ ပုစ္ဆာအဆန်ဆုံး အမျိုးသား) ဆွမ်ဆီးမြို့က မီးပွိုင့်တစ်ခုရဲ့ လမ်းအလယ်ခေါင်မှာ ၁၀ နှစ်လောက် မတ်တပ်ရပ် လမ်းပိတ်ထားတဲ့ အမျိုးသား ၁၂ ကြိမ် အဖမ်းခံရ၊ ပြန်လွတ်သောအခါတွင်လည်း ထိုနေရာတွင်ပင် မတ်တပ်ရပ်နေပြန်

ဒေးဗစ် ဟမ့်ပ်ဆန်ဆိုသည့် အမျိုးသားသည် ဗြိတိန်၏ ပု စ္ဆာအဆန်ဆုံး လူသားဖြစ်နေသည်။

ဟမ့်ပ်ဆန်သည် ဆွမ်ဆီးမြို့ရှိ မီးပွိုင့်တစ်နေရာတည်းတွင် ၁၀ နှစ်ကျော် လမ်းအလယ်ခေါင် မတ်တပ်ရပ် နေခဲ့သူ ဖြစ်သည်။ အဘယ်ကြောင့် ထိုသို့ ပြုလုပ်ရသည်ကို ယနေ့တိုင် မည်သူမှ မသိကြချေ။

ဒေးဗစ် ဟမ့်ပ်ဆန်အကြောင်း သတင်းများမှာ လွန်ခဲ့သော ၄ နှစ်ခန့်ကလည်း သတင်းမီဒီယာများတွင် ပေါ်ပေါက်ခဲ့ဖူးသည်။

ထိုစဉ်ကမူ လမ်းလယ်တွင် နှစ်ရှည်လများ မတ်တပ်ရပ် ပိတ်ဆို့ထားသော ဟမ့်ပ်ဆန်ကို ရဲတပ်ဖွဲ့က ဖမ်းဆီးသွားသောကြောင့် သတင်းများတွင် ပါလာခဲ့ခြင်း ဖြစ်သည်။

ဟမ့်ပ်ဆန်က ရဲတပ်ဖွဲ့အပါအဝင် မည်သူ့ကိုမှ သူ၏ ရည်ရွယ်ချက် အကြောင်းရင်းကို ပြောမပြခဲ့။ ထောင်သာ အကျခံခဲ့သည်။

(ဒေးဗစ် ဟမ့်ပ်ဆန်မှာ ဆွံ့အနေသူမဟုတ်သော်လည်း ရဲတပ်ဖွဲ့၊ ဆရာဝန်များ၊ ရှေ့နေများကို စကားတစ်ခွန်းမှ မဟခဲ့ချေ။)

(ယခုနှစ် ဇွန်လ ၁၉ ရက်က ဟမ့်ပ်ဆန်သည် ဆွမ်ဆီးမြို့ De La Beche လမ်းရှိ ရဲစခန်းရှေ့ လမ်းလယ်တွင် မတ်တပ်ရပ်ကာ ယာဉ်ကြောကို ပိတ်ဆို့ထားရာ နောက်ဆုံး၌ ရဲတပ်ဖွဲ့က ၎င်းအား ဖမ်းဆီးသွားခဲ့သည်)

အဖမ်းခံရမှုမှ ပြန်လွတ်လာချိန်တွင်လည်း လမ်းလယ်တွင် မတ်တပ်ရပ်ကာ လမ်းပိတ်ထားပြန်သည်။

၄ နှစ်ဟူသော အချိန်ကာလမှာ အရာရာ ပြောင်းလဲသွားစေနိုင်သော်လည်း ဟမ့်ပ်ဆန်၏ လမ်းလယ်တွင် မတ်တပ်ရပ်နေမှုကား မပြောင်းလဲ။

၂၀၁၄ ခုနှစ်က ဖမ်းဆီးခံခဲ့ရသည့်နေရာတွင်ပင် မတ်တပ်ရပ်နေမြဲ။

ယခုနောက်ဆုံးဖြစ်ရပ်တွင် ဆွမ်ဆီး ရာဇဝတ်တရားရုံးက ဟမ့်ပ်ဆန်၏ အမှုကို ကြားနာစစ်ဆေးခဲ့ရာ ရှေးယခင် အမှုများတွင် လုပ်ဆောင်ခဲ့သည့်နည်းတူ ဟမ့်ပ်ဆန်က ရဲ၊ ရှေ့နေ၊ တရားသူကြီး၊ ဆရာဝန် အစရှိသည့် မည်သူ့ကိုမှ စကားတစ်ခွန်း မဟဘဲ ကျောက်ရုပ်သဖွယ် တုံဏှိဘာဝေ ဆိတ်ဆိတ်နေ နေခဲ့သည်။

နှစ်ပေါင်းများစွာကာလအတွင်း ၎င်းကို စစ်ဆေးခဲ့ရသည့် တရားရုံးတို့က ဟမ့်ပ်ဆန်မှာ ကိုယ်စိတ်နှစ်ပါး ခံစားရမှု အခြေအနေတစ်ရပ်ရပ်ကြောင့် စကားမပြောနိုင်ခြင်းကြောင့်လော၊ ရုံးတော်ကို မထီမဲ့မြင်လုပ်ခြင်းလော ဟူသည်ကို အကြိမ်ကြိမ် အဖြေရှာရန် ကြိုးစားခဲ့ဖူးသည်။

အကျဉ်းထောင်အရာရှိတို့၏ ထွက်ဆိုချက်အရမူ ဟမ့်ပ်ဆန်သည် ထောင်ထဲတွင် ရှိနေစဉ်က မိမိတို့ကို စကားပြောကြောင်း ထွက်ဆိုကြသည်။

ထို့ကြောင့် ဟမ့်ပ်ဆန်မှာ စကားမပြောလိုသောကြောင့် မပြောခြင်းဖြစ်ကြောင်း တရားသူကြီးတို့က ကောက်ချက်ဆွဲခဲ့သည်။

လမ်းလယ်ခေါင်တွင် အမြဲမတ်တပ်ရပ်နေသည့် ထူးဆန်းသော အပြုအမူအတွက် စိတ်ကျန်းမာရေး စစ်ဆေးရန် တရားရုံးက အမိန့်ထုတ်ခဲ့သော်လည်း ဒေးဗစ် ဟမ့်ပ်ဆန်က တရားရုံးက တာဝန်ပေးထားသော ဆရာဝန်တို့ကိုလည်း စကားတစ်ခွန်းမှ မဟခဲ့။

ထို့ကြောင့် ၎င်း၏ စိတ်ကျန်းမာရေးကို စစ်ဆေးမေးမြန်းနိုင်ခြင်း မရှိခဲ့ချေ။

(ဟမ့်ပ်ဆန်သည် ဆွမ်ဆီးတွင် လမ်းပိတ်ဆို့သည့်အမှုဖြင့် ၁၀ နှစ်တာအတွင်း ၁၂ ကြိမ် ဖမ်းဆီးခံခဲ့ရသည်။ ပုံတွင် တွေ့ရသည်မှာ ဆွမ်ဆီး ရာဇဝတ် တရားရုံး ဖြစ်သည်။)

ယနေ့တိုင် ဒေးဗစ် ဟမ့်ပ်ဆန်တစ်ယောက် လမ်းလယ်တွင် မတ်တပ်ရပ်နေသည့် ကိစ္စမှာ ဗြိတိန်၏ ဆန်းကြယ်သော ပုစ္ဆာတစ်ရပ်ဖြစ်နေဆဲဖြစ်ပြီး မည်သူမှ အဖြေမရှာနိုင်သေးချေ။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: The mystery of Britain's most annoying man: Meet the silent repeat offender who constantly blocks traffic... but WHY does he do it?