မြို့တွင်းခြောက်မြို့နယ် အိမ်ခြံမြေ အငှား ပိုသွက်လာ

မြို့တွင်း ခြောက်မြို့နယ်ရဲ့အိမ်ခြံမြေဈေးကွက်ကအခုလပိုင်းမှာ အငှားပိုသွက်လာတယ်လို့ သိရပါတယ်။

မြို့တွင်းပိုင်းတိုက်ခန်းတွေမှာ အဆောင်စုငှားတာတွေ၊ ရုံးခန်း တွေအတွက် ငှားတာတွေ ရှိပြီး တော့ တိုက်ခန်းဈေးနှုန်းတွေမှာ ကျပ်နှစ်သိန်းကစပြီးတော့ ငါးသိန်း၊ ရှစ်သိန်းလောက်အထိရှိပါတယ်။ မီနီကွန်ဒိုတွေမှာဆိုရင် ကျပ်၁၀သိန်းအထက်မှာ ရှိပြီး တော့ အငှားအဖြစ်ဆုံးက ကျပ်ငါးသိန်းအောက် ပိုအငှားဖြစ်နေတယ်လို့ သိရပါတယ်။

တိုက်ခန်းအငှားပိုင်းမှာဆိုရင် မြို့တွင်းဧရိယာတွေဖြစ်တဲ့ ဗိုလ်တထောင်၊ ပုဇွန်တောင်၊ လမ်းမတော်၊ လသာ၊ ကျောက်တံတား၊ ပန်းဘဲတန်း စတဲ့ မြို့နယ်တွေမှာ အဆောင်ငှားတာရော၊ တိုက်ခန်းရုံးခန်း အငှားတွေရော ဖြစ်နေပါတယ်။

“ဒီဇင်ဘာလအတွင်း တိုက်ခန်းအငှားပိုင်းမှာတိုးတက်လာတာ တွေ့ရပါတယ်၊ အဆောင်နေသူတွေက မြို့တွင်းမှာပိုများတယ် လေ၊ တချို့ဆိုရင် သူငယ်ချင်းတွေ စုပြီး တိုက်ခန်းစုငှားနေကြတယ်၊ အောက်တိုဘာလလောက်ဆိုရင် အငှားပိုင်းမှာ အနည်းငယ်လျော့ သွားတာမျိုးရှိတယ်၊ ဘာကြောင့်လဲဆိုရင် နယ်က တိုက်ခန်းစုငှားပြီး နေကြတာမှာဆိုရင် ကျောင်းသားတွေလဲရှိနေတော့ ကျောင်းပြန်တက်ရင် အခန်းအပ်ကြတာရှိတာကြောင့်  အငှားပိုင်းမှာ အနည်းငယ်လျော့ကျခဲ့တယ်”လို့ အိမ်ခြံမြေအကျိုးဆောင် ဒေါ်ပြည့်က ပြောပါတယ်။

လက်ရှိမှာ ကျောင်းသားတွေဆိုရင်လည်း ကျောင်းတက် ပြန်ရောက်တာတွေကြောင့်လည်း အငှားပိုင်း ပြန်ကောင်းလာခဲ့ပါတယ်။

အဆောင်စုငှားနေသူတွေမှာ အထပ်မြင့်တွေဖြစ်တဲ့ ဈေးနိမ့်တဲ့ နေရာတွေကို ငှားကြသလို ကုမ္ဗဏီ အငှားတွေမှာဆိုရင်လည်း အထပ်နိမ့်တွေကို ပိုစိတ်ဝင်စားငှားကြပါ တယ်။

အရောင်းမှာ ဆိုရင်တော့ မြို့ တွင်းတိုက်ခန်းတွေမှာ ဈေးများတာ ရယ်၊ တိုက်ခန်း၊ ကွန်ဒိုအသစ် ဆက်ထွက်တာမျိုးမရှိတာကြောင့် အရောင်းအဝယ်အေးနေပြီး အငှားသာ ပိုဖြစ်နေကြောင်း  iMyanmarHouse.com (အိုင်မြန်မာဟောက်စ်ဒေါ့ကွန်း) မန်နေးဂျင်း ဒါရိုက်တာ ဦးနေမင်းသူက ပြောပါတယ်။

Credit: Kumudra Journal