မြေငှားဂရန်သက်တိုးခြင်းနှင့် စပ်လျဉ်း၍ သိရှိထားသင့်သည့်အချက်အလက်များ ဖော်ပြပေးလိုက်ပါတယ်။

မြေငှားဂရန်များမှာ ခွင့်ပြုသက်တမ်း ကာလအတွင်းသာ နေထိုင်ခွင့်ရှိပြီး နှစ်ကာလ အပိုင်းအခြားဖြင့် (၁၀)နှစ် ဂရန်၊ နှစ်- (၃၀)၊ (၆၀)၊ (၉၀) ဂရန်ဟူ၍ အမျိုးမျိုးရှိပါသည်။ သတ်မှတ်ကာလ မကုန်ဆုံးခင် (၃)လအလို တွင် သက်ဆိုင်ရာမြေယာစီမံခန့်ခွဲမှုဌာနတွင် သက်တမ်းတိုးလျှောက်ထားခြင်း ဆောင်ရွက်ရမည်ဖြစ်ပါသည်။

လူနေထိုင်ရန်အတွက် မြေငှားဂရန် လျှောက်ထားနိုင်သလို စီးပွားရေးလုပ်ငန်းများ လုပ်ဆောင်ရာတွင်လဲ စက်မှုဇုံမြေများတွင် စက်မှုစီးပွား ဂရန်များ လျှောက်ထားနိုင်ပါသည်။ သက်တိုးလျှောက်ထားရာတွင် သက်တမ်း ကုန်းဆုံးတော့မည့် မြေငှားစာချုပ်၊ မြေနှင့်သက်ဆိုင်သည့် ပိုင်ဆိုင်မှု စာချုပ်စာတမ်းများ၊ မရွှေ့မပြောင်းနိုင်သော ပစ္စည်းကို ရောင်းကြောင်းလက်မှတ်စာရှိလျှင် တင်ပြရန်၊ အမည်ပေါက် လျှောက်ထားသူ၏ မှတ်ပုံတင်၊ မြေငှားခ ကြွေးကျန်ကင်းရှင်းကြောင်း ထောက်ခံစာတို့အား လျှောက်လွှာနှင့်အတူ ပူးတွဲတင်ပြပေးရပါမည်။

မြေငှားဂရန်မှာ ပျောက်ဆုံးနေပါက ပျောက်ဆုံးကြောင်း ကျမ်းကျိန်လွှာ၊ ရဲစခန်းထောက်ခံစာ၊ ရပ်ကွက် အုပ်ချုပ်ရေးမှူးထောက်ခံစာ၊ ကိုယ်တိုင်ခံဝန်ချက်တို့အား လျှောက်ထားသူ၏ မှတ်ပုံတင်၊ မှတ်ပုံတင်စာချုပ်စာ တမ်းများနှင့်အတူ ပူးတွဲတင်ပြပေးရမည်။ မြေကွက်အား အမည်ပေါက်ပိုင်ဆိုင်သူ၊ မှတ်ပုံတင်စာချုပ် စာတမ်း အဆက်အစပ်ဖြင့် ပိုင်ဆိုင်လာသူ၊ တရားရုံးမှထုတ်ပေးသော မရွှေ့မပြောင်းနိုင်သောပစ္စည်းအား ရောင်းကြောင်း လက်မှတ်စာရရှိသူတို့မှ မြေငှားဂရန်သက်တမ်းတိုး လျှောက်ထားနိုင်ပါသည်။

ဂရန်သက်တမ်းတိုး လျှောက်ထားရာ၌ ဌာနမှ ပြည်တွင်းအခွန်ဦးစီးဌာနမှ ကန့်ကွက်တားမြစ်ချက်များ၊ ကြွေးကျန်များ၊ တရားရုံးတားဝရမ်း၊ ဘဏ်ကန့်ကွက်ချက်များ၊ ဂရန်စည်းကမ်းပျက် မှတ်ချက်ရှိမရှိ စီစစ်မည်ဖြစ်ကာ လျှောက်ထားသူ၏ အချက်အလက်များနှင့် ဌာနမှ မြေယာမှတ်တမ်းများ ကိုက်ညီမှုရှိမှသာ သက်တမ်းတိုး ခြင်းအား ခွင့်ပြုပေးမည်ဖြစ်ပါသည်။

နိုင်ငံပိုင် နေ့စဉ်သတင်းစာတွင် (၁၄)ရက်အတွင်း ကန့်ကွက်ရန်ရှိမရှိ သတင်းစာကြေငြာစေခြင်း၊ ကန့် ကွက်ကြေငြာအား မြေပေါ်တွင်(၁)စောင်၊ လျှောက်ထားသူအား (၁)စောင်၊ မြို့နယ်အုပ်ချုပ်မှူးရုံးတွင် (၁)စောင် ပေးပို့ရန် ထုတ်ပေးမည်ဖြစ်ကာ ရပ်ကွက်နှင့် မြို့နယ်အုပ်ချုပ်ရေးမှူး၏ လက်ခံရရှိကြောင်း အထောက်အထား အား ဌာနသို့ ပြန်လည်တင်ပြစေပါသည်။

မြေငှားဂရန်ပျောက်ဆုံးပြီး သက်တမ်းတိုးလျှောက်ထားခြင်းအား ဌာနမှ ခွင့်ပြုပါက လျှောက်ထားသူမှ မြေငှားစာချုပ်ရရန် မြို့နယ်အလိုက် ဝန်ဆောင်ခအား ပေးသွင်းခြင်း၊ သက်တမ်းပြတ် ဒဏ်ကြေးပေးသွင်းစေခြင်း နှင့် ဂရန်ပျောက်ဝန်ဆောင်ခတို့ ပေးဆောင်ရမည်ဖြစ်ပြီး သတ်မှတ်သည့် အထူးကပ်တံဆိပ်ခေါင်းတန်ဖိုးအား ထမ်းဆောင်ရမည်ဖြစ်ကြောင်း ဥပဒေဗဟုသုတအနေဖြင့် ရေးသားဖော်ပြ ပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com