[လွယ်မယ်ထင်လို့လား ] ဘာမှ မလုပ်ဘဲ မိနစ် ၉၀ ငြိမ်ငြိမ်လေး ထိုင်နေရတဲ့ တောင်ကိုရီးယားက ပြိုင်ပွဲ အင်စတာဂရမ်တွင် နာမည်ကြီးနေ

မည်သည့်အရာမှ မလုပ်ဆောင်ဘဲ ငြိမ်သက်စွာ ထိုင်နေရခြင်းမှာ သာမန်ကြည့်လျှင် ငှက်ပျောသီးကို အခွံနွှာစားရသည့်သဖွယ် လွယ်ကူသည်ဟု မှတ်ထင်စရာရှိသည်။

သို့သော် ထိုမျှလွယ်နိုင်ပါမည်လား။

ငြိမ်ငြိမ်လေးထိုင်နေရုံဖြင့် ဆုရမည်ဆိုလျှင် မည်သို့သဘောရပါသနည်း။

တောင်ကိုရီးယားတွင် “ဘာမှမလုပ်တဲ့ ပြိုင်ပွဲ” (Space-Out Competition) အမည်ရှိ ထူးဆန်းသော ပြိုင်ပွဲတစ်ခု ရှိသည်။

ထိုပြိုင်ပွဲတွင် ပါဝင်ယှဉ်ပြိုင်သူများမှာ မည်သည့်အရာမှ လုပ်ပြစရာ မလိုချေ။

ပြီးခဲ့သော မေလအတွင်း ကျင်းပခဲ့သော ဧကဒသမမြောက် ဘာမှမလုပ်တဲ့ပြိုင်ပွဲကြိးကို ဆိုးလ်မြို့တော်၊ Jamsu Bridge Banpo Hangang ပန်းခြံအတွင်း ကျင်းပခဲ့ပြီး လာရောက်ကြည့်ရှုသူ ပရိသတ် များပြားခဲ့သည်။

မည်သည့်အရာမှ မလုပ်ဘဲ မလှုပ်မရှား အချိန်ကြာကြာ နေနိုင်မည်ဟု ထင်ပါသလား။

(ဆက်စပ်သတင်း)

မိုက္ကရိုဆော့ဖ်က ဆောက်လုပ်လိုက်သော အသံမဲ့အခန်း ဂင်းနက်စ် စံချိန်တင်၊ မည်သူမှ တစ်နာရီထက် ပိုမနေနိုင်ဟုဆို

https://www.iMyanmarHouse.com/news/read/1054036

(▲ ပြိုင်ပွဲစည်းမျဉ်းမှာ ရိုးစင်းလွယ်ကူသည်။ မည်သည့်အရာမှ မလုပ်ဘဲ၊ မလှုပ်ရှားဘဲ မိနစ် ၉၀ ထိုင်နေရန်သာ ဖြစ်သည်။ ဓာတ်ပုံ-Unsplash/Representative Image)

ယခုနှစ်ပြိုင်ပွဲတွင် အဖွဲ့ပေါင်း ၄၅၄၇ ဖွဲ့အထိ စာရင်းပေးခဲ့သော်လည်း အဖွဲ့ ၈၀ မှ လူပေါင်း ၁၂၆ ဦးသာ ပါဝင်ယှဉ်ပြိုင်ခဲ့ကြောင်း The Korea Times သတင်းဌာနက ဖော်ပြသည်။

ပါဝင်ယှဉ်ပြိုင်သူများတွင် စစ်သည်များ၊ ရေကူးသမားများလည်း ပါဝင်ပြီး Korea Times သတင်းဌာနမှ သတင်းထောက်တစ်ဦးပင် ပါဝင်သည်။

ပြိုင်ပွဲစည်းမျဉ်းမှာ ရိုးစင်းသည် မလှုပ်မရှား၊ မည်သည့်အရာမှ မလုပ်ဘဲ မိနစ် ၉၀ ထိုင်နေရခြင်း ဖြစ်သည်။

ဖုန်းသုံးခြင်း၊ စကားပြောခြင်း၊ အိပ်ပျော်သွားခြင်းများ ခွင့်မပြုချေ။

နှလုံးခုန်နှုန်း တည်ငြိမ်မှု၊ ပွဲလာပရိသတ်တို့၏ မဲပေးမှုတို့ကို အခြေခံကာ အနိုင်ရသူကို ရွေးချယ်သည်။

ပြိုင်ပွဲသို့ ပထမဆုံးရောက်လာသူများတွင် ဥပဒေကုမ္ပဏီတစ်ခုမှ ဝန်ထမ်းတစ်ဦးဖြစ်သူ အသက် ၆၂ နှစ်အရွယ်ရှိ ချွဲအိရို (Choi I-ro) အမည်ရှိ အမျိုးသားကြီးလည်း ပါဝင်သည်။

“ကျွန်တော်ဒီကို လာတဲ့အကြောင်းရင်းက ခေတ္တရပ်နားမှုရဲ့ အရေးကြီးပုံကို ခံစားကြည့်ချင်တာကြောင့် ဖြစ်ပါတယ်” ဟု ချွဲအိရိုက The Korea Times သတင်းဌာနမှ သတင်းထောက်ကို ပြောသည်။

ပြိုင်ပွဲဝင်များထဲတွင် ဂင်ချူးဟာ (Kim Ju-ha) အမည်ရှိ ၈ နှစ်သမီးလေးတစ်ဦးလည်း ပါသည်။

“ငြိမ်ငြိမ်လေးနေရတာမျိုးမှာ သမီးက တော်တော်လုပ်နိုင်တာကို သိလို့ ဒီပြိုင်ပွဲကို ဝင်ခဲ့တာပါ” ဟု ဂင်ချူးဟာက ပြောသည်။

ညနေ ၄ နာရီတွင် ပြိုင်ပွဲစသည်။

၁၅ မိနစ်ခန့် မိတ်ဆက်ခြင်းနှင့် ခေတ္တအကြောလျှော့ခြင်းများ ပြုလုပ်ကြသည်။

ထို့နောက် မိနစ် ၉၀ မလှုပ်မယှက် ငြိမ်ငြိမ်နေရသည့် ပြိုင်ပွဲကြီး စတင်သည်။

The Korean Times သတင်းဌာန၏ ဖော်ပြချက်အရ ပြိုင်ပွဲစီစဉ်ကြီးကြပ်သူတို့သည် ဆရာဝန်များသဖွယ် ဝတ်ဆင်ထားပြီး ပြိုင်ပွဲဝင်နေသူတို့၏ နှလုံးခုန်နှုန်းကို လိုက်လံစစ်ဆေးကြသည်ဟု ဆိုသည်။

ထို့အပြင် ခေတ်ဟောင်းတရားသူကြီးအသွင် ဝတ်ဆင်ထားသူတို့က ပြိုင်ပွဲဝင်များအကြား လှည့်ပတ်သွားလာကာ ငြိမ်ငြိမ်သက်သက် နေထိုင်ခြင်း၊ အိပ်ငိုက်ခြင်း ရှိ၊ မရှိ လိုက်လံစစ်ဆေးကြသည်။

ဂဏာမငြိမ် လှုပ်လှုပ်ရှားရှားလုပ်ခြင်း၊ ကိုယ်အနေအထား ခဏခဏပြောင်းခြင်း၊ စကားပြောခြင်း၊ ရယ်မောခြင်း၊ အိ ပ်ငိုက်ခြင်း၊ နာရီကြည့်နေခြင်း၊ ပြိုင်ပွဲခင်းအတွင်း လိုက်လံကြည့်ရှုနေခြင်း အစရှိသည်တို့ ပြုလုပ်နေသူများ ကို ပထမအကြိမ် သတိပေးသည်။

ဒုတိယအကြိမ် ထပ်မံချိုးဖောက်လျှင် ပြိုင်ပွဲမှ ထွက်ရမည် ဖြစ်သည်။

ယခုနှစ်ပြိုင်ပွဲတွင် သတိပေးခံရသူ တစ်ဦးသာရှိသည်ဟု ဆိုသည်။

အဆိုပါပြိုင်ပွဲကို ရိုက်ကူးထားသည့် ဗွီဒီယိုဖိုင်မှာ အင်စတာဂရမ်တွင် ဂယက်ရိုက်ပျံ့နှံ့နေသည်။

ပါဝင်ယှဉ်ပြိုင်သူများမှာ လူရွှင်တော်၊ နင်ဂျာ၊ ရဲအရာရှိ အစရှိသည့် ထူးခြားသည့် ဝတ်စားပုံများဖြင့် ပါဝင်ယှဉ်ပြိုင်ကြသည်ကို တွေ့ရသည်။

အင်စတာဂရမ်မှ ဗွီဒီယိုဖိုင်မှာ ကြည့်ရှုမှုအကြိမ်ရေ ၄ သန်းကျော် ရှိနေပြီ ဖြစ်သည်။

ယခုနှစ်ပြိုင်ပွဲတွင် အနိုင်ရသွားသူမှာ ဆိုးလ်မြို့တော်အခြေစိုက် Pogo Attack အမည်ရှိ ပန့်ခ်ဂီတဝိုင်းတစ်ခုမှ ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Just Sitting And Doing Nothing? There’s A Competition For That In South Korea