အမေရိကန်သမ္မတ ဒေါ်နယ်ထရမ့်၏ အကြီးဆုံးသားက မိသားစုဆောက်လုပ်ရေးလုပ်ငန်းများ တိုးတက်ရေးအတွက် အိန္ဒိယသို့ အလည်အပတ်သွားကာ ဝန်ကြီးချုပ် မိုဒီနှင့်တွေ့ဆုံမည်

အမေရိကန်သမ္မတ ဒေါ်နယ်ထရမ့်၏ အကြီးဆုံးသားဖြစ်သူ ဒေါ်နယ်ထရမ့်ဂျူနီယာသည် မိသားစုဆောက်လုပ်ရေးလုပ်ငန်းများ တိုးတက်ရေးအတွက် အိန္ဒိယသို့ အလည်အပတ်သွားကာ ဝန်ကြီးချုပ် မိုဒီနှင့်တွေ့ဆုံမည်ဖြစ်ကြောင်း အမေရိကန်နှင့် အင်္ဂလန်အခြေစိုက် သတင်းဝက်ဘ်ဆိုက်များတွင် ဖော်ပြသည်။

ယခုခရီးစဉ်အတွင်း မိသားစု၏ ဆောက်လုပ်ရေးလုပ်ငန်းကိစ္စရပ်များသာမက အိန္ဒိယဝန်ကြီးချုပ် နာရန်ဒြာ မိုဒီနှင့်တွေ့ဆုံကာ အမေရိကန်နိုင်ငံခြားရေးမူဝါဒနှင့် စပ်လျဉ်း၍ မိန့်ခွန်းတစ်ရပ်လည်း ပြောကြားရန် စီစဉ်ထားသည်ဟု ဆိုသည်။

အိန္ဒိယသတင်းစာများတွင် “ထရမ့်ရောက်နေပြီ…သင်ဖိတ်ကြားခံရပြီးပြီလား” ဟူသော ခေါင်းစဉ်ဖြင့် သတင်းများ ဖော်ပြလျက်ရှိသည်။
ထို့အပြင် မွမ်ဘိုင်းရှိ ထရမ့်တာဝါစီမံကိန်းကိုလည်း အရောင်းကြော်ငြာလာသည်ကိုလည်း တွေ့ရသည်ဟု ဆိုသည်။

ထရမ့်တာဝါစီမံကိန်းတွင် ကန်ဒေါ်လာ ၃၈၀၀၀ ခန့်ပေးသွင်းကာ ဝယ်ယူကြသူများအနေဖြင့် ဒေါ်နယ်ထရမ့်၏ သားဖြစ်သူ ရောက်ရှိလာပါက ညစာစားပွဲသို့ တက်ရောက်ခွင့်ရမည်ဟု အိန္ဒိယသတင်းစာများတွင် ကြော်ငြာလာကြသည်။

အသက် ၄၀ အရွယ်ရှိပြီဖြစ်သည့် ထရမ့်ဂျူနီယာသည် Trump Organization ၏ အိမ်ခြံမြေစီမံကိန်းများရှိရာ အိန္ဒိယမြို့ကြီးများသို့ သွားရောက်ကာ ရင်းနှီးမြှုပ်နှံသူများ၊ စီးပွားရေးလုပ်ငန်းရှင်များနှင့် တွေ့ဆုံမည် ဖြစ်သည်။

Trump Organization သည် မွမ်ဘိုင်း၊ ကိုလ်ကာတားနှင့် နယူးဒေလီတို့တွင် ဆောက်လုပ်ရေးစီမံကိန်းများ အကောင်အထည်ပေါ်လျက် ရှိသည်။
လာမည့်သောကြာနေ့တွင်ကျင်းပမည့် ကမ္ဘာလုံးဆိုင်ရာ စီးပွားရေးထိပ်သီးဆွေးနွေးပွဲတွင်လည်း ထရမ့်ဂျူနီယာက “အင်ဒို-ပစိဖိတ်ပူးပေါင်းမှု ပြန်လည်ပုံဖော်ခြင်း၊ ပူးပေါင်းဆောင်ရွက်မှု ခေတ်သစ် ” ဟူသောခေါင်းစဉ်ဖြင့် ဟောပြောမည် ဖြစ်သည်။

သမ္မတဒေါ်နယ်ထရမ့်သည် သမ္မတအဖြစ်ရွေးကောက်ခံရပြီးနောက်ပိုင်းမှစတင်ကာ မိသားစုစီးပွားရေးလုပ်ငန်းများကို ကိုင်တွယ်ခြင်းမရှိတော့ဘဲ နေ့စဉ်လုပ်ဆောင်ဖွယ်ကိစ္စရပ်အားလုံးကို သားကြီးများဖြစ်သော ဒေါ်နယ်ထရမ့်ဂျူနီယာနှင့် အဲရစ် ဖရက်ဒရစ် ထရမ့်တို့ထံ လွှဲပြောင်းပေးထားသည်။

“ကုမ္ပဏီနဲ့ အစိုးရဆိုတာကြားမှာ လုံးဝပိုင်းခြားထားပါတယ်။ ဒီနှစ်ခုကြားမှာ မယုံကြည်နိုင်လောက်တဲ့ တံတိုင်းတစ်ခု ကျွန်တော်တို့ တည်ထောင်ထားခဲ့ပြီးဖြစ်ပါတယ်” ဟု သားလတ်ဖြစ်သူ အဲရစ်က ပြောကြားသည်။

ဒေါ်နယ်ထရမ့်၏ သားသမီးများ မိသားစုစီးပွားရေးလုပ်ငန်းများ ဆောင်ရွက်ရာတွင် Secret Service ထောက်လှမ်းရေးအဖွဲ့ဝင်များကို အသုံးပြုလျှက်ရှိခြင်းကြောင့် တိုင်းပြည်ဘဏ္ဍာငွေ များပြားစွာကုန်ကျနေရမှုအပေါ် ဝေဖန်မှုများလည်း ရှိနေသည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)