[အချစ်ဆိုသည်မှာ…] အမေရိကန်တွင် ခင်ပွန်းဖြစ်သူ ကွယ်လွန်သွားသော်လည်း ချစ်သူများနေ့ရောက်တိုင်း ခင်ပွန်းပို့လိုက်သော ပန်းစည်းလက်ခံရရှိနေသောဖြစ်ပုံ

ချစ်သူများနေ့ (Valentine’s day) ရောက်တိုင်း လွမ်းဆွတ်တသနေရမည့် အချစ်ဇာတ်လမ်းတစ်ပုဒ် ရှိနေသည်။

အမေရိကန်ပြည်၊ ကယ်လီဖိုးနီးယားပြည်နယ်မြောက်ပိုင်းတွင် နေထိုင်သော သက်ကြီးရွယ်အို စုံတွဲဖြစ်သော ဂျွန်နှင့် ဒိုင်ယာနာတို့၏ ဇာတ်လမ်း ဖြစ်သည်။

၎င်းတို့ လက်ထပ်ခဲ့သည်မှာ နှစ်ပေါင်း ၅၀ နီးပါးရှိခဲ့ပြီး ဂျွန် ကွယ်လွန်င်္ပြီးနောက်ပိုင်းတွင်ပင် ဇနီးဖြစ်သူမှာ ဂျွန်ပို့လိုက်သော ပန်းစည်းများ လက်ခံရရှိနေခဲ့သည်။

“ကျွန်မတို့ လက်ထပ်ခဲ့တာ ၄၇ နှစ်ရှိပါပြီ။ အထက်တန်းကျောင်းကတည်းက ဆုံစည်းခဲ့တာပါ။ အဲဒီတုန်းက ၁၆ နှစ်အရွယ်ပဲ ရှိပါသေးတယ်” ဟု အသက် ၇၇ နှစ်အရွယ် ရှိပြီဖြစ်သူ ဒိုင်ယာနာ (Diana Maver) က ပြောသည်။

၎င်းတို့ လက်ထပ်ခဲ့ကြပြီး သားသမီး ၃ ဦး ထွန်းကားခဲ့ကာ သာယာပျော်ရွှင်ဖွယ်ဘဝကို အတူတကွ ဖြတ်သန်းခဲ့ကြသည်။

ဂျွန် (John Maver) သည် ၂၀၁၇ ခုနှစ်၊ အောက်တိုဘာလတွင် ကွယ်လွန်သွားခဲ့သည်။

သို့သော် ၄ လအကြာ… ၂၀၁၈ ခုနှစ်၊ ချစ်သူများနေ့တွင် ဂျွန်၏ ချစ်ခြင်းမေတ္တာကို ဒိုင်ယာနာ တွေ့ရှိလာရသည်။

သမီးဖြစ်သူ မာရီလီ ဟာ့ထ် (Marilea Heart) က “အဖေဟာ သူ မရှိတော့ပေမယ့် သူ့အချစ်တွေ အမြဲရှင်သန်နေအောင် ကြိုတင်စီစဉ်သွားခဲ့ပါတယ်။ နှစ်စဉ်နှစ်တိုင်း အမေ့ရဲ့ အိမ်တံခါးဝမှာ အဖေ့ဆီက ပန်းစည်းတွေ ရောက်လာလေ့ရှိတယ်။ အဲဒီ ပန်းစည်းတွေ ရောက်လာတိုင်း အမေ့မျက်နှာ ဝင်းပရွှန်းလဲ့နေတာပါပဲ။ သူနဲ့အတူ အဖေရှိနေတယ်လို့ အမေက ယုံကြည်ထားတယ်။” ဟု ပြောသည်။

(မှတ်ချက်။ သမီးဖြစ်သူ မာရီလီသည် ဖခင်က ပန်းစည်းများပို့ရန် မည်သည့်ဝန်ဆောင်မှုလုပ်ငန်းထံ အပ်နှံခဲ့ကြောင်း သိပုံမရချေ။ ဂျွန်က သူ၏ချစ်ခြင်းမေတ္တာကို ပြသရန် လှလှပပ ပဉ္စလက်ဆန်ဆန် ပုံဖော်ပေးသွားခဲ့ခြင်း ဖြစ်သည်)

ဒိုင်ယာနာက ပြောသည်မှာ “နှင်းဆီတွေ..လီလီပန်းတွေ…။ အဖြူရောင် လီလီတွေပေါ့။ ကျွန်မတို့ တစ်ယောက်အပေါ်ထားတဲ့ အချစ်တွေကို ကိုယ်စားပြုနေပါတယ်” ဟု ပြောသည်။

“ပန်းစည်းပုံစံတူ၊ ကတ်ပြားပုံစံတူ အမြဲရောက်လာတတ်ပါတယ်။ အဖေက နှစ်တိုင်း ပို့ခိုင်းဖို့ ကြိုတင်စီစဉ်သွားတာပါ။ အမေ့ရဲ့ ကျန်ရှိတဲ့ ဘဝတလျှောက်လုံးပေါ့။” ဟု သမီးဖြစ်သူ မာရီလီက ပြောသည်။

အသက် ၇၇ နှစ်ရှိပြီဖြစ်သော ဒိုင်ယာနာမှာ လာမည့်ချစ်သူများနေ့တို့တွင်လည်း ပန်းစည်းများ လက်ခံရရှိရန် ရင်ခုန်မျှော်လင့်နေသည်။

ယခုဖြစ်ရပ်မှာ မည်သည့်သင်ခန်းစာ ရယူနိုင်သနည်း။

မာရီလီက ပြောသည်မှာ အချစ်စစ်ဆိုသည်မှာ အမှန်တကယ်ရှိသည်ဟု ဆိုသည်။

“ချစ်ခြင်းမေတ္တာဆိုတာ ဘဝမှာ တကယ်ရှိပါတယ်။ သေပြီးနောက်ပိုင်းတောင်မှပေါ့။ အဖေက တကယ့်ကို Romantic ဆန်သူကြီးပါ” ဟု မာရီလီက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref:  CA man who passed away prearranged flowers to be sent to his wife on every Valentine's Day forever  (abc7)