ဘားရက်အိုဘားမားက တစ်ပတ်လျှင် ဒေါ်လာ ၅၀၀၀၀ ဖြင့် ငှားရမ်းကာ အပန်းဖြေခဲ့သော ဧက ၃၀ ကျယ်ဝန်းသည့် ခြံဝန်းကြီးနှင့် စံအိမ် ကန်ဒေါ်လာ ၃၉ သန်းဖြင့် အရောင်းဈေးကွက်ဝင်လာ

အမေရိကန်ပြည် မက်ဆာချူးဆက်ပြည်နယ်တွင် အမေရိကန်သမ္မတဟောင်း ဘားရက်အိုဘားမားနှင့် သူ၏ မိသားစုက ၂၀၀၉ ခုနှစ်မှ ၂၀၁၁ ခုနှစ်အထိ နွေရာသီအပန်းဖြေခဲ့သော Martha’s Vineyard ကျွန်းရှိ စံအိမ်ကြီး ကန်ဒေါ်လာ ၃၉ သန်းဖြင့် အရောင်းဈေးကွက်ဝင်လာသည်။

Martha’s Vineyard ကျွန်းမှာ အမေရိကန် အရှေ့မြောက်ပိုင်း မက်ဆာချူးဆက်ကမ်းလွန် အတ္တလန္တိတ် သမုဒ္ဒရာအတွင်း တည်ရှိပြီး Rhode Island ၏ အရှေ့ဘက်တွင် ဖြစ်သည်။

Blue Heron Farm ဟု အမည်ရသော စံအိမ်ဖြစ်ပြီး ခြံဝန်းအကျယ်မှာ ဧက ၃၀ ရှိသည်။ ယခင်က နာမည်ကြီးဗြိတိသျှ ဗိသုကာပညာရှင် နော်မန် ဖော့စတာ (Norman Foster) မိသားစု ပိုင်ဆိုင်ခဲ့သော စံအိမ်ကြီး ဖြစ်သည်။

သူ၏ ကုမ္ပဏီဖြစ်သော Foster+ Partners သည် အထင်ကရ အဆောက်အအုံကြီးများဖြစ်သော လန်ဒန်မြှို့ရှိ Gherkin နှင့် ဝင်ဘလေကွင်းကြီး (Wenbley) တို့ကို အကောင်အထည်ဖော်ခဲ့ကြောင်း Wall Street Journal က ဖော်ပြသည်။

ဖော့စတာ မိသားစုသည် ဤစံအိမ်ဝန်းကြီးကို ၂၀၁၁ ခုနှစ်တွင် ကန်ဒေါ်လာ ၂၂ ဒသမ ၄ သန်းဖြင့် ဝယ်ယူခဲ့ပြီးနောက် ပြုပြင်မွမ်းမံမှုများ ကြီးမားစွာ ပြုလုပ်ခဲ့သည်။

(▲ Blue Heron Farm သည် Martha’s Vineyard ကျွန်းပေါ်တွင် တည်ရှိပြီး ဧကပေါင်း ၃၀ ကျယ်ဝန်းသည်။ ဘားရက် အိုဘားမားတို့ မိသားစုက နွေရာသီကာလများတွင် ငှားရမ်းတည်းခို အပန်းဖြေခဲ့ဖူးသည်။ ဓာတ်ပုံ-Evan Joseph Studios)

(▲ သမ္မတဟောင်း ဘားရက်အိုဘားမားသည် အိုင်ရင်း ဟာရီကိန်းမုန်တိုင်းနှင့် ပတ်သက်သည့် မိန့်ခွန်းကြေညာချက်ကို ယခုစံအိမ်ကြီးတွင် တည်းခိုနေထိုင်ရင်း ၂၀၁၁ ခုနှစ် ၊ သြဂုတ်လ ၂၆ ရက်၌ ထုတ်ပြန်ခဲ့ခြင်း ဖြစ်သည်။ ဓာတ်ပုံ-Reuters)

စံအိမ်မှာ ကျွန်း၏ အလယ်ဗဟိုတွင် တည်ရှိပြီး ပင်မစံအိမ်အကျယ်အဝန်း စတုရန်းပေ ၇၀၀၀ ရှိကာ အိပ်ခန်း ၈ ခန်း ပါဝင်သည်။

အိမ်ပတ်လည်တလျှောက် လသာဆောင်ဝန်းပတ်ထားပြီး အိပ်ခန်း ၅ ခန်းပါ ဧည့်ဂေဟာအိမ် ၁ လုံးလည်း ပါဝင်သည်။

အိုဘားမားတို့ မိသားစုသည် ယခုစံအိမ်ကို ရက်သတ္တပတ်လျှင် ဒေါ်လာ ၅၀၀၀၀ ပေးကာ ငှားရမ်းတည်းခိုခဲ့ခြင်း ဖြစ်သည်။

မကြာသေးမီက ပြန်လည်မွမ်းမံပြုပြင်မှုများ ပြုလုပ်ခဲ့ရာ ရေကူးကန်အသစ်နှင့် ရေကူးကန်ဘေးအိမ်တို့အပြင် သစ်ပင်များ စီတန်းထားသော လမ်းများ အစရှိသည်တို့ ပါဝင်သည်။

(▲ နာမည်ကျော် ဗြိတိသျှဗိသုကာပညာရှင် နော်မန်ဖော့စတာတို့ မိသားစုက ပိုင်ဆိုင်ခဲ့သည်။ ဓာတ်ပုံ-Evan Joseph Studios)

(▲ မက်ဆာချူးဆက်ပြည်နယ်တွင် တည်ရှိပြီး ပင်မစံအိမ်မှာ စတုရန်းပေ ၇၀၀၀ ကျယ်ဝန်းသည်။ ဓာတ်ပုံ-Evan Joseph Studios)

ဖော့စတာသည် လက်ရှိအားဖြင့် မန်ချက်စတာယူနိုက်တက်အသင်းအတွက် ကစားကွင်းသစ်ကြီးတစ်ခု ဒီဇိုင်းရေးဆွဲပေးနေသည်။

ယခုစံအိမ်ကို မစ္စစ္စပီပြည်နယ်မှ စုံတွဲဖြစ်သော မော်လီနှင့် William Van Devender တို့ထံမှ ဝယ်ယူခဲ့ခြင်းဖြစ်သည်။

(▲ ဧည့်ခန်း။ ဓာတ်ပုံ-Evan Joseph Studios)

(▲ အိပ်ခန်း ၅ ခန်းပါ ဧည့်ဂေဟာအိမ်တစ်လုံးလည်း ပါဝင်သည်။ ဓာတ်ပုံ-Evan Joseph Studios)

(▲ ရေကူးကန်သစ်တစ်ခုအပါအဝင် ပြန်လည်မွမ်းမံဆောက်လုပ်မှုများ မကြာသေးမီက ပြုလုပ်ထားသည်။ ဓာတ်ပုံ-Evan Joseph Studios)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Photo Credit- Evan Joseph Studios, Reuters