ပြည်ပ အိမ်ခြံမြေ သတင်း | Posted by ရွှေစင်ဝင်း
ဗြိတိန်တွင် မီးသတ်သမားများ မီးငြိမ်းသတ်နေပုံကို ကိုယ်တိုင်ကိုယ်ကျ တွေ့မြင်လိုသောကြောင့် တစ်ညတည်းဖြင့် မိမိအိမ်ကို ၂ ကြိမ် မီးရှို့ခဲ့ကြောင်း ဝန်ခံခဲ့သည့် အမျိုးသားကို တရားရုံးက ဆိုင်းငံ့ထောင်ဒဏ် ချမှတ်လိုက်သည်။
ဗြိတိန် အရှေ့မြောက်ပိုင်း စကော့တလန်နယ်စပ်ရှိ နော်သမ်ဘာလန်းခရိုင် (Northumberland) မှ ဂျိမ်းစ်ဘရောင်း (James Brown) အမည်ရှိ အသက် ၂၆ နှစ်အရွယ် အမျိုးသားမှာ မီးသတ်သမားများကို အထူးစွဲလမ်းလေးစားနေသူ ဖြစ်သည်။
မိမိ၏ စိတ်ကူးကမ္ဘာထဲတွင် မိမိမှာ မီးသတ်သမားတစ်ဦးဖြစ်ကြောင်း ဂျိမ်းစ်ဘရောင်းက ပြောသည်။
နေအိမ် fuse box တွင် မီးလောင်နေကြောင်း မီးသတ်ဌာနကို တစ်ညတည်းဖြင့် ၂ ကြိမ် ဖုန်းဆက်ခဲ့ရာ မီးသတ်သမားများ စေလွှတ်ခဲ့ရသည်။
Newcastle Crown တရားရုံး၏ ကြားနာစစ်ဆေးချက်အရ ဂျိမ်းစ်ဘရောင်းသည် မီးသတ်ဌာနသို့ တစ်နှစ်အတွင်း အကြိမ်ပေါင်း ၈၀ ဖုန်းခေါ်ဆိုခဲ့ကြောင်း ပေါ်ပေါက်ခဲ့သည်။ ဂျိမ်းစ်ဘရောင်းသည် Pyromania ဟုခေါ်သော မီးမရှို့ရ မနေနိုင်သည့် စိတ်ဝေဒနာမရှိဘဲ မီးသတ်သမားတို့ကို အလွန်လေးစားခြင်းသာ ဖြစ်သည်။
၂၀၂၃ ခုနှစ်၊ စက်တင်ဘာလ ၉ ရက်၊ ည ၈ နာရီ ၁၅ မိနစ်အချိန်တွင် ဂျိမ်းစ်ဘရောင်းက သူ၏နေအိမ်ဖြစ်သော နော်သမ်ဘာလန်းခရိုင်၊ Ashington မြို့ ၊ Eleventh Avenue လမ်းရှိ နေအိမ်တွင် မီးလောင်နေကြောင်း မီးသတ်ဌာနသို့ ဖုန်းဆက်ခဲ့သည်။
၎င်းက ပြောသည်မှာ လျှပ်စစ်မီတာမှတဆင့် မီးပွားများ ပွင့်နေကြောင်း၊ ထိုမှတဆင့် ကြောင်အိမ်သို့ မီးစွဲနေကြောင်း ပြောခဲ့သည်။
မီးသတ်သမားများ ရောက်လာပြီးနောက် မီးအနည်းငယ်လောင်နေမှုကို ငြိမ်းသတ်ပေးခဲ့ပြီး မီးကြိုးလိုင်းများ ဖြုတ်ထားခဲ့သည်။
မီးသတ်သမားများ ပြန်သွားပြီးနောက် မိနစ် ၃၀ ခန့်အကြာတွင် ဂျိမ်းစ်ဘရောင်းက မီးသတ်ဌာနသို့ ဖုန်းခေါ်ပြန်ကာ မီးလောင်နေကြောင်း ပြောပြန်သည်။
ဘရောင်းက လျှပ်စစ်မီတာမှတဆင့် မီးလောင်ခြင်းဖြစ်ကြောင်း ယခင်အတိုင်း ပြောပြန်သည်။
သို့သော် မီးသတ်သမားတို့က ပထမတစ်ကြိမ် ပြန်ထွက်သွားချိန်ကတည်းက မီးလိုင်းဖြုတ်ထားခဲ့ခြင်းဖြစ်ရာ လျှပ်စစ်မီးကြောင့် မဟုတ်ကြောင်း အထင်အရှားပေါ်ပေါက်လာသည်။
စုံစမ်းစစ်ဆေးချက်များအရ ထိုမီးမှာ ရှို့မီးဖြစ်ကြောင်း တွေ့ရှိခဲ့သည်။
တရားရုံး၏ ကြားနာစစ်ဆေးချက်အရ ဂျိမ်းစ်ဘရောင်းသည် မီးငြိမ်းသတ်နေသော မီးသတ်သမားတို့ကို ဗွီဒီယိို ရိုက်ကူးနေခဲ့သည်ဟု ဆိုသည်။
“ဒီ မီးဟာ ရှို့မီးဖြစ်တယ်လို့ ရဲတပ်ဖွဲ့က ကောက်ချက်ဆွဲထားပါတယ်” ဟု တရားသူကြီးက ပြောသည်။
“တရားခံကို ဖမ်းဆီးခဲ့ပါတယ်။ သူကို ဖမ်းတဲ့အချိန်မှာ တော်တော် ပျော်နေပါတယ်။ သူ့ကြည့်ရတာ သူ့အိမ်ထဲကို မီးသတ်တွေနဲ့ ရဲအရာရှိတွေ ရောက်လာတဲ့အပေါ် တော်တော်လေး ဝမ်းသာနေတဲ့ပုံပါပဲ”
ကံကောင်းထောက်မစွာဖြင့် မီးလောင်မှုမှာ အနည်းငယ်သာ ထိခိုက်ပျက်စီးမှု ဖြစ်ခဲ့သည်။ မီတာ မီးကြိုး လောင်ကျွမ်းမှု၊ အိပ်ရာ လိုင်နင်စ လောင်ကျွမ်းမှုနှင့် စင်တစ်ခုသို့ မီးလောင်မှုတို့သာ ဖြစ်ခဲ့သည်။
ဘရောင်းကို တရားရုံးက ဆိုင်းငံ့ထောင်ဒဏ် ၈ လနှင့် နာရီ ၁၅၀ လုပ်ခမဲ့ အလုပ်လုပ်စေရန် အမိန့်ချမှတ်ထားသည်။
တရားသူကြီး ရောဘတ်အဒမ်က ဘရောင်းအား ပြောသည်မှာ “ခင်ဗျားပြောခဲ့တာက စိတ်ကူးကမ္ဘာမှာ မီးသတ်သမားဖြစ်တယ်လို့ ဆိုတယ်။ ခင်ဗျားဟာ မီးသတ်အလုပ်ကို ကာလကြာရှည် စိတ်ဝင်စားခဲ့တယ်။ ဒါဟာ ရူးသွပ်စွဲလမ်းမှုတစ်ခုပါပဲ” ဟု ဆိုသည်။
“ခင်ဗျားအဓိက စိတ်ဝင်စားတာက မီးသတ်ဌာနကို ဆက်သွယ်ဖို့ပါ။ မီးရှို့ဖို့ မဟုတ်ဘူး။”
“ဒါပေမယ့် ခင်ဗျားဟာ မီးသတ်ဌာနရဲ့ အရင်းအမြစ်တွေကို အချည်းနှီးဖြစ်အောင် လုပ်ခဲ့တယ်။ ပိုပြီး အရေးကြီးတဲ့နေရာတွေ….အသက်အန္တရာယ်ကြုံနေသူတွေကို ကူညီဖို့ထားတဲ့ အရင်းအမြစ်တွေကို ဖြုန်းတီးခဲ့တာ ဖြစ်ပါတယ်။ ဒီဖြစ်ရပ်ကနေ သင်ခန်းစာယူနိုင်မယ်လို့ မျှော်လင့်ပါတယ်”
တရားရုံး၏ စစ်ဆေးတွေ့ရှိချက်အရ ဂျိမ်းစ်ဘရောင်းမှာ အထီးကျန် စိတ်ဝေဒနာ ခံစားနေရကြောင်း တွေ့ရှိခဲ့သည်။
ဘရောင်းသည် ယခင်က လေယာဉ်သန့်ရှင်းရေးသမားတစ်ဦးအဖြစ် လုပ်ကိုင်ခဲ့ပြီး လက်ရှိအားဖြင့် အလုပ်ရှာနေသူ ဖြစ်သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Man Obsessed with Firefighters Sets Fire to His Own Home Just to See His Idols
