ရှယ်ယာတစ်စု ကျပ် ၄၁၀၀၀ အထိ ဈေးနှုန်းမြင့်တက်ခဲ့သည့် FMI ရှယ်ယာများ ဈေးနှုန်းဆက်တိုက်ကျဆင်းမှု ဆက်လက်ဖြစ်ပေါ်နေပြီး အနိမ့်ဆုံးဈေးနှုန်းအဖြစ် ရှယ်ယာတစ်စု ကျပ် ၈၄၀၀ အထိ ပြုတ်ကျ

ရှယ်ယာတစ်စု ကျပ် ၄၁၀၀၀ အထိ မြင့်တက်ခဲ့သည့် FMI ရှယ်ယာများမှာ တစ်စုလျှင် ကျပ် ၉၀၀၀ အောက် ပြုတ်ကျနေသည့်အပြင် လက်ရှိတွင်လည်း ဈေးနှုန်းဆက်တိုက် ကျဆင်းနေပြီး ဧပြီ ၁၁ ရက်တွင် ရှယ်ယာတစ်စု ကျပ် ၈၄၀၀ အထိ ကျဆင်းကာ စတော့အိတ်ချိန်း လေးနှစ်သက်တမ်းအတွင်း အနိမ့်ဆုံးအဖြစ် စံချိန်တင်ခဲ့ကြောင်း ရန်ကုန်စတော့အိတ်ချိန်း၏ နေ့စဉ်အရောင်းအဝယ် ဖြစ်မှုများအရ သိရသည်။

FMI ၏ ရှယ်ယာဈေးနှုန်းမှာ ၂၀၁၉ ခုနှစ်အတွင်း ဆက်တိုက်ကျဆင်းနေခြင်းဖြစ်ပြီး ဇန်နဝါရီ ၁၆ ရက်နှင့် ၁၇ ရက်များတွင် ရှယ်ယာတစ်စု ကျပ် ၉၇၀၀ ဖြင့် အရောင်းအဝယ်ဖြစ်ပေါ်နေရာမှ ဇန်နဝါရီ ၁၈ ရက်တွင် ကျပ် ၉၆၀၀ သို့ ကျဆင်းပြီး ဇန်နဝါရီ ၂၁ ရက်တွင် ကျပ် ၉၅၀၀ သို့ ဆက်လက်ကျဆင်းလာသည်။ ထို့နောက် ဇန်နဝါရီ ၂၂ ရက်တွင် ကျပ် ၉၄၀၀ မှ ကျပ် ၉၁၀၀ အထိ ကျဆင်းပြီး ဇန်နဝါရီ ၂၃ ရက် နံနက်ပိုင်းတွင် ကျပ် ၉၀၀၀ သို့ ဆက်လက်ကျဆင်းကာ နေ့လယ်ပိုင်းတွင်မူ ရှယ်ယာတစ်စုကျပ် ၈၈၀၀ သို့ အနိမ့်ဆုံး ကျဆင်းလာခြင်းဖြစ်သည်။ ထို့နောက် ကျပ် ၈၈၀၀ ပတ်လည်တွင် ဈေးနှုန်းတည်ငြိမ်နေရာမှ မတ် ၅ ရက်တွင် ကျပ် ၈၇၀၀ သို့ ကျဆင်းခဲ့သည်။ ထို့နောက် မတ် ၆ ရက်တွင် ရှယ်ယာတစ်စု ကျပ် ၈၅၀၀ သို့ ကျဆင်းကာ ဧပြီ ၁၁ ရက်တွင်မူ ကျပ် ၈၄၀၀ သို့ အနိမ့်ဆုံးကျဆင်းခဲ့ခြင်း ဖြစ်သည်။

Bonus Share များ ထုတ်ဝေမှုကြောင့် အစုရှယ်ယာဈေးနှုန်းကျဆင်းမှုနှင့် ရှယ်ယာတစ်စုအပေါ် ဝင်ငွေကျဆင်းမှု ဖြစ်ပေါ်နေသည့် FMI အနေဖြင့် ၂၀၁၈ ခုနှစ် ဒီဇင်ဘာ ၁၄ ရက်တွင် သင်းဖွဲ့စည်းမျဉ်းသစ် အတည်ပြုရန် နာမည်ပြောင်းရန်နှင့် ရှယ်ယာအသစ် ထုတ်ဝေခွင့်ရှိရန် အထူးအစည်းအဝေး ခေါ်ယူမှုကို ကြေညာခဲ့ပြီးနောက် ရှယ်ယာဈေး စတင်ကျဆင်းလာခဲ့ခြင်းဖြစ်ပြီး FMI ၏ ရှယ်ယာဈေးသည် ၂၀၁၈ ခုနှစ် ဒီဇင်ဘာ ၁၄ ရက်တွင် ရှယ်ယာတစ်စု ကျပ် ၁၀၅၀၀ မှ ဒီဇင်ဘာလကုန်တွင် ကျပ် ၁၀၀၀၀ ဖြင့် အရောင်းအဝယ်ဖြစ်နေခဲ့ပြီး ၂၀၁၉ ခုနှစ် ဧပြီ ၁၁ ရက်တွင် ရှယ်ယာတစ်စု ကျပ် ၈၄၀၀ အထိ ကျဆင်းလာသည်။

ဇန်နဝါရီ ၁၂ ရက်အထူးအစည်းအဝေးတွင် FMI ကုမ္ပဏီ၏ သင်းဖွဲ့စည်းမျဉ်းသစ် အတည်ပြုရန်၊ အမည်ပြောင်းရန်နှင့် ရှယ်ယာအသစ် ထုတ်ဝေခွင့်ရှိရန် အထူးအစည်းအဝေးခေါ်ယူမှုကို အစုရှယ်ယာရှင်များက အတည်ပြုပေးပြီးနောက် ရှယ်ယာဈေး ဆက်တိုက်ကျဆင်းနေခြင်းဖြစ်ပြီး လက်ရှိတွင် FMI AIR ၏ ရှယ်ယာများ ရောင်းချမှုနှင့်အတူ ရှယ်ယာတစ်စုဝင်ငွေ ကျဆင်းမှုနှင့် အမြတ်ငွေကျဆင်းမှုများ ဖြစ်ပေါ်နေသည်။

Credit: Eleven Media Group