အမေရိကန်ပြည်တွင် အဘွားတစ်ဦးက အင်္ကျီဟောင်းများကို ပရဟိတအဖွဲ့ထံ လှူဒါန်းခဲ့ရာ အင်္ကျီအိတ်အတွင်း ဒေါ်လာ ၂ ဒသမ ၅ သန်း ထီပေါက်နေသည့် ထီလက်မှတ်ပါဝင်သွားခဲ့

ကျွန်ုပ်တို့ အများစုသည် ထီပေါက်ပါက မည်သည့်အရာများ လုပ်ဆောင်မည်ဟု အမျိုးမျိုးအဖုံဖုံ စိတ်ကူးယဉ်ကြဖူးသည်။

သို့သော် လူအများ စိတ်ကူး၍ပင် မကြည့်ဖူးသည့်အရာတစ်ခုမှာ မိမိ၏ ထီလက်မှတ်ပျောက်ဆုံးသွားပြီး ထိုလက်မှတ်က ထီဆုကြီးပေါက်နေသည်ကို သိလိုက်ရလျှင် မည်သို့ရှိမည်နည်းဟူသောဖြစ်ရပ်မျိုး ဖြစ်သည်။

အမေရိကန်ပြည်၊ ပန်ဆယ်လ်ဗေးနီးယားပြည်နယ်၊ Monroeville (မင်ရိုးဗဲလ်ဟု အသံထွက်) မြို့တွင် နေထိုင်သော မေးလ်ဒရက် ဆင်မင်နာရေးလ်လူတို (Mildred Simoneriluto) အမည်ရှိ အဘွားသည် ပရဟိတအဖွဲ့ထံ လှူခဲ့သော ဂျာကင်အင်္ကျီ၏ အိတ်ကပ်ထဲတွင် ပါသွားသော ထီလက်မှတ်ကို လိုက်လံရှာဖွေခဲ့သော်လည်း မတွေ့တော့ချေ။

ဆင်မင်နာရေးလ်လူတိုသည် ၂၀၂၄ ခုနှစ်၊ မေလအတွင်း Murrysville မြို့ရှိ ကုန်စုံဆိုင်တစ်ခုမှ ထီလက်မှတ်ဝယ်ယူခဲ့ခြင်းဖြစ်သည်။

ထီထိုးပြီး ရက်သတ္တ ၂ ပတ်အကြာတွင် သူ၏ ထီလက်မှတ်မှာ ဒေါ်လာ ၂ ဒသမ ၅ သန်း ထီပေါက်နေကြောင်း သိလိုက်သည်။

သို့သော် ထီလက်မှတ်ကို ရှာမတွေ့တော့။

အသက် ၇၆ နှစ်အရွယ်ရှိ ဆင်မင်နာရေးလ်လူတိုသည် မိမိလုပ်ဆောင်ခဲ့သည်များကို ပြန်လည်စဉ်းစား တွေးတောကြည့်သောအခါ ထီလက်မှတ်မှာ လှူဒါန်းခဲ့သော အင်္ကျီများထဲမှ ဂျာကင်တစ်ခု၏ အိတ်ကပ်ထဲတွင် ရှိနေသည်ကို သတိရလာသည်။

အဘွားက ဗီယက်နမ်စစ်ပြန် အမေရိကန်စစ်မှုထမ်းဟောင်းများအဖွဲ့ (VVA) ကို အဝတ်များ လှူဒါန်းခဲ့ခြင်းဖြစ်ကြောင်း WTAE က ဖော်ပြသည်။

VVA သည် အမေရိကန်ပြည်တွင်းတွင်သာမက နိုင်ငံတကာသို့ပါ လှူဒါန်းမှုများ လုပ်ဆောင်နေသောအဖွဲ့ ဖြစ်သည်။

“ကျွန်မ တုန်လှုပ်ဆွံ့အ သွားပါတယ်။ ပြောစရာ စကားလုံးတောင် ရှာမတွေ့ဘူး” ဟု ၎င်းက WTAE သတင်းဌာနသို့ ပြောသည်။

“အဲဒီလက်မှတ်ကို ဘယ်လို ပြန်ရနိုင်မလဲ”

ဆင်မင်နာရေးလ်လူတိုသည် သူ၏ ထီဂဏန်းကို မှတ်မိနေပြီး 14, 22, 33, 35, 38 ဖြစ်သည်။

၎င်းအား ထီဌာနက အကြောင်းကြားခဲ့သည်မှာ ထီလက်မှတ်၏ တစ်နှစ်သက်တမ်း မကုန်ဆုံးမီ ၂၀၂၅ ခုနှစ်၊ မေလ ၈ ရက် မတိုင်မီ ထုတ်ယူရန် အသိပေးခဲ့သည်ဟု ဆိုသည်။

ပန်ဆယ်လ်ဗေးနီးယား ထီဌာနသို့ သူ၏ ဖြစ်ရပ်ကို တင်ပြခဲ့သော်လည်း ထီဌာနမှ အကြီးအကဲတို့က ဆုငွေ ထုတ်ယူနိုင်ရန် ထီလက်မှတ်ရှိရမည်ဖြစ်ကြောင်းသာ ပြောကြားခဲ့သည်။

ဆင်မင်နာရေးလ်လူတိုက သူ၏ဖြစ်ရပ်ကို လူအများသိစေရန် ထုတ်ဖော်ပြောကြားခြင်းမှာ အကယ်၍ အဆိုပါ ထီလက်မှတ်ကို တစုံတယောက်တွေ့ရှိပါက ပြန်ပေးနိုင်ရန် ရည်ရွယ်ချက်ဖြင့် ဖြစ်သည်။

အကယ်၍ တစုံတယောက်က ထီလက်မှတ်ကို တွေ့ရှိပြီး ဆုငွေ ထုတ်ယူပါကလည်း ဒေါ်လာ ၂ ဒသမ ၅ သန်းကို တရားဝင်ပိုင်ဆိုင်ခွင့်ရမည်သာ ဖြစ်သည်။

သို့သော် မေလ ၈ ရက်အထိ ဆုငွေထုတ်ယူသူ မရှိသောကြောင့် အဆိုပါထီလက်မှတ်မှာ သက်တမ်းကုန်ဆုံးသွားခဲ့ပြီ ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Elderly woman donates coat with winning $2.5M-lottery ticket in pocket