ဟောင်ကောင် developer များဖြစ်ကြသော Henderson Land နှင့် Lai Sun တို့က ဟောင်ကောင်ရှိ ဈေးဝယ်စင်တာကြီးကို ဒေါ်လာ ၄ ဒသမ ၁ ဘီလီယံဖြင့် ရောင်းချ

ဟောင်ကောင် developer များဖြစ်ကြသော Henderson Land နှင့် Lai Sun တို့သည် ဟောင်ကောင်မှ အော့ဗ်ဇာဗေထရီလမ်း၊ အမှတ် ၈ ရှိ ဈေးဝယ်စင်တာ အဆောက်အအုံကြီးကို ဟောင်ကောင်ဒေါ်လာ ၄ ဒသမ ၁ ဘီလီယံ (ကန်ဒေါ်လာ ၅၂၂ သန်း) ဖြင့် ရောင်းချရန် ဝယ်လက်နှင့် သဘောတူညီချက်ရလိုက်ပြီဖြစ်ကြောင်း ရှန်ဟိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

၁၈ ထပ်ရှိသော အဆိုပါအဆောက်အအုံကြီးကို ဝယ်ယူရန် ဟောင်ကောင်ရင်းနှီးမြှုပ်နှံသူများ စုပေါင်းထားသည့် အဖွဲ့တစ်ခုနှင့် ဆွေးနွေးခဲ့ကြခြင်းဖြစ်ပြီး ဟောင်ကောင်တွင် ကူးသန်းရောင်းဝယ်ရေးဆိုင်ရာ အဆောက်အအုံနေရာများ ဝယ်လိုအားမြင့်တက်နေမှုကို ပြသနေသည်။

Henderson နှင့် Lai Sun တို့ကမူ ယခုအရောင်းအဝယ်ကို အတည်ပြုမှတ်ချက်ပေးခြင်းမရှိသေးသော်လည်း ဒေသတွင်း သတင်းမီဒီယာတို့တွင်မူ ဟောင်ကောင်ဒေါ်လာ ၄ ဘီလီယံဖြင့် အရောင်းအဝယ်ပြုလုပ်ရန် သဘောတူညီခဲ့ကြောင်း ဖော်ပြကြသည်။

ဘီလျံနာ လီရှောက်ကီ၏ Henderson သည် အဆိုပါအဆောက်အအုံကြီးကို Lai Sun နှင့် ၅၀/၅၀ အချိုးဖြင့် ပူးတွဲအကောင်အထည်ဖော် ဆောက်လုပ်ခဲ့ခြင်း ဖြစ်သည်။

စတုရန်းပေ ၁၈၃၀၀၀ (စတုရန်းမီတာ ၁၇၀၀၀) ကျယ်ဝန်းကာ ဂျင်ဇာ ဗိသုကာဟန်ဖြင့် ဆောက်လုပ်ထားသည့် ယင်းအဆောက်အအုံကြီးမှာ မူလက အဆောက်အအုံငယ်နေရာများစွာဖြစ်ပြီး Henderson က ဝယ်ယူကာ ဈေးဝယ်စင်တာကြီးအဖြစ် အကောင်အထည်ဖော်လိုက်ခြင်း ဖြစ်သည်။

၂၀၁၅ ခုနှစ်အတွင်း အပြီးသတ်ဆောက်လုပ်ခဲ့ခြင်းဖြစ်ရာ ဆောက်လုပ်ပြီးစီးသည်မှာ ၂ နှစ်ခန့်သာ ရှိသေးသည်။
Tsim Sha Tsui East ရထားဘူတာသို့ လမ်းလျှောက်သွားလျှင် ၅ မိနစ်ခရီးသာဝေးကွာသည်။

အဆောက်အအုံ၏ အောက်ထပ်များတွင် အစားအသောက်နှင့် အဖျော်ယမကာဆိုင်များဖွင့်လှစ်ထားပြီး အပေါ်ထပ်များတွင် ရုံးခန်းများ ဖွင့်လှစ်ထားလျက်ရှိသည်။

အဆောက်အအုံကြီး၏ ဝက်ဘ်ဆိုက်တွင် ဖော်ပြထားချက်အရ ၇ လွှာမြောက် floor တစ်ခုလုံးကို ငှားရမ်းရန်ရှိနေပြီး တစ်လတာ ငှားရမ်းခအဖြစ် စတုရန်းတစ်ပေလျှင် ဟောင်ကောင်ဒေါ်လာ ၄၅ ဒေါ်လာ ဈေးနှုန်းသတ်မှတ်ထားသည်။

လက်ရှိ ငှားရမ်းထားသူများ ပေးဆောင်ရသည့်နှုန်းထားမှာမူ ပျှမ်းမျှအားဖြင့် စတုရန်းတစ်ပေလျှင် ဟောင်ကောင်ဒေါ်လာ ၅၀ ကျသင့်သည်ဟု ဆိုသည်။

Lai Sun ၏ နှစ်ပတ်လည်အစီရင်ခံစာတွင် ဖော်ပြထားရာတွင် ယင်းအဆောက်အအုံကြီးမှာ အပြည့်အဝ အငှားချထားပြီးဖြစ်ပြီး ၂၀၁၆-၁၇ ဘဏ္ဍာနှစ်တွင် ကုမ္ပဏီ၏ ၅၀ ရာခိုင်နှုန်း ရင်းနှီးမြှုပ်နှံထားမှုမှ ငှားရမ်းခအဖြစ် ဟောင်ကောင်ဒေါ်လာ ၅၅ သန်း ရရှိခဲ့ကြောင်း ဖော်ပြထားသည်။

ယခုအရောင်းအဝယ်ဖြစ်ခဲ့သည့် ဈေးနှုန်းအရ စတုရန်းတစ်ပေလျှင် ဟောင်ကောင်ဒေါ်လာ ၂၂၄၀၀ ခန့် ကျသင့်နေသည်ကို တွေ့ရသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)