ဘရွတ်ကလင်း ဘက်ခမ်း (ဒေးဗစ်ဘက်ခမ်း၏ သား) နှင့် နီကိုလာ ပက်ဇ်တို့စုံတွဲက ၎င်းတို့၏အိမ်ကို အရှုံးခံရောင်းချကာ ဘီဗာလီဟေးလ်မှ စံအိမ်ကို ကန်ဒေါ်လာ ၁၆ သန်းဖြင့် ဝယ်ယူ

ဒေးဗစ်ဘက်ခမ်း၏ သားကြီး ဘရွတ်ကလင်းဘက်ခမ်းနှင့် ဇနီးဖြစ်သူ နီကိုလာ ပက်ဇ် ဘက်ခမ်းတို့ ဇနီးမောင်နှံသည် ၎င်းတို့ ကာလကြာရှည် စိတ်ကူးအိပ်မက်ခဲ့သော မိသားစုအိမ်အဖြစ် ကယ်လီဖိုးနီးယား ပြည်နယ်၊ လော့စ်အိန်ဂျလိမြို့၊ ဘီဗာလီဟေးလ်အရပ်မှ ဒေါ်လာ ၁၆ သန်းတန် စံအိမ်ကို တွေ့ရှိခဲ့ကြသည်။

ဘရွတ်ကလင်းတို့ စုံတွဲသည် အဆိုပါအိမ်ကို ပြီးခဲ့သော ၂၀၂၄ ခုနှစ်၊ ဒီဇင်ဘာလကတည်းက တိတ်တဆိတ် ဝယ်ယူခဲ့ခြင်းဖြစ်ကြောင်း ယခုအခါတွင်မှ ပေါ်ပေါက်လာခြင်း ဖြစ်သည်။

Beverly Hills အရပ်၊ Trousdale Estates အိမ်ရာဝန်းအတွင်းတွင် တည်ရှိပြီး ဘက်ခမ်းမိသားစု၏ မိတ်ဆွေကြီး အဆိုတော် အယ်လ်တန်ဂျွန်၏ စံအိမ်မှ ခဲတစ်ပစ်စာသာ ကွာဝေးကြောင်း The Sun သတင်းဌာနက ဖော်ပြသည်။

အိမ်ခြံမြေမှတ်တမ်းများအရ ၂၀၂၄ နှစ်ကုန်ပိုင်းတွင် LLC တစ်ခုမှတဆင့် အရောင်းအဝယ်ဖြစ်ခဲ့ခြင်းဖြစ်ကြောင်း ပြသနေသည်။

နီကိုလာနှင့် နီးစပ်သော သတင်းရင်းမြစ်တို့က Realtor အိမ်ခြံမြေသတင်းဌာနသို့ ပြောကြားချက်အရ မိသားစု အိမ်တစ်လုံးကို ကာလကြာရှည် ရှာဖွေခဲ့ပြီးနောက် ယခုအိမ်ကို တွေ့ရှိခဲ့ခြင်းဖြစ်သည်ဟု ဆိုသည်။

“သူတို့ အိမ်ရှာနေတာ တော်တော်ကြာပါပြီ။ ဒီနေရာကို မြင်လိုက်ချိန်မှာပဲ သူတို့ သဘောကျသွားခဲ့ကြတယ်။ သူတို့ အဲဒီမှာ ဘဝဖြတ်သန်းဖို့ စီစဉ်နေပါတယ်” ဟု အတွင်းလူတစ်ဦးက ပြောသည်။

ဘရွတ်ကလင်း၏ ဇနီး နီကိုလာ၏ ဖခင်မှာ ဘီလျံနာ သူဌေးကြီး ဖြစ်သည်။

အသက် ၂၆ နှစ်အရွယ်ရှိ ဘရွတ်ကလင်းနှင့် အသက် ၃၀ အရွယ် နီကိုလာတို့ ဝယ်ယူလိုက်သော အိမ်တွင် အိပ်ခန်း ၄ ခန်းနှင့် ရေချိုးခန်း ၆ ခန်းပါဝင်သည်။

မူလက အဆိုပါစံအိမ်ကို ဈေးခေါ်ထားသည်မှာ ကန်ဒေါ်လာ ၁၉ သန်းနီးပါး ဖြစ်သည်။

(ဘရွတ်ကလင်း ဘက်ခမ်းတို့ စုံတွဲက ယခုစံအိမ်ကို ကန်ဒေါ်လာ ၁၆ သန်းဖြင့် ဝယ်ယူလိုက်ခြင်း ဖြစ်သည်။ ဓာတ်ပုံ-Steve Granitz/Getty Images)

စိတ်ဝင်စားဖွယ်ကောင်းသည်မှာ ယခုဝယ်လိုက်သော စံအိမ်သည် ၎င်းတို့၏ ယခင်အိမ်နှင့် ၅ မိနစ်ခရီးသာ ဝေးကွာခြင်း ဖြစ်သည်။

ယခင်အိမ်ကို ၂၀၂၁ ခုနှစ်တွင်း ဝယ်ယူခဲ့ရာတွင် ကန်ဒေါ်လာ ၁၀ ဒသမ ၅ သန်း ပေးခဲ့ရသည်။

ယင်းနောက် ၈ လအကြာတွင် ကန်ဒေါ်လာ ၉ ဒသမ ၂၅ သန်းဖြင့် အရှုံးခံ ရောင်းချခဲ့သည်။

နေအိမ်ကို ရောင်းချရန် ဆုံးဖြတ်ခဲ့ရခြင်းမှာ ဖလော်ရီဒါတွင် နေထိုင်ရန် ရည်ရွယ်ခဲ့သောကြောင့်ဖြစ်ကြောင်း နီကိုလာက ပြောပြသည်။

ဖလော်ရီဒါတွင် နီကိုလာ၏ ဖခင်ကြီး အခြေစိုက် နေထိုင်သည့်အပြင် ဘရွတ်ကလင်း၏ ဖခင် ဒေးဗစ်ဘက်ခမ်းကလည်း Inter Miami CF ၏ ပူးတွဲပိုင်ရှင်အဖြစ် ဖလော်ရီဒါတွင် ရှိနေသည်။

( ဘရွတ်ကလင်းတို့ စုံတွဲက ၂၀၂၄ ခုနှစ်၊ ဒီဇင်ဘာလအတွင်း ဝယ်ယူခဲ့ခြင်း ဖြစ်သည်။ ဓာတ်ပုံ- nicolaannepeltzbeckham/ Instagram)

(ဘရွတ်ကလင်းတို့ စုံတွဲသည် ယခုဒေသတွင်ပင် ကန်ဒေါ်လာ ၁၀ ဒသမ ၅ သန်းတန် စံအိမ်ကို ပိုင်ဆိုင်ခဲ့ပြီးနောက် ၂၀၂၂ ခုနှစ်တွင် အရှုံးခံ ရောင်းချခဲ့သည်။ ဓာတ်ပုံ- Realtor)

အိမ်ခြံမြေမှတ်တမ်းများအရ ဘရွတ်ကလင်းတို့ စုံတွဲက ယခုအိမ်ကို ၁၅ နှစ်အရစ်ကျဖြင့် ဝယ်ယူခဲ့ခြင်း ဖြစ်ကြောင်း ဖော်ပြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Brooklyn and Nicola Peltz Beckham Snap Up $16 Million Beverly Hills Mansion—After Taking Major Loss on ‘Silly’ Former Home Photo Credit-Realtor, nicolaannepeltzbeckham/ Instagram, Steve Granitz/Getty Images