ရုရှားတွင် အသက် ၈၀ အရွယ် အဘွားတစ်ဦး ၆ ထပ်တိုက် ဝရန်တာမှ အောက်တွင် ရပ်နားထားသော ကားပေါ်သို့ ပြုတ်ကျခဲ့သော်လည်း ထိခိုက်ပွန်းပဲ့မှုမရှိဘဲ လူးလဲထကာ ပွတ်သပ်ဖုန်ခါပြီး ထွက်သွားသည့် အံ့ဖွယ်ဖြစ်ရပ်

ရုရှားနိုင်ငံ ယူရယ်လ်တောင်တန်း၏ အရှေ့ဘက် ရီကာချရင်းဘာ့ဂျ် (Yekaterinburg) မြို့တွင် နေထိုင်သော အသက် ၈၀ အရွယ် အဘွားတစ်ဦးသည် ၆ လွှာတိုက်ခန်းရှိ ပြတင်းမှ အောက်တွင် ရပ်နားထားသည့် ကားအမိုးပေါ်သို့ ပြုတ်ကျခဲ့သော်လည်း ထိခိုက်ပွန်းပဲ့ခြင်း မရှိခဲ့သည့်ဖြစ်ရပ်မှာ သတင်းကြီးနေသည်။

မကြာသေးမီ ကာလက ဖြစ်ပွားခဲ့သောဖြစ်ရပ်ဖြစ်သည်။

အမည်မသိရသော အသက် ၈၀ အရွယ်အဘွားသည် သူ၏တိုက်ခန်းမှ ပြတင်းများကို သန့်ရှင်းရေး ပြုလုပ်နေစဉ် ဖြစ်ပွားခဲ့ခြင်း ဖြစ်သည်။

ပြတင်းများကို သန့်ရှင်းရေးလုပ်နေစဉ် သတိတစ်ချက်လွတ်သွားခဲ့ရာမှ အောက်တွင် ရပ်နားထားသော အိမ်နီးချင်းတစ်ဦး၏ ကားအမိုးပေါ်သို့ ပြုတ်ကျသွားခဲ့သည်။

ထိုဖြစ်ရပ်ကို CCTV ကင်မရာမှတ်တမ်းများတွင် ပြန်လည်တွေ့ရှိခဲ့ခြင်း ဖြစ်သည်။

CCTV မှတ်တမ်းဗွီဒီယိုဖိုင်များမှာ ရုရှားလူမှုကွန်ရက်သုံးစွဲသူများအကြား ပျံ့နှံ့နေသည်။

အံ့ဖွယ်ကောင်းသည်မှာ အသက် ၈၀ အရွယ်အဘွားသည် ကားအမိုးပေါ်သို့ ကျပြီးနောက် ချက်ချင်းပင် လူးလဲထကာ ကားအောက်သို့ ဆင်းပြီး လမ်းလျှောက်ထွက်သွားခဲ့သည်။

ထိခိုက်ပွန်းပဲ့မှု မရှိကြောင်း ယူဆရသည်။

(▲ ၆ လွှာတိုက်ခန်းမှ အသက် ၈၀ အရွယ် အဘွားတစ်ဦး အောက်တွင် ရပ်နားထားသော ကားပေါ်သို့ ပြုတ်ကျခဲ့ပုံ)

(▲ CCTV မှတ်တမ်းများအရ အသက် ၈၀ အရွယ် ကားအမိုးပေါ်သို့ ပြုတ်ခဲ့သည့် အခိုက်အတန့်)

(▲ ရီကာချရင်းဘာ့ဂျ်မြို့တွင် နေထိုင်သော အဘွားသည် ပြတင်းပေါက်မှန်များကို သန့်ရှင်းရေး ပြုလုပ်နေစဉ် ပြုတ်ကျခဲ့ခြင်း ဖြစ်သည်)

(▲ ကားအမိုး ခွက်ဝင်သွားခဲ့ပြီး လေကာမှန်လည်း ကွဲသွားသည်)

(▲ ကားက ကူရှင်သဖွယ် ခံထားပေးကာ အဘွား၏ အသက်ကို ကယ်တင်လိုက်ခြင်းဖြစ်သည်ဟု ယူဆရသည်)

ကြိုတင်ကာကွယ်မှု ပြုလုပ်သည့်အနေဖြင့် အဘွားကို ဆေးစစ်ရန် ဆေးရုံတစ်ခုသို့ ပို့ပေးခဲ့သည်။

ရုရှားသတင်းမီဒီယာတစ်ခုဖြစ်သော E1RU သတင်းဌာနကလည်း အဘွားမှာ ခြေချော်လက်ချော်ဖြစ်ကာ အောက်သို့ ပြုတ်ကျခဲ့ကြောင်း ဖော်ပြသည်။

ယခုဖြစ်ရပ်တွင် သံသယဖြစ်ဖွယ် မသမာမှုများ မရှိခဲ့ကြောင်း ရဲတပ်ဖွဲ့က အတည်ပြုသည်။

၆ လွှာမှ ပြုတ်ကျသော်လည်း အသက်မသေသည့်အပြင် ထိခိုက်ပွန်းပဲ့မှုပင် မရှိခြင်း၊ အထူးသဖြင့် သူ၏ အသက်အရွယ်ဖြင့် ယခုကဲ့သို့ အကြမ်းအတမ်းခံနိုင်ခြင်းမှာ အံ့ဖွယ်ဖြစ်နေသည်။

ဓာတ်ပုံများအရ ကားမှာ အမိုးကျွံဝင်သွားခြင်းအပြင် ကြီးမားသည့် ထိခိုက်ပျက်စီးမှုများ ဖြစ်ပေါ်ခဲ့သည်ကို တွေ့ရသည်။

“ကျွန်မရဲ့ ကားပေါ် သူပြုတ်ကျသွားတာကို ပြတင်းပေါက်ကနေ လှမ်းမြင်ရပါတယ်။

သူက ၆ လွှာမှာနေတဲ့ အိမ်နီးချင်းတစ်ယောက်ဖြစ်ပါတယ်” ဟု ကားပိုင်ရှင်က ရုရှားသတင်းထောက်များကို ပြောသည်။

“စုံစမ်းစစ်ဆေးနေချိန်ကာလအတွင်း ကနဦး ကောက်ချက်ဆွဲတာက ဒီ အဘွားဟာ ခြေချော်လက်ချော်ဖြစ်ပြီး ပြတင်းပေါက်ကနေ ပြုတ်ကျတာဖြစ်ပါတယ်” ဟု ရဲတပ်ဖွဲ့ ပြောရေးဆိုခွင့်ရ ပုဂ္ဂိုလ်က ပြောသည်။

“သူ့ကို ဆေးရုံပို့ပေးပြီး လိုအပ်တဲ့ စောင့်ရှောက်မှုတွေ ပေးခဲ့ပါတယ်။ ရဲတပ်ဖွဲ့အနေနဲ့ ဒီဖြစ်ရပ်ကို စုံစမ်းစစ်ဆေးနေဆဲပါ”

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Moment woman, 80, falls on to car from sixth floor apartment but walks away unscathed