အသက် ၉၆ နှစ်အရွယ်ရောက်မှ ဘွဲ့ရတဲ့ ဂင်းနက်စ် စံချိန်တင် ဂျပန်အဘိုးအို

ဂင်းနက်စ် ကမ္ဘာ့စံချိန်မှတ်တမ်းမှာ ဂျပန်နိုင်ငံက အသက် ၉၆ နှစ်အရွယ် အဘိုးအိုဟာ ကမ္ဘာ့အသက်အကြီးဆုံး တက္ကသိုလ်ဘွဲ့ရအဖြစ် ကမ္ဘာ့စံချိန်တင်ခဲ့ဖူးပါတယ်။

ဒီစံချိန်ကို လွန်ခဲ့တဲ့ ၁၀ နှစ်နီးပါးက မှတ်တမ်းတင်ခဲ့တာဖြစ်ပြီး အခုချိန်ထိ စံချိန်ဖြတ်ကျော်နိုင်သူ မရှိသေးပါဘူး။

အဘိုးက ကြွေထည် အနုပညာနဲ့ ပတ်သက်ပြီး ဘွဲ့ရခဲ့တာပါ။

ဂင်းနက်စ်စံချိန်တင်ခဲ့တဲ့ အဘိုးရဲ့နာမည်က ရှိဂဲ့မြိ ဟီရားတား (Shigemi Hirata) လို့ခေါ်ပါတယ်။

သူဟာ ကျိုတို အနုပညာနဲ့ ဒီဇိုင်းတက္ကသိုလ်ကနေ ဘီအေဘွဲ့ရခဲ့ပြီး လပိုုင်းအကြာမှာပဲ ဂင်းနက်စ်စံချိန်မှတ်တမ်းမှာ ဖော်ပြခံခဲ့ရတာပါ။

ဟီရားတားကို ၁၉၁၉ ခုနှစ်မှာ ဟီရိုရှီးမားမြို့က ယာတောတစ်ခုမှာ မွေးဖွားပါတယ်။ သူမွေးတဲ့နှစ်က မဟာမိတ်တွေနဲ့ ဂျာမနီနိုင်ငံအကြား ဗာဆိုင်းစာချုပ် ချုပ်ဆိုခဲ့ကြတဲ့နှစ်ပါ။

အဘိုး ဟီရားတားက ကျောင်းမှာ ဆယ်လီတစ်ယောက်လိုပဲ နာမည်ကြီး လူသိများခဲ့ပါတယ်။

“ကျောင်းသားလေးတွေ အများကြီးလာပြီး နှုတ်ဆက်ကြပါတယ်။ သူတို့နာမည်တွေတော့ မသိပါဘူး။ ဒါက အဘိုးကို ခွန်အားတွေ အများကြီးရစေပါတယ်” လို့ အဘိုး ဟီရားတားက ယိုမီယူရီသတင်းစာသို့ ပြောခဲ့ဖူးပါတယ်။

အဘိုး ဟီရားတားဟာ အငြိမ်းစားဘဝရောက်ခဲ့ပြီးနောက်ပိုင်း အိုးလုပ်တဲ့ဘက်မှာ ပျော်မွေ့ခဲ့ပြီး ကြွေထည်အနုပညာအထူးပြုနဲ့ ဘွဲ့ရဖို့ ၁၁ နှစ်လောက် ကြိုးစားခဲ့ရပါတယ်။ ဒီလို ကြိုးစားခဲ့တာဟာ ကမ္ဘာ့စံချိန်တွေ တင်နိုင်ဖို့ ရည်ရွယ်ခဲ့တာ မဟုတ်ဘူးလို့ အဘိုး ဟီရားတားက ပြောတယ်။

“အဘိုးရဲ့ ရည်မှန်းချက်က အသက် ၁၀၀ အထိ အသက်ရှည်ဖို့ပါ။ ကျန်းမာရေးကောင်းနေမယ်ဆိုရင် တက္ကသိုလ်ကနေ ဘွဲ့ရတာထက် ပျော်စရာကောင်းမှာပါ”

“အဘိုး သိပ်ဝမ်းသာပါတယ်။ အဘိုးရဲ့ အသက်အရွယ်မှာ အကြောင်းအရာသစ်တွေ လေ့လာနိုင်နေသေးတာ ဝမ်းသာဖို့ကောင်းပါတယ်”

အဘိုး ဟီရားတားဟာ ဒုတိယကမ္ဘာစစ်ကြီးအတွင်း ရေတပ်မှာ တာဝန်ထမ်းဆောင်ခဲ့ပြီး မြစ် ၄ ဦး ရှိပါတယ်။

ဂျပန်မှာ အသက်ရှည် ကျန်းမာသူတွေ ပိုမိုများပြားလာနေပြီး အဘိုးဟီရားတားလို စံချိန်တင်နိုင်သူတွေ ပေါ်ပေါက်လာနေတယ်။

“နာဂါးအိုးက မီယေကို” ဆိုတဲ့ အသက် ၁၀၀ အရွယ် အဘွားအိုတစ်ဦးကလည်း မီတာ ၁၅၀၀ အလွတ်ကူး ရေကူးပြိုင်ပွဲမှာ ဝင်ရောက်ယှဉ်ပြိုင်ခဲ့ပြီး ကမ္ဘာ့ပထမဆုံး အသက် ၁၀၀ ပြိုင်ပွဲဝင်အဖြစ် စံချိန်တင်ထားပါသေးတယ်။

“ဟီဒေးကိရှိ မီယဇကိ” ဆိုတဲ့ အသက် ၁၀၅ နှစ်အရွယ် အဘိုးတစ်ဦးဆိုရင် ဂျပန်မှာ “ဂိုးလ်ဒင်းဘို့”လို့ နာမည်ကြီးတယ်။ (ဘို့…ဆိုတဲ့ နာမည်က ဂျမေကာ တာတိုအပြေးသမား အူစိန်ဘို့ကို ရည်ညွှန်းတာပါ။)

မီယဇကိဟာ မီတာ ၁၀၀ ကို ၄၂ ဒသမ ၂၂ စက္ကန့်အတွင်းမှာ ပန်းဝင်နိုင်ခဲ့တာပါ။

၂၀၁၅ ခုနှစ်တုန်းက ဂျပန်မှာ အသက် ၁၀၀ အရွယ်ရှိသူ ၅၉၀၀၀ လောက်ရှိပြီး ၂၀၂၄ ခုနှစ်မှာတော့ အသက် ၁၀၀ အရွယ် ၉၅၀၀၀ ဦးအထိ တိုးတက်လာပါတယ်။

ဒီစာရင်းမှာ ၈၃၉၅၈ ဦးက အမျိုးသမီးတွေဖြစ်ပြီး ၁၁၁၆၁ ဦးက အမျိုးသားတွေ ဖြစ်တယ်လို့ ဂျပန်ကျန်းမာရေးဝန်ကြီးဌာနက ထုတ်ပြန်တဲ့ အချက်အလက်တွေအရ သိရပါတယ်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Japanese man, 96, becomes world's oldest college graduate  (9news)