တရုတ်ပြည်တွင် အမျိုးသားတစ်ဦးက အလုပ်နှင့် အိမ်ထောင်ရေးမှာ အဓိပ္ပာယ်မရှိဟု ယူဆကာ ယွမ် ၁၀၀၀၀ (ဒေါ်လာ ၁၄၀၀) ရသောအလုပ်မှ နှုတ်ထွက်ကာ်လှိုဏ်ဂူတစ်ခုထဲတွင် နေထိုင်လျက်ရှိပုံ

တရုတ်ပြည်၊ စီချွမ်ပြည်နယ်တွင်နေထိုင်သော မင်ဟန်းထိုင် အမည်ရှိ အသက် ၃၅ နှစ်အရွယ် အငှားယာဉ်မောင်းအမျိုးသားသည် လစဉ်ဝင်ငွေ ယွမ် ၁၀၀၀၀ (ဒေါ်လာ ၁၄၀၀) ရသော အလုပ်နှင့် မြို့ပြလူနေမှုဘဝကို ၂၀၂၁ ခုနှစ် နှစ်ကုန်ပိုင်းတွင် ကျောခိုင်းခဲ့သည်။

မင်ဟန်းထိုင်ဟူသော သူ၏အမည်မှာ ဥစ္စာဓန ပေါကြွယ်ဝသူဟု အဓိပ္ပာယ်ရှိသည်။

မင် လက်ရှိနေထိုင်နေသည်မှာ သူ၏ဇာတိမြို့မှ လှိုဏ်ဂူတစ်ခုတွင် ဖြစ်သည်။

ယခုအခါ မင်က စာဖတ်ခြင်း၊ ဟင်းသီးဟင်းရွက်များ စိုက်ပျိုးခြင်း၊ အရေးမပါသည့် ကိစ္စများဖြင့် အချိန်ကုန်နေသော လူ့ဘဝအပေါ် လေးလေးနက်နက် ဆင်ခြင်သုံးသပ်ခြင်းတို့ဖြင့် တစ်နေ့တာကို ဖြတ်သန်းနေသည်။

(▲ မင်သည် ၂၀၂၁ ခုနှစ် နှစ်ကုန်ပိုင်းတွင် တစ်လလျှင် ဒေါ်လာ ၁၄၀၀ ခန့်ရနေသော အငှားယာဉ်မောင်း အလုပ်ကို ကျောခိုင်းကာ ဇာတိမြေသို့ ပြန်ခဲ့ပြီး လူသူဝေးရာ ဘဝတွင် နေထိုင်ဖြတ်သန်းနေသည်။ ဓာတ်ပုံ-QQ.com)

အလုပ်များ လုပ်နေရသည်မှာ အဓိပ္ပာယ်ကင်းမဲ့လှသည်ကို တွေ့ရှိခဲ့ပြီးနောက် စွဲလမ်းမှုတဏှာကို ပယ်သတ်ရန် ကြိုးစားနေခြင်း ဖြစ်သည်။

မင်သည် ဆွေမျိုးများထံ တင်ရှိနေသော ကြွေးမြီများ ပေးဆပ်ရန်အတွက် ယခင်က တစ်ရက်လျှင် ၁၀ နာရီခန့် အလုပ်လုပ်ခဲ့သည်။

ယနေ့တိုင် ဘဏ်နှင့် ငွေချေးကုမ္ပဏီများတွင် ယွမ် ၃၀၀,၀၀၀ (ဒေါ်လာ ၄၂,၀၀၀) အကြွေးတင်နေဆဲ ဖြစ်ကြောင်း မင်က ပြောသည်။

အဆိုပါ အကြွေးများ ပြန်ဆပ်ရန် မျှော်လင့်ချက်ကို မင်က လက်လျှော့လိုက်ပြီဖြစ်သည်။

မိမိ၏ ဆွေမျိုးများက မိမိ၏ ပိုင်ဆိုင်မှုများကို ရောင်းချခဲ့ကြကြောင်း၊ ရရှိငွေများဖြင့် ကြွေးကျန်များကို ပေးဆပ်နိုင်မည်ဖြစ်ကြောင်း မင်က ပြောသည်။

မင်က ရွာရှိ သူ၏မြေကွက်ကို အခြားရွာသားတစ်ဦး၏ မြေနေရာနှင့် လဲလှယ်လိုက်သည်။

ထိုသူ၏ မြေကွက်မှာ မင်၏ မြေကွက်အောက် ၄ ပုံ ၁ ပုံသာ ကျယ်ဝန်းသည်။ သို့သော် မင်နေထိုင်သည့် လှိုဏ်ဂူဘေးတွင် တည်ရှိသောကြောင့် မင်က ထိုမြေကွက်တွင် စားပင်သောက်ပင်များ စိုက်ပျိုးနိုင်မည် ဖြစ်သည်။

(▲ မင်က စာဖတ်ခြင်း၊ လှိုဏ်ဂူအနီး လမ်းလျှောက်ခြင်းတို့ဖြင့် တနေ့တာကို ကုန်လွန်ဖြတ်သန်းသည်။ ဓာတ်ပုံ-QQ.com)

မင်သည် စတုရန်းမီတာ ၅၀ ကျယ်ဝန်းသော လှိုဏ်ဂူထဲတွင် လူနေထိုင်၍ ရစေရန် ယွမ် ၄၀,၀၀၀ (ဒေါ်လာ ၆,၀၀၀) ခန့် သုံးစွဲကာ မွမ်းမံပြင်ဆင်မှုများ ပြုလုပ်ခဲ့သည်။

နေ့စဉ် မနက် ၈ နာရီတွင် အိပ်ရာထသည်။

ယင်းနောက် စာဖတ်ခြင်း၊ လမ်းလျှောက်ခြင်း၊ စိုက်ခင်းတွင် ရေလောင်းပေါင်းသင်ခြင်းများ ပြုလုပ်သည်။

ည ၁၀ နာရီတွင် အိပ်ရာဝင်သည်။ မင်က ၎င်းစိုက်ပျိုးထားသည့် ဟင်းသီးဟင်းရွက်တို့ကိုသာ အဓိကစားသုံးသည်။

ယခုကဲ့သို့ နေထိုင်ဖြတ်သန်းနေသည့်ဘဝမှာ မြို့တွင် အလုပ်လုပ်နေစဉ်က အမြဲစိတ်ကူးအိပ်မက်ခဲ့သည့် ဘဝဖြစ်ကြောင်း မင်က ပြောသည်။

သူ၏ နေထိုင်ဖြတ်သန်းမှုနှင့် ပတ်သက်၍ မင်က လူမှုကွန်ရက်တွင် ရေးသားဖော်ပြလေ့ရှိသည်။

မင်သည် လူမှုကွန်ရက်တွင် follower ၄၀,၀၀၀ ခန့်ရှိရာ live-streaming မှလည်း ဝင်ငွေရသည်။

မင်က သူ၏လှိုဏ်ဂူကို တွင်းနက်ကြီးဟု အမည်ပေးထားပြီး မိမိ၏လှိုဏ်ဂူမှာ မိမိ၏ စကြာဝဠာဖြစ်သည်ဟု ဆိုသည်။

လူ့ဘဝ၏ အရေးမပါသော ကိစ္စများကို မိမိကိုယ်မိမိ သတိပေးလိုခြင်းဖြစ်ကြောင်း မင်က ပြောသည်။

အိမ်ထောင်မပြုသည့်အကြောင်းမှာ အိမ်ထောင်ပြုခြင်းသည် အချိန်နှင့် ငွေဖြုန်းတီးခြင်းဖြစ်သည်ဟု ယူဆသောကြောင့်ဖြစ်ကြောင်း မင်က Sichuan Television သို့ ပြောသည်။

“အချစ်စစ်ကို တွေ့ဖို့ဆိုတာ တော်တော်ခက်ပါတယ်။ ဒါကြောင့် ရှားပါးခက်ခဲတဲ့ကိစ္စအတွက် ကျွန်တော်က ဘာကြောင့် ပင်ပင်ပန်းပန်း အလုပ်တွေလုပ်နေရမှာလဲ” ဟု မင်က ပြောသည်။

(▲ မင်က ၎င်းစိုက်ပျိုးထားသော ဟင်းသီးဟင်းရွက်ခင်းများကို ရေလောင်းပေါင်းသင်ခြင်းများ ပြုလုပ်သည်။ ထိုစိုက်ခင်းထွက် ဟင်းသီးဟင်းရွက်တို့ကိုသာ အဓိက စားသုံးသည်။ ဓာတ်ပုံ-QQ.com)

မင်၏ လုပ်ဆောင်မှုအပေါ် ပြည်မကြီး လူမှုကွန်ရက်သုံးစွဲသူတို့ကြား အမျိုးမျိုးအဖုံဖုံ မှတ်ချက်ပေးလျက်ရှိကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Man Quits RM5.9K Job To Live In A Cave Because Work & Marriage Are Meaningless