[ငါးဟင်းကြိုက်သူတွေ သတိပြုစရာ] ထိုင်းတွင် ငါးရိုးစူးသော အမျိုးသမီးတစ်ဦး လည်ပင်းအပြင်ဘက်သို့ ငါးရိုးဖောက်ထွက်လာမှု နာမည်ကြီးနေ

ထိုင်းနိုင်ငံတွင် အမျိုးသမီးတစ်ဦးသည် လည်ချောင်းထဲတွင် ငါးရိုးစူးနေခဲ့ကာ လည်ပင်းအပြင်သို့ ငါးရိုးဖောက်ထွက်လာရာ ဆေးရုံတွင် ခွဲစိတ်လိုက်ရသည့်ဖြစ်ရပ် နာမည်ကြီးနေသည်။

ထိုအမျိုးသမီး၏ ယောက်ျားက ဖြစ်ရပ်အသေးစိတ်ကို လူမှုကွန်ရက်တွင် ရေးသားဖော်ပြခဲ့ပြီး ငါးဟင်းကြိုက်တတ်သော အခြားသူတို့အား သတိပေးခဲ့သည်။

ဆူးရီးယန် ဘူးဖာအာ့ထ် (Suriyan Bubpha-art) အမည်ရှိ အသက် ၄၃ နှစ်အရွယ် အမျိုးသားက ယခုအဖြစ်အပျက်ကို Facebook တွင် ပြောပြလာခြင်း ဖြစ်သည်။

သူ၏ အသက် ၄၅ နှစ်အရွယ်ရှိ ဇနီးမှာ ၂ စင်တီမီတာခန့် ရှည်လျားသော ငါးရိုးစူးခဲ့ရာ ဆေးရုံတက်ကာ ခွဲစိတ်ကုသမှု ခံယူခဲ့ရသည်။

ဆူးရီးယန်သည် ဇနီးနှင့်အတူ ငါးစွပ်ပြုတ်သောက်ခဲ့ရာ အရိုးများပါသည်ကို သတိမထားမိခဲ့ကြ။

ဆူးရီးယန်၏ ဇနီးမှာ ငါးရိုးကို မြိုချမိခဲ့ပြီး ချက်ချင်းပင် လည်ချောင်းတွင် စူးရှသည့် နာကျင်မှုကို ခံစားလိုက်ရသည်။

ကနဦးတွင် လုပ်ရိုးလုပ်စဉ်နည်းလမ်းအတိုင်း အစားများများ မြိုချကာ ငါးရိုးကျသွားစေရန် ကြိုးစားခဲ့သည်။

သို့သော် ငါးရိုးမျက်နေဆဲဖြစ်ရာ ဆူးရီးယန်၏ဇနီးက လည်ချောင်းထဲသို့ လက်ထိုးထည့်ကာ ငါးရိုးကျသွားစေရန် ကြိုးစားခဲ့သည်။

ထိုအခါ ငါးရိုးမှာ မကျသည့်အပြင် အသားထဲသို့ ပိုမိုနက်ရှိုင်းစွာ ထိုးစိုက်မိသွားပြီး ယောင်ယမ်းမှုများ ဖြစ်ပေါ်လာသည်။

ယင်းနောက် ဆေးရုံသို့သွားခဲ့ရာတွင် ငါးရိုးကို X-ray ဖြင့် ခြေရာခံနိုင်ခဲ့ခြင်းမရှိရာ ငါးရိုးကျသွားပြီဟု ဆရာဝန်တို့က ယူဆခဲ့ကြသည်။

ထို့နောက် ရက်သတ္တ ၂ ပတ်ခန့်အတွင်း ဝေဒနာမှာ ဆိုးရွားပြင်းထန်လာသည်။

“သူ့မှာ သိုင်းရွိုက် ရောင်တဲ့ လက္ခဏာမျိုးတွေ ပြလာပါတယ်” ဟု ဆူးရီးယန်က ပြောသည်။

အခြားဆေးရုံသို့ သွားရောက်ပြသခဲ့ရာတွင်လည်း ရောဂါသက်သာခြင်းမရှိဘဲ ဆေးပေးလိုက်ကာ အိမ်သို့ ပြန်လာခဲ့ရပြန်သည်။

နာကျင်မှုမှာ ဆိုးရွားလာသောကြောင့် လည်ပင်းတွင် အကိုက်အခဲပျောက်စေသော ကပ်ခွာတစ်ခု ကပ်ခဲ့သည်။

နာကျင်မှု အနည်းငယ်သက်သာသော်လည်း လည်ပင်းတွင် အပ်ကဲ့သို့ စူးရှသည့်အရာတစ်ခု စတင်ခံစားမိလာသည်။

ကပ်ခွာသစ်တစ်ခု ထပ်မံအသုံးပြုခဲ့သည့် ဒုတိယနေ့တွင် ငါးရိုးမှာ လည်ပင်းမှ ဖောက်ထွက်နေသည်ကို ထင်ရှားစွာ တွေ့လိုက်ရကြောင်း ဆူးရီးယန်က ပြောသည်။

ထိုအခါတွင် ဖက်ချဘွန်းပြည်နယ်ရှိ ဘွန်းဆမ်ဖန်းဆေးရုံကြီးသို့ ချက်ချင်းပို့ဆောင်ပေးခဲ့ရာ X-ray စစ်ဆေးချက်အရ ငါးရိုးရှိနေကြောင်း အတည်ပြုနိုင်ခဲ့သည်။

၎င်းကို ချက်ချင်းပင် ခွဲစိတ်ကုသမှု ပြုလုပ်ကာ အရိုးကို ဖယ်ရှားပေးခဲ့သည်။

ဆရာဝန်တို့က ၎င်းတို့၏ ဘဝတွင် ပထမဆုံး ကြုံဖူးသည့်ဖြစ်ရပ်ဖြစ်ကြောင်း ပြောဆိုကြသည်။

ဆူးရီးယန်က ငါးရိုးဖောက်ထွက်နေသည့် ဓာတ်ပုံကို မျှဝေခဲ့ပြီး ငါးဟင်းစားသောက်ရာတွင် အထူးသတိပြုကြရန် သတိပေးခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Fishbone stuck in woman's throat exits through her neck