ပြည်ပ အိမ်ခြံမြေ သတင်း | Posted by အေးမြတ်သူ
တရုတ်ပြည်၊ ရှန်ဟိုင်းမြို့နေ အသက် ၆၆ နှစ်အရွယ် အမျိုးသမီးကြီးတစ်ဦးသည် အွန်လိုင်းမှတဆင့် ယွမ် ၂ သန်း (ကန်ဒေါ်လာ ၂၈၀၀၀၀) ဖိုးခန့် ဈေးဝယ်ကာ မဖွင့်ရသေးသော ပါကင်ထုပ်များ ထားစရာနေရာ မရှိအောင် များပြားလှသောကြောင့် တိုက်ခန်းတစ်ခန်း ငှားရမ်းထားရှိရသည့်ဖြစ်ရပ်မှာ ပြည်မကြီး လူမှုကွန်ရက်သုံးစွဲသူတို့ကြား သတင်းကြီးနေသည်။
မျိုးရိုးအမည် ဝမ်ဟုသိရသော အမျိုးသမီးကြီး၏ လုပ်ဆောင်မှုနှင့် စပ်လျဉ်းပြီး တရုတ်ပြည်မှ သက်ကြီးပိုင်းတို့၏ စိတ်ကျန်းမာရေးအခြေအနေအပေါ် အမျိုးမျိုးအဖုံဖုံ ဆွေးနွေးမှတ်ချက်ပြုမှုများ ရှိလာနေသည်။
ဝမ်သည် ရှန်ဟိုင်းမြို့၊ ကျာဒင်းခရိုင်ရှိ တိုက်ခန်းတစ်ခန်းတွင် တစ်ဦးတည်းနေထိုင်သူ ဖြစ်သည်။
ဝမ်သည် လွန်ခဲ့သော နှစ်အနည်းငယ်အတွင်း အွန်လိုင်းမှတဆင့် ယွမ် ၂ သန်းကျော်ဖိုးရှိ ပစ္စည်းမျိုးစုံ မှာယူခဲ့ကြောင်း Kan Kan News သတင်းဌာနက ဖော်ပြသည်။
(အွန်လိုင်းတွင် ဈေးဝယ်ရခြင်းမှာ စိတ်လှုပ်ရှားဖွယ်ကောင်းသောကြောင့် များစွာဈေးဝယ်ဖြစ်ခဲ့ကြောင်း ဝမ်က ပြောသည်။ ဓာတ်ပုံ-Douyin)
ဝမ်သည် အများအားဖြင့် အွန်လိုင်းမှ မှာယူသော ပစ္စည်းများကို ဖွင့်ဖောက်မကြည့်ဘဲ သိမ်းဆည်းထားလေ့ရှိရာ ပစ္စည်းများ တင်းကြမ်းပြည့်ကာ မသေမသပ်ဖြစ်နေသည်။
အိမ်နီးချင်းတို့က ပြောသည်မှာ ဝမ်၏ တိုက်ခန်းအနီးတွင် အနံ့ဆိုးလှကာ ပိုးဟပ်များ၊ ယင်ကောင်များ မကြာခဏ တွေ့ရကြောင်း ပြောသည်။
ဝမ်က ပြောသည်မှာ အွန်လိုင်းတွင် ဈေးဝယ်ရသည်ကို စွဲလမ်းနေပြီး မိမိအတွက် စိတ်လှုပ်ရှားစရာဖြစ်သည်ဟု ဆိုသည်။
ဆွေမျိုးများနှင့် သူငယ်ချင်းများ ပိုက်ဆံလာမချေးစေရန် ငွေဖြုန်းပစ်နေခြင်းဖြစ်ကြောင်းလည်း ဝမ်က ပြောသည်။
(ဝမ်က အွန်လိုင်းမှ မှာယူထားသည့် ဖွင့်မကြည့်ဘဲထားသော ပါဆယ်ထုပ်များ ထားစရာ နေရာမရှိသောကြောင့် အခြားတိုက်ခန်းတစ်ခန်းပင် ငှားရမ်းထားရှိခဲ့ရသည်။ ဓာတ်ပုံ-Douyin)
“လွန်ခဲ့တဲ့ နှစ်တွေတုန်းက မြို့ထဲမှာရှိတဲ့ တိုက်ခန်းကို ရောင်းလိုက်ပြီး ကျားဒင်ခရိုင်က အခုအခန်းကို ဝယ်လိုက်တာပါ။ ဒါကြောင့် ကျွန်မဆီမှာ ငွေပိုရှိနေလိ့မ်မယ်လို့ တခြားသူတွေက တွေးကြမှာပါပဲ” ဟု ဝမ်က ပြောသည်။
“တခြားသူတွေ ငွေလာမချေးအောင် ကျွန်မက ပစ္စည်းတွေ ဝယ်ပစ်တယ်။ ကျွန်မအိမ်ထဲမှာ ပစ္စည်းတွေ အပုံလိုက်တွေ့နေရင် သူတို့လည်း ငွေချေးဖို့ မသင့်တော်ဘူးလို့ သိသွားကြမှာပါပဲ”
ပုံမှန်အားဖြင့် အွန်လိုင်းတွင် live လွှင့် ဈေးရောင်းသူများထံမှ ဝယ်လေ့ရှိကြောင်း ဝမ်က ပြောသည်။
အများအားဖြင့် အလှကုန်ပစ္စည်းများ၊ ကျန်းမာရေး ဓာတ်စာများနှင့် ရွှေငွေလက်ဝတ်ရတနာများ ဝယ်လေ့ရှိသည်။
(ဝမ်၏ အခန်းမှာ အနံ့အသက်ဆိုးရွားပြီး ပိုးဟပ်များ၊ ယင်ကောင်များ တွေ့နေရကြောင်း အိမ်နီးချင်းတို့က ပြောသည်။ ဓာတ်ပုံ-Douyin)
ဝမ်မှာယူထားသော ပါဆယ်ထုပ်များမှာ အခန်းမျက်နှာကြက်သို့ ရောက်သည်အထိ များပြားလှသည်။
အိမ်ထဲတွင် အိပ်စရာနေရာပင် မရှိကြောင်း ဝမ်က ပြောသည်။
ဝမ်ပိုင်ဆိုင်ထားသော မြေအောက်ဂိုဒေါင်ခန်းတစ်ခုမှာလည်း အွန်လိုင်းမှ ဝယ်ယူထားသော ပါဆယ်ထုပ်များဖြင့်ပင် ပြည့်နေသည်။
လွန်ခဲ့သော လအနည်းငယ်ကမူ ဝမ်သည် သူ၏ ပါဆယ်ထုပ်များထားရန် တိုက်ခန်းတစ်ခန်း ငှားခဲ့သည်။
အိမ်ရာကော်မတီဝင်တစ်ဦးက ပြောပြသည်မှာ ဝမ်၏ သမီးမှာ နိုင်ငံခြားတွင် နေထိုင်နေပြီး ဆွေမျိုးများမှာလည်း ဝမ်၏အိမ်သို့ အရောက်အပေါက်နည်းသည်ဟု ဆိုသည်။
ပြီးခဲ့သောနှစ် မေလအတွင်းကမူ အိမ်ရာကော်မတီက ဝမ်၏ ခွင့်ပြုချက်ဖြင့် အခန်းသန့်ရှင်းရေး ပြုလုပ်ပေးခဲ့သော်လည်း မကြာမီတွင်ပင် ပါဆယ်ထုပ်များ စုပုံလာပြန်သည်။
(အိမ်ရာကော်မတီက သန့်ရှင်းရေးလုပ်ပေးသော်လည်း ဝမ်၏ အခန်းတွင် မကြာမီတွင်ပင် ပါဆယ်ထုပ်များ ပြည့်နှက်လာလေ့ရှိပြန်သည်။ ဓာတ်ပုံ-Douyin)
ရှန်ဟိုင်းအခြေစိုက် စိတ်ပညာရှင်တစ်ဦးဖြစ်သူ ရှီးယန်ဖုန်းက ပြောသည်မှာ စိတ်ဓာတ်ကျဆင်းမှုနှင့် လူမှုသောကတို့ကြောင့် ပစ္စည်းပစ္စယများ စုပုံသိမ်းဆည်းတတ်သည့် စိတ်ဝေဒနာခံစားရသူ များစွာရှိနေကြောင်း ပြောသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Shopaholic Chinese woman splurges US$280,000, rents big flat to store unopened packages
