၂၀၁၅ ခုနှစ်အတွင်း ထားဝယ် အထူးစီးပွားရေးဇုန်တွင် ကနေဦးအဆင့် လုပ်ငန်းများဖြစ်သည့် ဆောက်လုပ်ရေး လုပ်ငန်းများကို စတင် အကောင်အထည်ဖော်သွားနိုင်ရန် မျှော်မှန်းထားသည်ဟု မြန်မာ-ထိုင်း နှစ်နိုင်ငံ ပူးတွဲသတင်းထုတ်ပြန်ခဲ့သည်။
ထားဝယ် အထူးစီးပွားရေးဇုန်ဆိုင်ရာ အဆင့်မြင့် ကော်မတီအစည်းအဝေးကို ထိုင်းနိုင်ငံ ဘန်ကောက်မြို့တွင် ဇန်န၀ါရီ ၃၀ ရက်၌ ကျင်းပခဲ့ပြီး မြန်မာနိုင်ငံ ဒုတိယသမ္မတ ဦးဉာဏ်ထွန်းနှင့် ထိုင်းနိုင်ငံ ဒုတိယဝန်ကြီးချုပ်တို့ ဦးဆောင်ကျင်းပခဲ့ခြင်း ဖြစ်သည်။
၂၀၁၅ ခုနှစ်အတွင်း ထားဝယ် အထူးစီးပွားရေးဇုန်တွင် ၂၇ စတုရန်းကီလိုမီတာ အကျယ်အ၀န်းရှိမည့် စက်မှုကုန်ထုတ်လုပ်မှု ရပ်ကွက်၊ ထားဝယ်အထူး စီးပွားရေးဇုန်နှင့် ထိုင်းနိုင်ငံအကြား နှစ်လမ်းသွားကားလမ်း၊ အလုပ်သမားများ နေထိုင်ရန် မြို့နယ်၊ LNG ဓာတ်ငွေ့ တင်ပို့ရေးဆိပ်ကမ်း၊ လျှစ်စစ်ဓာတ်အားပေး စက်ရုံ၊ ဆိပ်ကမ်းငယ်နှင့် ရေလှောင်ဆည် စသည့် တည်ဆောက်ရေးလုပ်ငန်းများကို စတင်အကောင်အထည်ဖော်သွားမည် ဖြစ်သည်။
ထားဝယ် အထူးစီးပွားရေးဇုန်ကို မြန်မာ-ထိုင်းနယ်စပ်နှင့် ဆက်သွယ်ပေးမည့် နှစ်လမ်းသွားကားလမ်း ဖောက်လုပ်ရေးအတွက် ထိုင်းအစိုးရသည် မြန်မာနိုင်ငံသို့ ဘဏ္ဍာငွေ အကူအညီပေးရန် ကမ်းလှမ်းသွားမည် ဖြစ်သည်။
အဆိုပါ အစည်းအဝေး ကာလအတွင်း မြန်မာ-ထိုင်း-ဂျပန် သုံးနိုင်ငံ အစည်းအဝေး တစ်ရပ်ကိုလည်း ကျင်းပခဲ့ပြီး ထားဝယ် အထူးစီးပွားရေးဇုန် ထူထောင်ရေးအတွက် ဘဏ္ဍာရေးနှင့် နည်းပညာဆိုင်ရာ အကူအညီများကို ဂျပန်နိုင်ငံမှ ပေးရန် ကမ်းလှမ်းခဲ့သည်။
ကနေဦးအဆင့် လုပ်ငန်းများဖြစ်သည့် အခြေခံအဆောက်အအုံများ အကောင်အထည်ဖော်ရေးအတွက် သက်သာခွင့်ပေးရေး သဘောတူညီချက်များနှင့် ပက်သက်ပြီး ထိုင်းလုပ်ငန်းစုတစ်ခုနှင့် လောလောဆယ် သီးခြားဆွေးနွေးမှုများ ပြုလုပ်နေသည်။
ထားဝယ် အထူးစီးပွားရေးဇုန်အတွက် ကာလရှည်မဟာ စီမံကိန်းတစ်ရပ်ကို ထိုင်းနိုင်ငံမှ အိမ်နီးချင်း နိုင်ငံများ စီးပွားရေး ဖွံ့ဖြိုးတိုးတက်မှု ပူးပေါင်းဆောင်ရွက်မှု အေဂျင်စီ၏ ပံ့ပိုးမှုဖြင့် ဆောင်ရွက်လျက်ရှိပြီး အခြေခံအဆောက်အအုံ စီမံကိန်းများ အကောင်အထည်ဖော်ခြင်း အပါအဝင် ဆောင်ရွက်ဆဲ စက်မှုဖွံ့ဖြိုး တိုးတက်ရေး စီမံကိန်းကိုလည်း မြှင့်တင်သွားမည်ဖြစ်သည်။
ထားဝယ် အထူးစီးပွားရေးဇုန်သည် အာဆီယံဒေသတစ်ခုလုံး၏ စီးပွားရေး ဖွံ့ဖြိုးတိုးတက်မှုကို ပိုမိုမြင့်တင်နိုင်ရေးအတွက် မဟာဗျုဟာကျသည့် ဖွံ့ဖြိုးတိုးတက်မှု စီမံကိန်းကြီးဖြစ်ပြီး စတုရန်းကီလိုမီတာ ၁၉၆ အကျယ်အဝန်းရှိသည့် စီမံကိန်းဖြစ်သည်။
Credit: mizzimaburmese
