အမေရိကန်ပြည်တွင် အမျိုးသားတစ်ဦးက အလုပ်မှထွက်လိုက်ကာ အိုစာမင်းစာ စုဆောင်းထားငွေဖြင့် ရွက်လှေငယ်တစ်စင်းဝယ်လိုက်ပြီး သူ၏ကြောင်ကလေးနှင့်အတူ ကမ္ဘာပတ်နေပုံ

အမေရိကန်ပြည်၊ အော်ရီဂွန်ပြည်နယ်တွင် တာယာကုမ္ပဏီတစ်ခု၌ အလုပ်လုပ်သော အမျိုးသားတစ်ဦးသည် အလုပ်မှထွက်လိုက်ကာ ရွက်လှေငယ်တစ်စင်းဝယ်ယူလိုက်သည်။

ထို့နောက် ဖီးနစ်ဟု အမည်ပေးထားသော သူ၏ကြောင်ကလေးနှင့်အတူ ကမ္ဘာပတ်လျက်ရှိရာ ပြီးခဲ့သော စနေနေ့က ဟာဝိုင်အီသို့ ရောက်ရှိလာသည်။

လူမှုကွန်ရက်မှတဆင့် ၎င်းကို အားပေးထောက်ခံသူများစွာက ဟာဝိုင်အီတွင် ကြိုဆိုခဲ့ကြသည်။

(▲ ဟာဝိုင်အီ အုပ်ချုပ်ရေးမှူး Josh Green က ရွက်လှေတစ်စင်းဖြင့် ရောက်ရှိလာသူ အသက် ၂၉ နှစ်အရွယ်ရှိ အော်လီဗာ ဝစ်ဂျာ (Oliver Widger) အား အသိအမှတ်ပြု ဂုဏ်ပြုကြောင်းလက်မှတ် ထုတ်ပေးခဲ့သည်။ အော်လီဗာသည် ဟာဝိုင်အီကျွန်းစုမှ Waikiki ကျွန်းသို့ ၂၀၂၅ ခုနှစ်၊ မေလ ၂၄ ရက်တွင် ရောက်ရှိခဲ့သည်။ ဓာတ်ပုံ-AP/ Michelle Bir)

အော်လီဗာကို ဟာဝိုင်အီမှ အုပ်ချုပ်ရေးမှူး Josh Green က Waikiki Yacht Club တွင် ကြိုဆိုခဲ့သည်။

အော်လီဗာက မိမိအား သတင်းထောက်များ အပါအဝင် သောင်းသောင်းဖျဖျ ဝိုင်းဝန်းကြိုဆိုကြမှုအပေါ် အံ့သြတုန်လှုပ်မိကြောင်း ဝန်ခံသည်။

မိမိမှာ အလွန်ထူးဆန်းအံ့သြဖွယ် ခံစားခဲ့ရပြီး ဒူးညွှတ်ခွေကျမသွားစေရန် အားတင်းထားရကြောင်း၊ မိမိအနေဖြင့် လှိုင်းမူးနေခြင်းမဟုတ်ကြောင်း အော်လီဗာက ပြောသည်။

လွန်ခဲ့သော ၄ နှစ်ခန့်က အော်လီဗာတွင် ရောဂါလက္ခဏာတချို့ခံစားခဲ့ရပြီး လေဖြတ်မည့် အလားအလာမျိုးနှင့် ရင်ဆိုင်ခဲ့ရသည်။

ထိုသို့ ဖြစ်ပွားချိန်တွင် အော်လီဗာသည် သူ၏ ဘဝကို ပြန်လည်သုံးသပ်ခဲ့ရာ မန်နေဂျာအဖြစ် လုပ်ကိုင်ရသည့် ယခုအလုပ်အပေါ် နှစ်သက်ပျော်ရွှင်မှုမရှိကြောင်း သိလာသည်။

အော်လီဗာက လက်ကျန်ငွေ မရှိသည့်အပြင် ဒေါ်လာ ၁၀၀၀၀ အကြွေးတင်နေသည့် အခြေအနေဖြင့် အလုပ်မှ နှုတ်ထွက်ခဲ့သည်။

သို့သော် အိုစာမင်းစာအတွက် စုဆောင်းထားသည့် retirement saving ရှိနေရာ ထိုငွေများကို ထုတ်ယူလိုက်ပြီးနောက် ရွက်လှေငယ်တစ်စင်း ဝယ်ယူလိုက်သည်။

ထို့နောက် ပင်လယ်အတွင်း ရွက်လွှင့်သွားလာနည်းကို YouTube မှတဆင့် လေ့လာခဲ့ပြီး ၎င်းနေထိုင်ရာ Portland မှသည် အော်ရီဂွန်ပြည်နယ်၏ ကမ်းရိုးတန်းဒေသသို့ ရွှေ့ပြောင်းခဲ့သည်။

ထို့နောက် ဒေါ်လာ ၅၀၀၀၀ ဖြင့် ဝယ်ယူထားသည့် လှေကို လအတန်ကြာ အချိန်ယူကာ ပြန်လည်ပြင်ဆင်ခြင်းများ ပြုလုပ်သည်။

(▲ ၂၀၂၅ ခှုနှစ်၊ မေလ ၁၅ ရက်တွင် အော်လဗာက သူ၏ အင်စတာဂရမ်အကောင့်တွင် တင်ခဲ့သော ဓာတ်ပုံအရ ရွက်လှေထဲတွင် သူ၏ကြောင်လေး ဖီးနစ်ကို တွေ့ရပုံ။ သူသည် အော်ရီဂွန်ပြည်နယ်မှသည် ဟာဝိုင်အီသို့ ရွက်လွှင့်ထွက်ခွာလာခဲ့ခြင်း ဖြစ်သည်။ ဓာတ်ပုံ-Oliver Widger via AP)

အော်လီဗာသည် ဖီးနစ်နှင့်အတူ ဧပြီလကုန်ပိုင်းတွင် ဟာဝိုင်အီသို့ စတင်ရွက်လွှင့်ခဲ့ခြင်းဖြစ်ပြီး သူ၏ ပင်လယ်ခရီးအတွေ့အကြုံများကို follower ၁ သန်းကျော်ရှိသော TikTok နှင့် follower ၁ ဒသမ ၇ သန်းရှိသော အင်စတာဂရမ်အကောင့်တို့တွင် မျှဝေခဲ့သည်။

အမေရိကန်တစ်ပြည်လုံးတွင် ကျော်ကြားနေသော မိမိ၏ ဇာတ်ကြောင်းမှာ လူတို့၏ စိတ်နှလုံးတွင် ပဲ့တင်ရိုက်ခတ်နေမည်ဟု ယူဆကြောင်း အော်လီဗာက ပြောသည်။

(▲ အော်လီဗာကို သူ၏ လှေနှင့်အတူ တွေ့ရပုံ။ ဟာဝိုင်အီမှ Waikiki Yacht Club သို့ မေလ ၂၄ ရက် စနေနေ့က ရောက်ရှိခဲ့သည်။ ဓာတ်ပုံ-AP Photo/Michelle Bir)

လမ်းခရီးတွင် တက်မကျိုးသွားသည့် ခြောက်ခြားဖွယ်အခြေအနေနှင့် ရင်ဆိုင်ခဲ့ရကြောင်းလည်း အော်လီဗာက ပြောသည်။

အော်လီဗာ၏ ရှည်လျားသော သမုဒ္ဒရာခရီးစဉ်အတွင်း လင်းပိုင်နှင့် ဝေလငါးများကို ပစိဖိတ်သမုဒ္ဒရာ၏ အေးချမ်းကြည်လင်သော ရေပြင်၌ အမြဲတွေ့မြင်ခဲ့ရသည်။

“ရှုလေတိုင်း မှန်လိုကြည်လင်နေတဲ့ ရေပြင်ကို တွေ့နေရတဲ့ သမုဒ္ဒရာကြီးရဲ့အလယ်မှာ ရောက်နေရတာဟာ ရူးလောက်စရာ ခံစားရပါတယ်” ဟု အော်လီဗာက ပြောသည်။

ထိုသို့ သမုဒ္ဒရာအလယ်တွင် ကြောင်ကလေးတစ်ကောင်နှင့် ဖြတ်သန်းနေရသော်လည်း အထီးမကျန်ကြောင်း အသက် ၂၉ နှစ်အရွယ်ရှိ အော်လီဗာက ပြောသည်။

အော်လီဗာက သမုဒ္ဒရာအလယ်တွင် ရှိနေစဉ် video conference ကဲ့သို့ နည်းလမ်းမျိုးဖြင့် မိတ်ဆွေသူငယ်ချင်းများနှင့် ဆက်သွယ်စကားပြောခဲ့သည်။

Starlink ကဲ့သို့ ဂြိုဟ်တု အင်တာနက်ဆက်သွယ်ရေးများ မရမီက ပင်လယ်ထဲတွင် ဖြတ်သန်းခဲ့ကြသော သင်္ဘောသားများအတွက် စိတ်မကောင်းမိကြောင်းလည်း ၎င်းက ပြောသည်။

မိမိ ဆက်လက်ရွက်လွှင့်မည့်ခရီးမှာ French Polynesia သို့ ဖြစ်လိမ့်မည်ဖြစ်ကြောင်း အော်လီဗာက ပြောသည်။

သို့သော် မိမိအနေဖြင့် လှေကို ပြန်လည်ပြုပြင်မွမ်းမံရဦးမည်ဖြစ်ကြောင်း ၎င်းက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: An Oregon man who quit his job to set sail with his cat arrives to cheering fans in Hawaii Photo Credit- AP Photo/Michelle Bir, Oliver Widger via AP