အိန္ဒိယတွင် အလုပ်သင် ဆော့ဖ်ဝဲအင်ဂျင်နီယာ ခေါ်ယူရာတွင် ပလာတာတချပ်ဖိုးပင် မရှိသော လစာဖြင့် ခေါ်ယူခဲ့မှု အပေါ် အိန္ဒိယလူမှုကွန်ရက်သုံးစွဲသူတို့အကြား ဝေဖန်မှု မြင့်တက်လျက်ရှိ၊ သို့သော် လျှောက်ထားသူ ၁၉၀၀ ကျော်ရှိနေ

ယနေ့ကာလတွင် ဘွဲ့ရများ၊ ဘွဲ့မရသေးဘဲ ကျောင်းထွက်ခဲ့သူများမှာ ကုမ္ပဏီများတွင် အလုပ်သင်နေရာများ ရရှိနိုင်ရန် စုပြုံတိုးဝင်နေကြသည်။

အိန္ဒိယနိုင်ငံ၊ မွမ်ဘိုင်းမြို့တွင် အခြေစိုက်သော ကုမ္ပဏီတစ်ခုက အလုပ်ခေါ်ယူခဲ့ပုံမှာ အိန္ဒိယလူမှုကွန်ရက် သုံးစွဲသူများအကြား ပြောစမှတ်တွင်စရာ ဖြစ်နေသည်။

မွမ်ဘိုင်းမြို့အခြေစိုက် Falcon Labs ကုမ္ပဏီက အလုပ်သင် backend developer (ဆော့ဖ်ဝဲ အင်ဂျင်နီယာ) အလုပ်နေရာခေါ်ယူမှုကို ၎င်းတို့ကုမ္ပဏီ၏ ဝဘ်ဆိုက်ဖြစ်သော Naukri.com တွင် ဖော်ပြခဲ့သည်။

အလုပ်ခေါ်စာ၏ အစပိုင်း ဖော်ပြချက်များမှာ သမားရိုးကျအတိုင်းသာ ဖြစ်သည်။ သို့သော် လစာထောက်ပံ့ကြေးကို ဖော်ပြထားသည်မှာ တစ်လလျှင် ၁၀ ရူပီးဟု ဖော်ပြထားသည်။မှန်ပါသည်။ ၁၀ ရူပီး ဖြစ်ပါသည်။

ထိုငွေမှာ ယနေ့ခေတ်တွင် ပလာတာတစ်ချပ်ပင် ဝယ်မရသောငွေပမာဏဖြစ်သည်။ အလုပ်သင်အဖြစ် ခေါ်ယူမှုအများစုတွင် လစာမပေးကြသည်မှာ တွေ့ရမြဲဖြစ်သော်လည်း ယခုအလုပ် လစာပေးထားပုံမှာ လူအများအာရုံစိုက်စရာ ဖြစ်လာသည်။

လူမှုကွန်ရက်သုံးစွဲသူတစ်ဦးက ထိုအလုပ်ခေါ်စာကို ဖတ်မိခဲ့ပြီးနောက် screenshot ရယူကာ လူမှုကွန်ရက်တွင် မျှဝေလာခြင်း ဖြစ်သည်။

((လူမှုကွန်ရက်သုံးစွဲသူတို့၏ တုံ့ပြန်မှုများ))

“သူတောင်းစားတောင် ဒီထက်ပိုရတယ်။ ဟာသပဲ” ဟု X လူမှုကွန်ရက်သုံးစွဲသူတစ်ဦးက မှတ်ချက်ပြုသည်။

အခြားတစ်ဦးကလည်း “မပေးတာထက်စာရင် တော်သေးတာပေါ့” ဟု မှတ်ချက်ပြုသည်။ အခြားတစ်ဦးကမူ “ ၁၀ ရူပီး…ဟုတ်လား။ ဒီမှာ bro….ဟောဒီမှာ ပလာတာတစ်ချပ် ရပါမယ်” ဟု ထေ့ငေါ့ထားသည်။

အံ့ဖွယ်ကောင်းသည်မှာ ထိုသို့ လစာနည်းပါးစွာခေါ်ယူသော်လည်း လျှောက်ထားသူ ၁၉၀၀ ကျော် (၁၉၀၁ ဦး) ရှိခဲ့သည်ဟု ဆိုသည်။

မျက်မှောက်ခေတ် အလုပ်အကိုင် ရှားပါးမှုနှင့် အလုပ်လက်မဲ့များပြားမှုကို မီးမောင်းထိုး ပြသလိုက်သော ဖြစ်ရပ်လည်း ဖြစ်သည်။

ယခုဖြစ်ရပ်အပေါ် လူမှုကွန်ရက်သုံးစွဲသူတို့က ဝိုင်းဝန်းပြက်လုံးထုတ်လျက်ရှိသည်။

((ကုမ္ပဏီက ဘာပြောလဲ))

ယခုဖြစ်ရပ်နှင့် စပ်လျဉ်းပြီး Falcon Labs က ရှင်းပြမှုများ ပြုလုပ်လာသည်။

ကုမ္ပဏီ၏ Likedln အကောင့်တွင် ရေးသားဖော်ပြထားသည်မှာ “ဒီကြော်ငြာတက်သွားပြီး ဂယက်ရိုက် သွားတာက ရယ်စရာပါပဲ။ စာကြွင်း- ကျွန်တော်တို့ ဒီအလုပ်ခေါ်စာကို စစ်ဆေးကြည့်ခဲ့ပါတယ်။ အလုပ်ခေါ်စာ တင်တာက ကျွန်တော်တို့ Naukri.com အလုပ်ခန့်ထားသူအကောင့်ကနေ တင်ခဲ့တာ မဟုတ်ပါဘူး။ ဒါက Naukri.com ရဲ့ bots ကနေ အလိုအလျောက်စနစ်နဲ့ ထွက်သွားတဲ့ ကြော်ငြာဖြစ်ပြီး တစ်လကို လစာ ထောက်ပံ့ကြေး ၁၀ ရူပီးလို့ မှားယွင်းဖော်ပြထားတာ ဖြစ်ပါတယ်။ ကျွန်တော်တို့ ဒါကို စစ်ဆေးပြီး ဖယ်ရှား ပြီးသွားပါပြီ။ စိတ်ဝင်စားသူတွေအနေနဲ့ တစ်လကို ရူပီး ၁၀၀၀၀ နဲ့ လျှောက်ထားနိုင် ပါတယ်” ဟု ဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Internship In Mumbai With ₹10 Salary Receives More Than 1900 Applications; Netizens React With Memes (freepressjournal)