အိမ် ခြံ မြေ ဈေးကွက်တွင် ရင်းနှီးမြုပ်နှံသူများပြန်လည်ဦးလှည့်လာမှုကြောင့် အတန်ငယ်လှုပ်ခတ်လာ

မြန်မာ့ အိမ်ခြံမြေဈေးကွက်အတွင်း အရောင်းအ၀ယ်အတန်ငယ် ငြိမ်သက်နေရာမှ လတ်တလောကာလတွင် နိုင်ငံခြားငွေကြေးနှုန်းထားမြင့်တက်နေမှုကြောင့် ရင်းနှီးမြုပ်နှံသူအချို့မှာ အိမ် ခြံ မြေ ဘက်ပြန်လည်ဦးလှည့် လာသဖြင့် အတန်ငယ်ဈေးကွက်လှုပ်ခတ်လာခဲ့ကြောင်း မြန်မာနိုင်ငံအိမ်ခြံမြေ ၀န်ဆောင်မှုအသင်းမှ တာဝန်ရှိသူတစ်ဦးကပြောသည်။

“ လက်ရှိမှာ အိမ် ခြံ မြေအပိုင်းကတော့ နည်းနည်းလေးပြန်လှုပ်လာတယ်လို့ပြောလို့ရတယ်။ဘာကြောင့်လဲဆိုတော့ ဒေါ်လာဈေး ၊ ရွှေဈေးတွေအတက်မှာ သေချာမယ်ထင်တဲ့ ၊ ခိုင်မာမှုရှိတယ်ထင်တဲ့ မြေဘက်ကို ပြန်ဦးလှည့်လာတဲ့ သဘောပေါ့လေ။ဒီလို Investor တွေပြန်ဝင်လာတော့ ဈေးကွက်ကိုအခြေအနေပြန်ကောင်းလာဖို့အတွက် မျှော်လင့်လို့ရတာပေါ့။လက်ရှိမှာတော့ သိန်းတစ်ထောင်ဝန်းကျင်တွေအလုပ်ဖြစ်တယ်။ " ဟု မြန်မာနိုင်ငံအိမ်ခြံမြေ ၀န်ဆောင်မှုအသင်းမှ တာဝန်ရှိသူတစ်ဦးကပြောပြသည်။

အရောင်းအ၀ယ်ဈေးကွက်အတွင်းပြန်လည်လှုပ်ခတ်လာသည်ဆိုသော်လည်း အမှန်တကယ် အရောင်းအ၀ယ်ပြုလုပ်ရာတွင်ဝယ်သူစိတ်ကြိုက်ဈေးကွက်ဖြစ်နေကြောင်းလည်းသိရသည်။

အရောင်းအ၀ယ်အများစုဖြစ်ထွန်းသည့် ဈေးနှုန်းများမှာနေရာအနေအထားအလိုက်တူညီမှုမရှိသော်လည်း သိန်းရှစ်ရာမှ ထောင်ကျော်မြေကွက်များ အဖြစ်များနေကြောင်းသိရသည်။

ရင်းနှီးမြုပ်နှံရန် ရည်ရွယ်ချက်ဖြင့် ၀ယ်ယူသည့်သူများရွေးချယ်သည့် မြေကွက်အများစုမှာ သိန်းတစ်ထောင်ဝန်းကျင်မှ အစပြု၍ဈေးကွက်ဖြစ်ထွန်းလျက်ရှိသည်။အမှန်တကယ်နေထိုင်ရန် ၀ယ်ယူသည့်သူများအနေဖြင့်မူ အိမ်ပါမြေကွက်များကိုသာ အဓိကထားရွေးချယ်ဝယ်ယူနေကြပြီး သိန်း ၇၀၀ မှ သိန်းတစ်ထောင်ကြားရှိကြောင်းလည်း အကျိုးဆောင်များထံမှသိရသည်။

မင်းချို ( iMyanmarHouse.com အိုင်မြန်မာဟောက်စ်ဒေါ့ကွန်း) မှ အထူးရေးသားဖော်ပြသည်။ Credit: iMyanmarHouse.com