သြစတေးလျနိုင်ငံတွင် အိမ်ခြံမြေအကျိုးဆောင်တစ်ဦးက သူ၏နေအိမ်ကို အခမဲ့ပေးမည်ဖြစ်ပြီး လာမည့် ၃ လအတွင်း နောက်ဆုံးထားဆက်သွယ်ရမည်ဟု ကြေညာ

သြစတေးလျနိုင်ငံတွင် အိမ်ခြံမြေအကျိုးဆောင်တစ်ဦးက သူ၏နေအိမ်ကို အခမဲ့ပေးမည်ဖြစ်ပြီး လာမည့် ၃ လအတွင်း နောက်ဆုံးထားဆက်သွယ်ရမည်ဟု ကြေညာလိုက်ကြောင်း သြစတေးလျအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

နေအိမ်တည်ရှိသည့်နေရာမှာ သြစတေးလျနိုင်ငံ၊ ကွင်းစလန်ပြည်နယ်၏ ကမ်းရိုးတန်းမြို့တစ်ခုဖြစ်သော ဂိုးကို့စ်မြို့တွင် တည်ရှိပြီး ကွင်းစလန်ပြည်နယ်၏မြို့တော် ဘရစ္စဘိန်း အရှေ့တောင်ဘက် ၄၁ မိုင်အကွာတွင် ဖြစ်သည်။

နေအိမ်မှာ ဂိုးကို့စ်မြို့လယ် စီးပွားရေးအချက်အခြာဒေသဖြစ်သော Southport အရပ်တွင် တည်ရှိခြင်း ဖြစ်သည်။

နေအိမ်ကို အခမဲ့ပေးမည်ဆိုသော်လည်း ယခုကမ်းလှမ်းမှုတွင် မြေမပါဝင်ဘဲ နေအိမ်သက်သက်သာ ဖြစ်သည်။

နေအိမ်မှာ ၁၉၃၀ ပြည့်လွန်ကာလများက ဆောက်လုပ်ထားခြင်းဖြစ်ပြီး အုတ်နှင့် weatherboard တို့ဖြင့် ဆောက်လုပ်ထားကာ ရယူမည့်သူအနေဖြင့် ဖျက်သိမ်းခြင်းမပြုဘဲ ရွှေ့ပြောင်းကာ ရယူရမည် ဖြစ်သည်။

ဂိုးကို့စ်မြို့၊ ဂျွန်စတန်လမ်း၊ အမှတ် ၈၆ တွင်တည်ရှိသော အဆိုပါနေအိမ်တွင် ပက်ထရစ်ရှာ ဟန်းရစ်ခ်ဆန်ဆိုသည့် အမျိုးသမီးကြီးသည် မွေးဖွားချိန် ၁၉၃၅ ခုနှစ်မှစတင်ကာ ပြီးခဲ့သည့် ၂၀၁၇ ခုနှစ်အတွင်း လေလံတင်ရောင်းချခဲ့ချိန်အထိ နေထိုင်သွားခဲ့သည်။

MCM Property Developments ကုမ္ပဏီမှ မိုက်ကယ် အဲလစ်နှင့် ကင်မရွန် ရိဒ်တို့က သြစတေးလျဒေါ်လာ ၈၈၀၀၀၀ ဖြင့် လေလံဆွဲ ဝယ်ယူခဲ့ပြီး ၃ ထပ်အဆောက်အအုံအဖြစ် ပြန်လည်ဆောက်လုပ်ရန် ရည်မှန်းခဲ့သည်။

ဝယ်ယူပြီးနောက်ပိုင်း မူလနေအိမ်ကို ဖြိုဖျက်ရန် ဆုတ်ဆိုင်းနေခဲ့ကြပြီး မူရင်းနေအိမ်ပိုင်ရှင် မစ္စက် ဟန်းရစ်ခ်ဆန် ယခုလအစောပိုင်းတွင် ကွယ်လွန်သွားပြီးနောက်ပိုင်းတွင်ကား ဖျက်သိမ်းမည့်စိတ်ကူးအားလုံးကို ရပ်ဆိုင်းလိုက်တော့သည်။

မစ္စတာ အဲလစ်က အိပ်ခန်း ၁ ခန်း၊ ရေချိုးခန်း ၁ ခန်းပါသည့် ယခုနေအိမ်ကို မစ္စက် ဟန်းရစ်ခ်ဆန်မြတ်နိုးခဲ့သလိုမျိုး နှစ်သက်မြတ်နိုးမည့် မည်သူ့ကိုမဆို ပေးအပ်သွားရန် ဆုံးဖြတ်ခဲ့ကြကြောင်း ပြန်လည်ပြောပြသည်။

မစ္စတာ အဲလစ်သည် Harcourts Broadbeach Mermaid Waters အိမ်ခြံမြေကုမ္ပဏီတွင် အိမ်ခြံမြေအကျိုးဆောင်တစ်ဦးအဖြစ် လုပ်ကိုင်လျက်ရှိသူ ဖြစ်သည်။

ရွှေ့ပြောင်းစရိတ်မှာ သြစတေးလျဒေါ်လာ ၁၅၀၀၀ မှ ၁၈၀၀၀ အကြား ကုန်ကျဖွယ်ရှိကြောင်းလည်း မစ္စတာအဲလစ်က ပြောကြားသည်။

“သူက ဓာတ်ပုံတွေ အများကြီးထားခဲ့ပါတယ်။ ဒါတွေကို ကြောင်အိမ်ထဲမှာ ရှာတွေ့ခဲ့တာပါ” ဟု မစ္စတာအဲလစ်က ဆိုသည်။

မစ္စတာ အဲလစ်သည် မစ္စက် ဟန်းရစ်ခ်ဆန်၏ မိသားစုဝင်များနှင့်လည်း သိကျွမ်းပြီး အဆိုပါဓာတ်ပုံများကို မဲလ်ဘုန်းရှိ ဟန်းရစ်ခ်ဆင်၏တူမဖြစ်သူထံ ပို့ပေးခဲ့သေးသည်။

“ဒီအိမ်က ဖြိုချပစ်မယ့်အစား တစ်ယောက်ယောက်ရယူသွားတာက တကယ်ကောင်းပါလိမ့်မယ်။ ဖြိုချပစ်တာကို စောင့်ကြည့်ရမှာက နာကျင်စရာပါပဲ။ မိဘတွေနေထိုင်ဖို့ နေရာလိုအပ်နေပြီး ငွေပိုလည်း အတော်အတန်ရှိသူတွေအတွက် ဒါက အခွင့်အလမ်းကောင်းတစ်ခုပါ။ လာမယ့် ၂ လ၊ ၃ လအတွင်း ယူမယ့်သူမရှိရင်တော့ ကံမကောင်းစွာနဲ့ပဲ ဒီအိမ်က ဖြိုချခံရတော့မှာပါ” ဟုလည်း မစ္စတာ အဲလစ်က ပြောကြားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)