သြစတေးလျတွင် မလေးရှား၊ တရုတ်၊ အိန္ဒိယနိုင်ငံသားများ ဝယ်ယူထားသည့် နေအိမ် ၁၅ လုံးကို အစိုးရက ဖိအားပေးကာ ပြန်လည်ရောင်းချခိုင်းခဲ့

သြစတေးလျနိုင်ငံတွင် မလေးရှား၊ တရုတ်နှင့် အိန္ဒိယတို့အပါအဝင် နိုင်ငံခြားဝယ်လက်တို့က တရားမဝင် ဝယ်ယူထားသည့် နေအိမ် ၁၅ လုံးကို ဖိအားပေးကာ ပြန်လည်ရောင်းချခိုင်းခဲ့ကြောင်း မလေးရှားအခြေစိုက် အိမ်ခြံမြေဝက်ဘ်ဆိုက်တစ်ခုတွင် ဖော်ပြသည်။

သြစတေးလျတွင် ယခင်ကမူ ပြည်ပရင်းနှီးမြှုပ်နှံမှု စည်းမျဉ်းများကို တင်းကျပ်စွာကိုင်တွယ်ခြင်း မရှိချေ။
သို့ရာတွင် ပြည်ပဝယ်လက်တို့ အလုံးအရင်းဝင်ရောက်မှုကြောင့် အိမ်ခြံမြေဈေးများ အလွန်မြင့်တက်ကာ နိုင်ငံသားများ၏ လူနေမှုစရိတ် အလွန်ကြီးမြင့်လာခဲ့ခြင်းကြောင့် ပြီးခဲ့သည့် ၂၀၁၆ ခုနှစ်အတွင်းမှ စတင်ကာ စည်းမျဉ်းများတင်းကျပ်လာခဲ့ခြင်း ဖြစ်သည်။

နိုင်ငံခြားရင်းနှီးမြှုပ်နှံမှုစည်းမျဉ်းများ တင်းကြပ်လိုက်ပြီးနောက်ပိုင်း အရောင်းအဝယ် ၆၁ ခု ဖြစ်ပေါ်ခဲ့ရာတွင် သြစတေးလျဒေါ်လာ ၁၀၇ သန်းဖိုးသာ ရှိခဲ့ကြောင်း သြစတေးလျဘဏ္ဍာရေးဝန်ကြီး စကော့ မောရစ်ဆန်က ပြောကြားသည်။

ယခုပြန်လည်ဝယ်ယူသိမ်းဆည်းလိုက်သော အိမ်ခြံမြေ ၁၅ ခုမှာ မလေးရှား၊ တရုတ်၊ အင်ဒိုနီးရှား၊ အိန္ဒိယ၊ ဂျာမနီ၊ ဗြိတိန်နှင့် အီရန်နိုင်ငံသားတို့ ပိုင်ဆိုင်သော နေအိမ်များ ဖြစ်ကြသည်။

ယင်းနိုင်ငံသားများသည် နိုင်ငံခြားရင်းနှီးမြှုပ်နှံမှုစိစစ်ရေးဘုတ်အဖွဲ့မှ ခွင့်ပြုချက်မရခဲ့သောကြောင့် နေအိမ်များ ပြန်လည်ရောင်းချရန် ဖိအားပေးခံခဲ့ရခြင်းလည်း ဖြစ်သည်။

သြစတေးလျနိုင်ငံတွင်ရှိသော နာမည်ကျော်မြို့ကြီးများ၏ အိမ်ခြံမြေဈေးနှုန်းများမှာ အလွန်မြင့်တက်လာခဲ့ကြောင်း Demographia မှ ပြုလုပ်သည့် စစ်တမ်းတစ်ရပ်တွင် ဖော်ပြသည်။

ဆစ်ဒနီသည် ကမ္ဘာပေါ်တွင် အိမ်ခြံမြေဈေးနှုန်းအမြင့်မားဆုံးမြို့ကြီးများစာရင်းတွင် ဒုတိယနေရာတွင် ရပ်တည်လျက်ရှိသည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)