ပလက်ဝမြို့တွင် နိုင်ငံခြားသားခရီးသွားလာခွင့်ရရှိရန် မြို့ သစ် ဧရိယာ ဧက နှစ်ထောင်ခန့်  တိုးချဲ့မည်

ပလက်ဝမြို့တွင် နိုင်ငံခြားသားခရီးသွားလာခွင့်ရရှိရန်နှင့် မြို့ဖွံ့ဖြိုးတိုးတက်ရန်အတွက် မြို့သစ်ဧရိယာ
တိုးချဲ့ခြင်းစီမံကိန်းအကောင်အထည်ဖော်လုပ်ဆောင်မည်
ဖြစ်ကြောင်းချင်းပြည်နယ်သစ်တော နှင့်သတ္တုရေးရာဝန်ကြီး ဦးကျော်ငြိမ်း က ဆိုသည်။

လက်ရှိတွင် ပလက်ဝမြို့သို့နိုင်ငံခြားသား ခရီးသွားလာခွင့်
ကန့်သတ်ထားပြီး ပြည်တွင်းခရီးသွားများသာ သွားလာခွင့်ပေးထားကြောင်းနှင့် ထိုကဲ့သို့ နိုင်ငံခြားသား
ခရီးသွားဝင်ရောက်ခွင့် တားမြစ်ထားခြင်းမှာ လုံခြုံရေးအပိုင်း လိုအပ်ချက်ရှိခြင်း၊ တည်းခိုရန်အတွက်
အဆင့်မြင့် ဟိုတယ်များမရှိခြင်း၊ ကျန်းမာရေးအတွက် လုံလောက်မှုမရှိခြင်းနှင့် ဆက်သွယ်ရေးနည်းပညာ
အဆင်ပြေမှုမရှိ ခြင်း စသည့်အချက်တို့ကြောင့် တားမြစ်ထားခြင်းဖြစ်ကာလိုအပ်ချက်များကို ဒေသခံပြည်သူများ၊တာဝန်ရှိသူများအားလုံး ပူးပေါင်းပြီး လုပ်ဆောင်မည့်အပြင် မြို့သစ်ဧရိယာ ဧက ၂၀၀၀ ဝန်းကျင်
တိုးချဲ့ဖော်ဆောင်သွားမည်ဖြစ်ကြောင်း သိရသည်။

”ပလက်ဝမြို့ တိုးချဲ့ဖို့လုပ်နေတယ်။ မြို့သစ်လို့လဲပြောလို့ရတယ်။
အဲဒီမြို့သစ် အကောင်အထည်ဖော်တာနဲ့ နိုင်ငံခြားသား ခရီးသည်များ သွားလာခွင့်ရဖို့ အစိုးရကို တောင်းဆိုမယ်။
၂၀၁၅-၂၀၁၆ မှာ မြေညှိတာတွေ အပြီးလုပ်ဖို့ စီစဉ်ထားတယ်။

လမ်းတွေလဲဖောက်နေတယ်။
ဒါတွေ အကောင်အထည် ဖော်ပြီးရင်တော့ နိုင်ငံခြားသား ခရီးသွားလာခွင့်လဲ တောင်းဆိုမယ်။
အရင်ကလဲ တောင်းဆိုထားပေမယ့် လိုအပ်ချက်တွေရှိလို့ ဖွင့်မပေးတာ လို့သိရတယ်။

ဒါကြောင့် ကိုယ့်ဘက်ကလဲ
လိုအပ်ချက်တွေကို ပြီးမြောက်အောင် လုပ်ထားဖို့လိုတယ်”ဟု သစ်တောနှင့် သတ္တုရေးရာဝန်ကြီးက ဆက်လက်ဆိုသည်။

ပလက်ဝမြို့သို့ နိုင်ငံခြားသား ခရီးသွားဧည့်သည်ဝင်ရောက် သွားလာခွင့်ပြုပါက ယင်းမြို့လည်း ပိုမိုဖွံ့ဖြိုးတိုးတက်မှု
ရှိလာမည့်အပြင် ဒေသခံတိုင်းရင်းသားများအတွက်လည်း စီးပွားရေးအခြေအနေများ ပိုမိုကောင်းမွန်လာ
နိုင်မည်ဖြစ်ကြောင်း သိရသည်။

၎င်းကိစ္စနှင့်ပတ်သက်ပြီး မြန်မာနိုင်ငံ ခရီးသွားလုပ်ငန်းအဖွဲ့ချုပ် ဥက္ကဋ္ဌ ဦးအောင်မြတ်ကျော်က
”နိုင်ငံခြားသားခရီးသွားလာခွင့်ကန့်သတ်ထားတဲ့ နေရာဒေသတွေအကုန်လုံးကို ခရီးသွားလာခွင့်ပြုဖို့အတွက်ဆိုရင်
ကိုယ့်ဒေသကို ဖွံ့ဖြိုးအောင် အရင်ဆုံးလုပ်သင့်ပါတယ်။ ကိုယ့်ဒေသဖွံ့ဖြိုးပြီဆိုရင် ခရီးသွားလာခွင့်ရအောင် လုပ်ဆောင်နိုင်မှာပါ။ခရီးသွားကန့်သတ်ထားတာက အဲဒီနေရာက လမ်းပန်းဆက်သွယ်ရေးကောင်းရဲ့လား။ လုံခြုံရေးရောကောင်းရဲ့လား၊ဆေးရုံဆေးပေးခန်းရော လုံလောက်ရဲ့လား၊ နေဖို့၊စားဖို့၊တည်းဖို့ရောအဆင်ပြေရဲ့လား။ စတဲ့အချက်တွေအများကြီးရှိတယ်။
အဲဒါတွေအဆင်ပြေရင် ခရီးသွားလာခွင့်ကလဲ သူ့အလိုလိုဖြစ်လာမှာပါ။ ဘယ်နေရာ ဘယ်ဒေသပဲဖြစ်ဖြစ် ကိုယ့်ဒေသကိုဖွံ့ဖြိုးတိုးတက်အောင်လုပ်စေချင်ပါ တယ်။ ခရီးစဉ်အခက်အခဲမရှိဘူးဆိုရင် အနှေးနဲ့အမြန် ခရီးသွားလာခွင့်ရလာကြမယ်လို့ထင်ပါတယ်”ဟု
သုံးသပ်ပြောဆိုသည်။

Credit: Democracy today