နယူးဇီလန်နိုင်ငံ၊ Auckland မြို့ရှိ Penthouse ခန်းတစ်ခန်း ၁ ဒေါ်လာဖြင့် ရောင်းမည်ဟုဆို၊ လေလံအောင်သူအနေဖြင့် ဒေါ်လာ ၃၅၅,၀၀၀ ရရှိဦးမည်ဖြစ်၊ သို့သော် သတိပြုရမည့်အချက်ရှိနေ

ယခုရက်သတ္တပတ်အတွင်း နယူးဇီလန်မှ penthouse ခန်းတစ်ခန်းကို လေလံတင်ရောင်းချရန် ရှိနေပြီး ၁ ဒေါ်လာဖြင့် ရောင်းထွက်ဖွယ်လည်း ရှိသည်။

နယူးဇီလန်နိုင်ငံ၊ Auckland မြို့၊ 3A/12 Morningstar Place တွင် တည်ရှိသောအခန်းဖြစ်ပြီး် အလွန်နည်းပါးသော ကြမ်းခင်းဈေးဖြင့် လေလံတင်လာခြင်းလည်းဖြစ်သည်။

သို့သော် ဝယ်ယူလိုသူအနေဖြင့်မူ ငွေကြေးများစွာ သုံးစွဲနိုင်ရန် လိုအပ်သည်။ ဈေးကွက်တင်ကြော်ငြာတွင် ဖော်ပြချက်အရ အဆိုပါအခန်းတွင် စိန်ခေါ်မှုများစွာရှိနေကြောင်း ဖော်ပြထားသည်။

သြစတေးလျ၏ အကြီးမားဆုံး အိမ်ခြံမြေကုမ္ပဏီဖြစ်သော Ray White က နယူးဇီလန်အခြေစိုက် အိမ်ခြံမြေ ရောင်းဝယ်ငှား-သတင်းဝက်ဘ်ဆိုက်ဖြစ်သော Oneroof မှတဆင့် ကြော်ငြာလာခြင်း ဖြစ်သည်။

Ray White ၏ ကြော်ငြာတွင် ဖော်ပြထားမှုအရ အိပ်ခန်း ၃ ခန်းပါ ယခု penthouse ခန်းသည် ရဲဝံ့ စွန့်စားလိုသူတို့နှင့် သင့်တော်ကြောင်း၊ ထိုသို့သောသူမျိုး မဟုတ်ပါက ဆက်မဖတ်သင့်ကြောင်း ဖော်ပြသည်။

(အိပ်ခန်း ၃ ခန်းပါ penthouse ခန်းကို တစ်နှစ်ခန့် အချိန်ယူကာ ပြန်လည်ပြင်ဆင်ရမည်ဖြစ်ပြီး ထိုအချိန်အတွင်း လူနေထိုင်နိုင်ခြင်းရှိမည်မဟုတ်ချေ။ ဓာတ်ပုံ-Supplied)

“ရောင်းချသူက ဦးတည်ချက်တစ်ခုပဲရှိပါတယ်။ ဒီကနေ ထွက်ဖို့ပါ” St Lukes Gardens Apartments ကွန်ပလက်သည် နယူးဇီလန်၏ အဆိုးရွားဆုံး မိုးမလုံသည့် အဆောက်အအုံအဖြစ် နာမည်ကြီးသည်။

“လူနေမှုငရဲ- တိုက်ခန်း ကပ်ဘေးများ” (Living Hell: Apartment Disasters) အမည်ရှိ documentary တစ်ခုတွင်ပင် ထည့်သွင်းရိုက်ကူးဖော်ပြခံခဲ့ရပြီး ပြီးခဲ့သောနှစ်အတွင်းက ထုတ်လွှင့်ပြသခဲ့သည်။

၂၀၀၃ ခုနှစ်မှ ၂၀၁၁ ခုနှစ်အကြား ဆောက်လုပ်ခဲ့ခြင်းဖြစ်ပြီး မျက်နှာစာတွင် အက်ကွဲကြောင်းများ၊ ဖောင်ဒေးရှင်းမှာ အန္တရာယ်ရှိလောက်အောင် အဆင့်မမီခြင်း အစရှိသည်တို့ အပါအဝင် ချွတ်ယွင်းချက်များ၊ ယိုစိမ့်မှုများ ဆိုးရွားစွာ ရှိနေသည်။

ထိုအိမ်ရာကွန်ပလက်တွင် အခန်းပိုင်ဆိုင်ထားသူတို့က နစ်နာကြေး ဒေါ်လာ သန်း ၆၀ ရလိုကြောင်း တရားစွဲဆိုခဲ့မှုကို ၂၀၁၆ ခုနှစ်အတွင်း နှစ်ဦးနှစ်ဘက် ညှိနှိုင်းဖြေရှင်းမှုများ ပြုလုပ်ခဲ့သည်ဟု ဆိုသည်။

သို့သော် လျော်ကြေးပေးသည့် ငွေပမာဏမှာ ကုန်ကျစရိတ်ကို မကာမိဘဲ နည်းပါးသည့် ပမာဏသာဖြစ်သည်။

ယခု penthouse ခန်းရောင်းချမည့်အခန်းပိုင်ရှင် အပါအဝင် အခန်းပိုင်ရှင်အချို့မှာ ပြင်ဆင်စရိတ်များ ထပ်မံ မြင့်တက်မလာမီ ရောင်းထုတ်ရန် ဆုံးဖြတ်လာကြသည်။

Ray White ကုမ္ပဏီမှ အကျိုးဆောင်ဖြစ်သူ Grant Elliott က OneRoof အိမ်ခြံမြေသတင်းဌာနသို့ ပြောသည်မှာ penthouse ခန်း ပိုင်ရှင်မှာ နစ်နာကြေးအဖြစ် ဒေါ်လာ ၃၅၅၀၀၀ ရရှိမည်ဖြစ်ကြောင်း၊ သို့သော် ပြင်ဆင်စရိတ် ဒေါ်လာ ၁ သန်းကုန်ကျမည်ဖြစ်ရာ ကုန်ကျစရိတ်၏ ၃ ပုံ ၁ ပုံမျှသာ ရရှိခြင်းဖြစ်ကြောင်း ပြောသည်။

အခန်းပိုင်ရှင် အမျိုးသားက ယခု penthouse ခန်းကို လွန်ခဲ့သော ဆယ်စုနှစ်တစ်ခုခန့်က ဝယ်ယူခဲ့ခြင်းဖြစ်ပြီး ဒေါ်လာ ၅၁၅၀၀၀ ပေးခဲ့ရသည်။

ယခုအခါတွင်မူ ၎င်းက ၁ ဒေါ်လာဖြင့် ရောင်းထုတ်ရန် စီစဉ်လာသည်။

“လက်ရှိပိုင်ရှင်က ပြင်ဆင်စရိတ် မတတ်နိုင်တော့တာကြောင့် ရောင်းချဖို့ ဆုံးဖြတ်ခဲ့ပါတယ်” ဟု Elliott က ပြောသည်။

လေလံတွင် ၁ ဒေါ်လာဖြင့်လည်း ဝယ်ယူရရှိနိုင်မည်ဖြစ်ကြောင်း၊ လေလံအောင်သူသည် အခန်း၏ လျော်ကြေး ဒေါ်လာ ၃၅၅၀၀၀ ရရှိမည်ဖြစ်ကြောင်း၊ သို့သော် ပြင်ဆင်ရန်အတွက် ဒေါ်လာ ၇၀၀၀၀၀ ခန့် ထပ်မံကုန်ကျဦးမည်ဖြစ်ကြောင်း Elliott က ပြောသည်။

(St Lukes Gardens Apartments ကွန်ပလက်စ်ကို တွေ့ရပုံ။ ဓာတ်ပုံ-Supplied)

(ယခုအိမ်ရာရှိ အခန်းကျဉ်းတစ်ခုမှာ ပြီးခဲ့သော ဒီဇင်ဘာလအတွင်း ဒေါ်လာ ၁၇၅၀၀ ဖြင့် ရောင်းထွက်ခဲ့သည်။ ဓာတ်ပုံ-Supplied)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Auckland penthouse for sale for $1, looking for ‘reckless buyer’ Photo Credit-Supplied