ပြည်ပ အိမ်ခြံမြေ သတင်း | Posted by နှင်းအိခင်
ပြင်သစ်နိုင်ငံအလယ်ပိုင်း Loire တောင်ကြားဒေသ၊ အွန်ဘွိုက်စ်မြို့ (Amboise) ရှိ စားသောက်ဆိုင်တစ်ခု၏ တင်းကြပ်သော စည်းမျဉ်းအပေါ် လူမှုကွန်ရက်တွင် အမျိုးမျိုးအဖုံဖုံ ပြောဆိုဝေဖန်လျက်ရှိကြသည်။
အွန်ဘွိုက်စ်မြို့မှ ထိုင်ခုံ ၂၀ သာဆန့်သော Lilot အမည်ရှိ စားသောက်ဆိုင်လေး၏ စားဖိုမှူး၊ ဆိုင်ရှင်ဖြစ်သူ အိုလီဗီယာ ဗင်းဆင့် (ပြင်သစ်အသံထွက်အားဖြင့် အော်လီဗြီ ဗာဆွန်း) သည် ကြိုတင်စာရင်းပေးထား (reservation) သည့် လူဦးရေထက် ပိုရောက်လာခြင်း၊ လျော့နည်းရောက်ရှိလာခြင်းများအပေါ် ဒဏ်ကြေးကောက်ခံမှုများ စတင်လုပ်ဆောင်လျက် ရှိသည်။
ကြိုတင်စာရင်းပေးထားသည့်ဦးရေအောက် လျော့နည်းရောက်ရှိလာခြင်း၊ လူပိုများပြားလာခြင်းများ မကြာခဏ ရင်ဆိုင်လာရပြီးနောက် ဗင်းဆင့်က ယခုကဲ့သို့ သတ်မှတ်လိုက်ခြင်း ဖြစ်သည်။
(L’îlot စားသောက်ဆိုင်သည် လက်ရှိအားဖြင့် Google တွင် ကြယ်အဆင့် 4.7 ရရှိထားသည်။ အမြင်အားဖြင့် အညတရဖြစ်သော်လည်း အစားအသောက်အလွန်ကောင်းသည်ဟု နာမည်ကြီးသည်။ ဓာတ်ပုံ-The Island Restaurant / Facebook)
ဗင်းဆင့်က Facebook တွင် ရေးသားဖော်ပြခဲ့သည်မှာ လူဦးရေ အပြောင်းအလဲရှိသည်ကို ကြိုတင်အသိမပေးပါက လျော့နည်းသွားသူ (သို့မဟုတ်) လူဦးရေပိုလာသူ တစ်ဦးလျှင် ၁၅ ယူရို (ကန်ဒေါ်လာ ၁၇ ဒသမ ၂၇ ဒေါ်လာ) ကောက်ခံသွားမည်ဖြစ်ကြောင်း ဆိုသည်။
(ဗင်းဆင့်က Facebook ပို့စ်တွင် “အခုချိန်ကစပြီး ကြိုတင်စာရင်းပေးထားတဲ့ လူဦးရေအတိုင်း ရောက်မလာရင် လူကြီးမင်းတို့အနေနဲ့ လျော့နည်းသွားတဲ့ လူဦးရေအတွက် (ဒါမှမဟုတ်) ပိုလာတဲ့ လူဦးရေအတွက် တစ်ဦးကို ၁၅ ယူရိုကောက်ခံမှာဖြစ်ပါတယ်” ဟု ရေးသားဖော်ပြထားသည်။ ဓာတ်ပုံ-The Island Restaurant / Facebook)
ဗင်းဆင့်သည် ထိုပြဿနာကို ကိုဗစ်ကပ်ဘေးကာလကတည်းက အမြဲလိုလို ရင်ဆိုင်နေရသည်ဟု ဆိုသည်။
ပြီးခဲ့သော တနင်္ဂနွေနေ့ကမူ ညစာလာရောက်စားသောက်မည့်သူတစ်ဦးက booking စာရင်းပေးမှုကို အကြိမ်ပေါင်းများစွာ ပြောင်းလဲမှုနှင့် ရင်ဆိုင်ခဲ့ရသည်။
(ကြိုတင်စာရင်းပေးထားသည့် လူဦးရေနှင့် မကိုက်ညီမှုများကို ကိုဗစ်ကပ်ဘေးကာလကတည်းက ကြိမ်ဖန်များစွာ ရင်ဆိုင်လာရကြောင်း ဗင်းဆင့်က ပြောသည်။ ဓာတ်ပုံ- Scott Griessel – stock.adobe.com)
“အမျိုးသမီးတစ်ဦးက စာရင်းပေးထားရာမှာ ပထမ ၈ ယောက်၊ နောက်တစ်ခါ ၉ ယောက် ..စသဖြင့် အီးမေး ၁၀ စောင်လောက်ပို့နေပြီး နောက်ဆုံးကျ ၇ ယောက်ပဲ ရောက်လာပါတယ်။ ကြိုတင်အကြောင်းကြားတာ တောင်းပန်တာ မလုပ်ခဲ့ပါဘူး” ဟု ဗင်းဆင့်က နယူးယောက်ပို့စ် သတင်းဌာနသို့ ပြောသည်။
ထိုင်ခုံနည်းပါးသောဆိုင်ဖြစ်သောကြောင့် အတိအကျတွက်ချက် လည်ပတ်နေရရာ ကြိုတင်အကြောင်းကြားထားပါက ကမောက်ကမ ဖြစ်ရမှု မရှိနိုင်ကြောင်း ဗင်းဆင့်က ပြောသည်။
(အဓိကအကြောင်းရင်းမှာ ဆိုင်တွင် ထိုင်ခုံ ၂၀ သာ ရှိသောကြောင့် ဖြစ်သည်။ ဓာတ်ပုံ-The Island Restaurant / Facebook)
“လူတိုင်းဟာ အိတ်ထဲမှာ ၂၄ နာရီလုံး ဖုန်းရှိပါတယ်။ ကြိုတင်စာရင်းပေးတာ လုပ်ဖို့ အချိန်ရှိတယ်ဆိုရင် လူဦးရေ အပြောင်းအလဲကို အကြောင်းကြားဖို့ (ဒါမှမဟုတ်) မလာဖြစ်ဘူးဆိုတာ အသိပေးနိုင်ရမှာ ဖြစ်ပါတယ်” ဟု ဗင်းဆင့်က ပြောသည်။
သို့သော် လူတိုင်းကမူ ဗင်းဆင့်၏ စည်းမျဉ်းကို သဘောမတူချေ။
အချို့က ပြောသည်မှာ နောက်ဆုံးနီးကပ်သည့်အချိန်ရောက်မှ ကျန်းမာရေးအရေးပေါ်ကိစ္စဖြစ်လာခြင်းနှင့် မမျှော်လင့်ထားသော အခြေအနေတစ်ရပ်ပေါ်ပေါက်လာခြင်းတို့ ရင်ဆိုင်ရသူများအတွက် မမျှတကြောင်း ပြောသည်။
“ခင်ဗျားလည်း မီးဖိုဆောင်မှာ ပြဿနာတစ်ခုရှိလို့ စားသုံးသူက အကြာကြီးစောင့်နေရတယ်ဆိုရင် ၁၅ ယူရို ပြန်အမ်းလား” ဟု လူမှုကွန်ရက်အသုံးပြုသူတစ်ဦးက မှတ်ချက်ပေးသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Believe It Or Not, This French Restaurant Has A ₹1,500 Fine For No-Show
