ပထမပုဂ္ဂလိကဘဏ်၏ ရှယ်ယာတစ်စုလျှင် အမြင့်ဆုံး ကျပ် ၄၄၀၀၀၊ အနိမ့်ဆုံးဈေး ကျပ် ၃၄၀၀၀ နှင့် ကြမ်းခင်းဈေးအဖြစ် ရှယ်ယာတစ်စု ကျပ် ၃၉၀၀၀ သတ်မှတ်

ရန်ကုန်စတော့ အိတ်ချိန်း၏ စတုတ္ထမြောက် စာရင်းဝင် ကုမ္ပဏီဖြစ်လာခဲ့သည့် ပထမပုဂ္ဂလိကဘဏ်၏ ရှယ်ယာတစ်စုလျှင် အမြင့်ဆုံးဈေးအဖြစ် ကျပ် ၄၄၀၀၀၊ အနိမ့် ဆုံးဈေး ကျပ် ၃၄၀၀၀ နှင့် ကြမ်းခင်းဈေးအဖြစ် ရှယ်ယာတစ်စု ကျပ် ၃၉၀၀၀ သတ်မှတ်လိုက်ကြောင်း ရန်ကုန်စတော့အိတ်ချိန်းမှ ဇန်န၀ါရီ ၁၉ ရက်တွင် သတင်းထုတ်ပြန်သည်။

ရန်ကုန်စတော့ အိတ်ချိန်းတွင် ပထမ ဆုံး စတင်ရောင်းချခဲ့သည့် FMI ရှယ်ယာသည် ကြမ်းခင်းဈေး ကျပ် ၂၆၀၀၀ ဖြင့်စတင်ခဲ့ပြီး အမြင့်ဆုံးဈေးတွင် ကျပ် ၃၁၀၀၀ နှင့် အနိမ့်ဆုံးဈေးတွင် ကျပ် ၂၁၀၀၀ သတ်မှတ်ခဲ့ရာတွင် အမြင့်ဆုံးဈေးဖြင့် စတင်ရောင်းချ နိုင်ခဲ့သည်။ ထို့အတူ သီလ၀ါ ရှယ်ယာသည်လည်း အမြင့်ဆုံးဈေးအဖြစ် သတ်မှတ်သည့် ရှယ်ယာတစ်စု ကျပ် ၅၀၀၀၀ ဖြင့် အရောင်းအ၀ယ် ဖြစ်ခဲ့သကဲ့သို့ မြန်မာနိုင်ငံသားများ ဘဏ်သည်လည်း အမြင့်ဆုံးဈေးအဖြစ် သတ်မှတ်သည့်နှုန်းထား ကျပ် ၇၈၀၀ ဖြင့်ပင် စတင်အရောင်းအ၀ယ် ဖြစ်ခဲ့သဖြင့် ပထမ ပုဂ္ဂလိကဘဏ်၏ ရှယ်ယာသည်လည်း စတင်ရောင်းချသည့်နေ့တွင် အမြင့်ဆုံးဈေးဖြစ်သည့် ကျပ် ၄၄၀၀၀ ဖြင့်ပင် အရောင်းအ၀ယ် ဖြစ်ပေါ်နိုင်မည်ဟု ဈေးကွက်အတွင်း ခန့်မှန်းနေသည်။

ရန်ကုန်စတော့ အိတ်ချိန်းသို့ ၀င်ရောက်မည့် ပထမ ပုဂ္ဂလိကဘဏ်၏ ရှယ်ယာတစ်စု တန်ဖိုးမှာ လက်ရှိရောင်းဈေး၏ နှစ်ဆခန့်ရှိနေပြီး ပြီးခဲ့သည့် ဘဏ္ဍာနှစ်တွင် ၀င်ငွေခွန် ကျပ်သန်းပေါင်း ၂၁၃၇ ကျော် ပေးဆောင်ခဲ့ကြောင်း ပထမ ပုဂ္ဂလိကဘဏ်၏ (၉) ကြိမ်မြောက် အထူးအစည်းအဝေးနှင့် (၂၅) ကြိမ်မြောက် နှစ်ပတ်လည် အထွေထွေ အစည်းအဝေးသို့ တင်သွင်းသည့် ဒါရိုက်တာအဖွဲ့၏ အစီရင်ခံစာအရ သိရသည်။ ပြင်ပစာရင်းစစ် အစီရင်ခံစာအရ အစုတစ်စု တန်ဖိုးမှာ ယမန်နှစ် ဘဏ္ဍာနှစ်တွင် ကျပ် ၂၁၉၈၄ ရှိပြီး ဘဏ်ပိုင်မြေနှင့် အဆောက်အအုံများ၏ အသားတင် တိုးလာသည့် ကာလတန်ဖိုးများကို ထည့်သွင်းတွက်ချက်မည် ဆိုပါက အစုတစ်စုတန်ဖိုးမှာ ရှယ်ယာရောင်းဈေး၏ နှစ်ဆခန့် ရှိနေခြင်းဖြစ်သည်။ ပထမပုဂ္ဂလိကဘဏ် အနေဖြင့် ဘဏ်ပိုင်မြေနှင့် အဆောက်အအုံများ၏ ကာလတန်ဖိုးမှာ ၂၀၁၆ ခုနှစ် စက်တင်ဘာတွင် ကျပ် ၃၁၆၉၉ သန်းကျော် ရှိနေကြောင်း အစီရင်ခံစာအရ သိရသည်။

လက်ရှိအချိန်အထိ ပထမပုဂ္ဂလိက ဘဏ်၏ မတည်ရင်းနှီးငွေမှာ ကျပ် ၇၆ ဘီလျံကျော်ရှိပြီး ဘဏ်ခွဲ ၃၂ ခု ဖွင့်လှစ်ထားကာ လာမည့် ဘဏ္ဍာနှစ်အတွင်း ဘဏ်ခွဲခုနစ်ခု ထပ်မံဖွင့်လှစ်ရန် စီစဉ်ထားသည်။ ဘဏ်၏ ရှယ်ယာတစ်စု တန်ဖိုးကို ၂၀၁၆ ခုနှစ် မေ ၂ ရက်က ကျပ် ၃၀၀၀၀ အဖြစ် တိုးမြှင့်သတ်မှတ်ခဲ့ပြီး ၂၀၁၅-၂၀၁၆ ဘဏ္ဍာနှစ်အတွက် ရှယ်ယာတစ်စုလျှင် ၀င်ငွေ ၂၉၈၄ ကျပ် ရရှိခဲ့သည်။

ရန်ကုန်စတော့အိတ်ချိန်း၏ စတုတ္ထမြောက် ကုမ္ပဏီအဖြစ် ပထမပုဂ္ဂလိကဘဏ် စာရင်းဝင်လာပြီး အစုရှယ်ယာများကို ဇန်န ၀ါရီ ၂၀ ရက်တွင် စတင်ရောင်းချမည် ဖြစ်သော်လည်း အစုရှယ်ယာ အမှတ် ၂၉၈၈၉ မှ ၃၁၄၃၉ အထိ အစုရှယ်ယာများမှာ လာမည့် ဧပြီ ၂၀ ရက်တွင်မှ ရန်ကုန်စတော့ အိတ်ချိန်းတွင် စတင်ရောင်းချနိုင်မည်ဟု ပထမပုဂ္ဂလိကဘဏ်က ထုတ်ပြန်ထားသည်။


Credit: Eleven Media Group