မန္တလေးအိုးအိမ်ဦးစီးဌာနမှ ဆောက်လုပ်သည့် တိုက်ခန်း ၄၀၀ အား လျှောက်ထားသူ ကိုးထောင်ကျော်ရှိ

မန္တလေးတိုင်းဒေသကြီးအတွင်း ချမ်းမြသာစည်မြို့နယ် မြရည်နန္ဒာရပ်ကွက် ၌ တိုင်းဒေသကြီး အိုးအိမ်ဦးစီးဌာနက ဆောက်လုပ်သည့် တိုက်ခန်း ၄ဝဝ အတွက် လုပ်သက် ၂၅ နှစ်အထက် တာဝန်ထမ်းဆောင်ဆဲ ဝန်ထမ်းများအား ရောင်းချပေးမည် ဖြစ်ရာ လျှောက်ထားသူ ၉၁၈၈ ဦးရှိကြောင်း မြို့တော်စည်ပင်သာယာရေးကော်မတီမှ သိရသည်။

ယခင် မြရည်နန္ဒာ တန်ဖိုးနည်းအိမ်ရာချထားပေးစဉ်က ခရိုင်အတွင်းမှ လျှောက်ထားခဲ့ကြသည့် လုပ်သက် ၂၅ နှစ်အထက် တာဝန်ထမ်းဆောင်ဆဲ ဝန်ထမ်း ၆၆၈၈ ဦးနှင့် ယခု ဖေဖော်ဝါရီ ၂၆ ရက်မှ မတ် ၄ ရက်အထိ တိုင်းဒေသကြီးအတွင်းမှ လျှောက်ထားသူဦးရေ ၂၅ဝဝ ကျော် စုစုပေါင်း ၉၁၈၈ ဦးအား နေရာချထားပေးမည်ဖြစ်ကြောင်း၊ အိုးအိမ်ဦးစီးဌာနမှ ဆောက်လုပ်ထားသည့် အဆောက်အအုံမှာ ၆၅၀ စတုရန်းပေ ကျယ်ဝန်းသည့် အခန်း လေးခန်းတွဲ လေးထပ် ၂၅ လုံး စုစုပေါင်းတိုက်ခန်း ၄ဝဝ ရှိကြောင်း သိရသည်။

''လက်ရှိလျှောက်ထားသူတွေသာမက ယခင် မြရည်နန္ဒာတန်ဖိုးနည်း အိမ်ရာလျှောက်ထားခဲ့ကြတဲ့ခရိုင်အတွင်းက လုပ်သက် ၂၅ နှစ်အထက် တာဝန်ထမ်းဆောင်ဆဲ ဝန်ထမ်း တွေရဲ့ လျှောက်လွှာတွေကို ယခုတိုက်ခန်းတွေမှာ ဝယ်ယူခွင့်ထည့်သွင်းပေး သွားမှာ ဖြစ်ပါတယ်။ ထပ်မံလျှောက်ထားစရာ မလိုတော့ပါဘူး” ဟု မန္တလေး မြို့တော်စည်ပင်သာယာရေး ကော်မတီ၊ အဆောက်အအုံနှင့် ကုန်ရုံဌာနမှ တာဝန်ရှိသူတစ်ဦးက ပြောသည်။

တိုက်ခန်းတန်ဖိုးများမှာ မြေညီထပ် ၁၆၅ သိန်း၊ ပထမထပ် ၁၅၅ သိန်း၊ ဒုတိယထပ် ၁၄၅ သိန်းနှင့် တတိယထပ် ၁၃၅ သိန်းတို့ဖြစ်ကြောင်း၊ ဝယ်ယူခွင့် လျှောက်လွှာများကို ဖေဖော်ဝါရီ ၂၆ ရက်မှ မတ် ၄ ရက်အထိ တစ်စောင်လျှင် ငွေကျပ် ၅ဝဝ ဖြင့် ရောင်းချပေးခဲ့ပြီး မတ် ၇ ရက်မှ ၁၆ ရက်အတွင်း ယင်းလျှောက်လွှာများကို မြို့တော်စည်ပင်သာယာသို့ ပြန်လည်လျှောက်ထား
ရမည်ဖြစ်ကြောင်း သိရသည်။

Credit: MOI Webportal Myanmar