Dagon City 1 စီမံကိန်းအား ပေ(၆၀) အမြင့်ဆုံးသာ ဆောက်လုပ်ခွင့် ပြုမည် ဖြစ်ကာပေ (၆၀) ထက် ကျော်လွန်ပါက လုံးဝ ဆောက်လုပ်ခွင့် ပေးမည် မဟုတ်ကြောင်း ရန်ကုန်မြို့တော် စည်ပင်သာယာရေး ကော်မတီဝင် ဦးခင်လှိုင်က ပြောသည်။ ဘယ်လို စစ်ဆေးချက် ထွက်လာ ထွက်လာ ပေ (၆၀) ထက်ကျော် ရင်တော့ လုံးဝ ဆောက်ခွင့်ပေးမှာ မဟုတ်ဘူး။ ဒီအဆောက်အဦမှ မဟုတ်ဘူး၊ ဘယ်အဆောက်အဦ မဆို ဘုရားနဲ့ နီးရင် ကန့်သတ် မှာပဲ ဟု ၎င်းက ပြောသည်။
Dagon City 1 စီမံကိန်းသည် ရွှေတိဂုံ ဘုရား အနီးတွင် (၁၂) ထပ်အမြင့် တည်ဆောက်မည် ဖြစ်၍ စီမံကိန်း ဆောက်လုပ်ခွင့် ပေးနိုင်ခြင်း ရှိမရှိ အတွက် အင်ဂျင်နီယာ ကော်မတီမှ တာဝန်ယူ စစ်ဆေးနေပြီး၊ လက်ရှိတွင် စီမံကိန်း ရပ်ဆိုင်းခိုင်း ထားကြောင်း သိရသည်။ Dagon City 1 က ပင်လယ်ရေ မျက်နှာပြင် အထက် ပေ(၁၉၀) ထိ တည်ဆောက်ခွင့် ရှိပြီး သားပါ။ အမြင့်ပေ တစ်ခုတည်းနဲ့ တိုင်းတာလေ့ မရှိပါဘူး။ အဆောက်အအုံ တစ်ခုမှာ အထပ်တိုင်း အမြင့်ပေ မတူတာ တွေလည်း ရှိပါတယ်။ အဲဒါကြောင့် စီမံကိန်းက ဥပဒေနဲ့ စည်းမျဉ်း စည်းကမ်း အရ ပင်လယ်ရေ မျက်နှာပြင် အထက် ပေ(၁၉၀) ရဲ့ အောက်မှာပဲ ရှိနေမှာပါ ဟု Dagon City 1 အား တာဝန်ယူ ဆောက်လုပ်မည့် Marga Land Mark မှ တာဝန်ရှိသူ တစ်ဦးက ပြောသည်။
ထို့ကြောင့် စီမံကိန်းသည် သတ်မှတ် စည်းမျဉ်းများနှင့် အညီသာ ဆောက်လုပ် သွားမည် ဖြစ်ပြီး၊ အင်ဂျင်နီယာ ကောင်စီ၏ စစ်ဆေး နေသည့် အဖြေကိုသာ လိုက်နာ သွားမည် ဖြစ်ကြောင်း ၎င်းက ဆိုသည်။ Dagon City 1 စီမံကိန်းသည် ရွှေတိဂုံ ဘုရားနှင့် နီးကပ်စွာ တည်ရှိနေ ခြင်းကြောင့် စီမံကိန်း ဆောင်ရွက်ပါက ရွှေတိဂုံ ဘုရား မြင်ကွင်းကို ကွယ်စေနိုင်သည့် အတွက် ပြည်သူများ၏ ဝေဖန်မှုများ ရှိနေသည့် စီမံကိန်း တစ်ခု ဖြစ်သည်။
Credit: messenger
