ဗြိတိန်ဝန်ကြီးချုပ် ဝင်စတန်ချာချီမွေးဖွားခဲ့သော အိမ်တော်တွင် ထားရှိသည့် ဒေါ်လာ ၆ ဒသမ ၄ သန်းတန် ဘိုထိုင်ရွှေအိမ်သာကြီး ခိုးယူခံရမှုတွင် ကူညီရောင်းချပေးခဲ့သည့်အမျိုးသား ဆိုင်းငံ့ထောင်ဒဏ်ချမှတ်ခံရ

ဗြိတိန်တွင် ပေါင် ၄ ဒသမ ၇၄ သန်း (ကန်ဒေါ်လာ ၆ ဒသမ ၄ သန်း) တန်ကြေးရှိ ဘိုထိုင်ရွှေအိမ်သာကြီး ခိုးယူခံရမှုတွင် သူခိုးများအား ကူညီရောင်းချပေးခဲ့သည့် အမျိုးသားကို တရားသူကြီးက သူခိုးတို့၏ အသုံးချခံရသည်ဟု ဆုံးဖြတ်ကာ ဆိုင်းငံ့ထောင်ဒဏ်သာ ချမှတ်ခဲ့သည်။

ဒုတိယကမ္ဘာစစ်ကြီးအတွင်း ဗြိတိန်ဝန်ကြီးချုပ်အဖြစ် တာဝန်ထမ်းဆောင်ခဲ့သော ဝင်စတန်ချာချီ မွေးဖွားကြီးပြင်းခဲ့သည့် Blenheim Palace တွင် ထားရှိသော ရွှေအိမ်သာကြီးမှာ ၂၀၁၉ ခုနှစ်အတွင်းက ခိုးယူခံခဲ့ရခြင်းဖြစ်သည်။

ရွှေအိမ်သာကြီးအား သူခိုးတို့က မည်သို့မည်ပုံ ခိုးယူကြပုံကို အောက်ဖော်ပြပါ လင့်ခ်တွင် ပြန်လည်ဖတ်ရှုနိုင်ပါသည်။

(ဆက်စပ်သတင်း)

အင်္ဂလန်တွင် ၁၈ ကာရက်ရွှေဖြင့် ပြုလုပ်ထားသော ဘိုထိုင် ရွှေအိမ်သာကြီး ခိုးယူခံလိုက်ရ၊ ပိဿာချိန် ၆၀ နီးပါးရှိပြီး ရွှေတန်ကြေးပင်လျှင် ဒေါ်လာ ၃ ဒသမ ၅ သန်းရှိကာ ဒေါ်လာ ၆ သန်းတန် အာမခံ ထားထားသော ရွှေအိမ်သာဖြစ်

https://www.imyanmarhouse.com/news/read/1140192

အသက် ၃၇ နှစ်အရွယ်ရှိ ဖရက်ဒရစ် ဒိုး (Frederick Doe) ကို ၁၈ ကာရက် ရွှေအိမ်သာကြီး ရောင်းချရာတွင် ကူညီပေးမှုဖြင့် Oxford Crown Court က ဆိုင်းငံ့ထောင်ဒဏ်ချမှတ်လိုက်ခြင်း ဖြစ်သည်။

ခိုးမှုကျူးလွန်ရာတွင် လူ ၅ ဦး ပါဝင်ခဲ့သည်ကို CCTV မှတ်တမ်းတွင် ထင်ရှားစွာတွေ့ရကြောင်း၊ ဖရက်ဒရစ်မှာ အဆိုပါ သူခိုးများကို မိုက်မဲစွာ ကူညီခဲ့ကြောင်း တရားသူကြီး Ian Pringle က ပြောသည်။

America ဟု အမည်ပေးထားသော ရွှေအိမ်သာကြီးကို ပြုလုပ်ခဲ့သူမှာ installation အနုပညာရှင် Maurizio Cattelan ဖြစ်ပြီး အလွန်အမင်းချမ်းသာသူတို့ကို လှောင်ပြောင်သောအနေဖြင့် ပြုလုပ်ခဲ့ခြင်း ဖြစ်သည်။

Maurizio သည် ၂၀၂၄ ခုနှစ်အတွင်းကလည်း ငှက်ပျောသီးတစ်လုံးလုံး တိပ်ဖြင့် ကပ်ထားသည့် installation တစ်ခု ပြုလုပ်ခဲ့ရာ အဆိုပါ တိပ်ကပ်ထားသော ငှက်ပျောသီးမှာ ဒေါ်လာ ၆ ဒသမ ၂ သန်းဖြင့် ရောင်းထွက်ခဲ့သည်။

ရွှေအိမ်သာ၏ အလေးချိန်မှာ ၂၁၅ ပေါင်ရှိပြီး ထိုခေတ်ကာလ ရွှေတန်ဖိုး ပေါင် ၂ ဒသမ ၈ သန်းရှိခဲ့ကာ ပေါင် ၄ ဒသမ ၇၄ သန်းဖြင့် အာမခံ ထားထားသည်ဟု ဆိုသည်။

မူလက နယူးယောက်မြို့ရှိ The Guggenheim ပြတိုက်တွင် ပြသထားခဲ့သည်။

ဒေါ်နယ်ထရမ့်က သူ၏ ပထမသမ္မတသက်တမ်းကာလအတွင်း ဗင်းဆင့်ဗန်ဂိုး၏ ပန်းချီကားကို ငှားရမ်းရန် တောင်းဆိုခဲ့ရာ ပန်းချီကားအစား ယခုအိမ်သာကြီးကို ငှားရမ်းပေးခဲ့ခြင်း ဖြစ်သည်။

ရွှေအိမ်သာကြီးမှာမူ ပြန်လည်သိမ်းဆည်းနိုင်ခြင်း မရှိတော့ချေ။

အပိုင်းပိုင်းဖြတ်တောက်ကာ ရောင်းစားခြင်းခံရသည်ဟု ယူဆရသည်။

သူခိုးအုပ်စုသည် ၂၀၁၉ ခုနှစ်၊ စက်တင်ဘာလ ၁၄ ရက်တွင် ဝင်စတန်ချာချီ၏ အိမ်တော်ပြတင်းပေါက်ကို ခွဲကာ ဝင်ရောက်ခဲ့သည်။

ထိုအုပ်စုအနက် ၂ ဦးသာ ဖမ်းဆီးအပြစ်ပေးနိုင်သေးသည်။

ခ်ိုးမှုတွင် ပါဝင်ခဲ့သော James Sheen (အသက် ၄၀) နှင့် Michael Jones (၃၉ နှစ်) တို့ကို လာမည့် ဇွန်လ ၁၃ ရက်တွင် အမိန့်ချမှတ်ရန် စီစဉ်ထားသည်။

ရွှေအိမ်သာကြီးရောင်းချရာတွင် အားပေးကူညီခဲ့သူ ဖရက်ဒရစ် ဒိုးကို တရားသူကြီးက ဆိုင်းငံ့ထောင်ဒဏ် ၂ နှစ်နှင့် လုပ်ခမဲ့ နာရီ ၂၄၀ လုပ်အားပေးရန် အမိန့်ချမှတ်လိုက်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Man who tried to sell $6.4m gold toilet stolen from English country house is spared jail (apnews)