ထူးထူးခြားခြား ကမ္ဘာတလွှား ၊ ပါကစ္စတန်တွင် ဗြိတိသျှအရာရှိတစ်ဦး၏ အမိန့်ဖြင့် နှစ်ပေါင်း ၁၂၀ ကျော် ဖမ်းဆီးအရေးယူခံထားရသော ညောင်ပင်ကြီးအကြောင်း

ပါကစ္စတန်နိုင်ငံ၊ ခိုင်ဘာ ပထန်ကွာပြည်နယ်၊ လန်ဒီး ကိုတာလာ (Landi Kotala) မြို့မှ စစ်ဘက်ပိုင် နယ်နိမိတ်အတွင်း တည်ရှိသော ညောင်မုတ်ဆိတ်ပင်ကြီးတစ်ပင်မှာ ဗြိတိသျှအရာရှိတစ်ဦး၏ အမိန့်ဖြင့် ၁၈၉၈ ခုနှစ်တွင် ဖမ်းဆီးအရေးယူခြင်းခံထားရသည်။

နောင်နှစ်ပေါင်း ၁၂၆ နှစ်အကြာ ယနေ့တိုင် ဖမ်းဆီးခံထားရဆဲ ဖြစ်သည်။ ယနေ့တိုင် သံကြိုးများဖြင့် တုပ်နှောင်ကာ ဖမ်းဆီးထားဆဲဖြစ်သည်။ ညောင်ပင်ကြီး ထွက်ပြေးလွတ်မြောက် သွားမည်စိုးသောကြောင့် ဖြစ်သည်။

သင့်တွင် အခြားထင်မြင်ချက်ရှိနိုင်သည်။ သို့သော် နောက်ပြောင်ခြင်းမဟုတ်ပါ။ အမှန်တကယ် ဖမ်းဆီးအရေးယူထားခြင်း ဖြစ်သည်။

ပါကစ္စတန်၏ ထိပ်တန်းသတင်းစာကြီးဖြစ်သော Dawn တွင် အဆိုပါညောင်ပင်ကြီးအကြောင်း ရေးသားဖော်ပြခဲ့ဖူးသည်။

ပါကစ္စတန် သတင်းစာများစွာ၏ ဖော်ပြချက်အရ ညောင်ပင်ကြီး ဖမ်းဆီးခံရခြင်း၏ အကြောင်းရင်းမှာ အောက်ဖော်ပြပါအတိုင်း ဖြစ်သည်။

လွန်ခဲ့သော နှစ်ပေါင်း ၁၀၀ ကျော်….။ အိန္ဒိယနိုင်ငံ ဗြိတိသျှကိုလိုနီဘဝတွင် ရှိခဲ့ချိန်က။

(မှတ်ချက်။ ထိုစဉ်က ပါကစ္စတန်နိုင်ငံ မရှိသေး။ အိန္ဒိယပိုင်နက်အဖြစ်သာ ရှိသေးသည်။)

ဗြိတိသျှစစ်တပ်မှ အရာရှိတစ်ဦးဖြစ်သူ James Squid က ညောင်ပင်အိုကြီးတစ်ပင် ၎င်းထံသို့ ရွေ့လျားလာနေသည်ဟု မှတ်ထင်ခဲ့သည်။

ထိုအချိန်တွင် James Squid မှာ အရက်အလွန်မူးနေသည်ဟု ဆိုသည်။

James က ညောင်ပင်ကြီးကို ကြောက်ရွံ့သွားကာ တပ်မတော်စားရိပ်သာ စားဖိုမှူး တပ်ကြပ်ကြီးအား ညောင်ပင်ကြီးကို ဖမ်းဆီးရန် အမိန့်ပေးခဲ့သည်။

စားရိပ်သာ တပ်ကြပ်ကြီးလည်း အရာရှိ၏ အမိန့်အတိုင်း ပြစ်မှုကျူးလွန်သော ညောင်ပင်ကြီးကို သံကြိုးဖြင့် တုပ်နှောင်ခဲ့သည်။

နောင်နှစ်ပေါင်း ၁၀၀ ကျော်အကြာ ယနေ့တိုင် သံကြိုးဖြင့် ချုပ်နှောင်ဖမ်းဆီးခံထားရဆဲဖြစ်ပြီး ဆိုင်းဘုတ်တစ်ခု ချိတ်ဆွဲထားရာ “ကျွန်တော် အဖမ်းခံထားရပါတယ်”ဟု ရေးသားဖော်ပြထားသည်။

ဖမ်းဆီးခံထားရသော ညောင်ပင်ကြီးကို ကြည့်ရှုရန် နေ့စဉ် လာရောက်လည်ပတ်သူ များစွာ ရှိသည်။

“ဗြိတိသျှကို ဆန့်ကျင် ပုန်ကန်မယ်ဆိုရင် ဒီလို အရေးယူခံရမယ်လို့ သွယ်ဝိုက်ပြသတယ့် သဘောလည်း ဖြစ်ပါတယ်”ဟု ဒေသခံတစ်ဦးက The Tribune သတင်းစာသို့ ပြောသည်။

လန်ဒီးကိုတာသည် ပြည်ထောင်စုက အုပ်ချုပ်သော တိုင်းရင်းသားမျိုးနွယ် မြို့ကလေး ဖြစ်သည်။

အာဖဂန်နစ္စတန်သို့ ဝင်ပေါက် ဖြစ်သော ခိုင်ဘာ တောင်ကြားလမ်း၏ အနောက်ဘက်စွန်းတွင် တည်ရှိသည်။

“ဒီသစ်ပင်ကြီးဟာ မတရားမှုနဲ့ မတရားတဲ့ ဥပဒေတွေကို အမြဲတမ်း သတိရစေမယ့် အရာတစ်ခုပါပဲ”ဟု ဒေသခံတစ်ဦးက ပြောသည်။

လန်ဒီးကိုတာမြို့မှ Khogikheil မျိုးနွယ်စု၏ ခေါင်းဆောင် အသက် ၆၀ အရွယ်ရှိ အစ္စလမ်ခန်း ရှင်းဝါရီက ပြောသည်မှာ ညောင်ပင်ကြီး တည်ရှိသည့် နေရာသည် ယခင်က မိမိတို့ မျိုးရိုးစဉ်ဆက် ပိုင်ဆိုင်ခဲ့သော နေရာဖြစ်ကြောင်း၊ ဗြိတိသျှ စစ်တပ်က သိမ်းယူကာ စားရိပ်သာ ဆောက်လုပ်ခဲ့ခြင်း ဖြစ်ကြောင်း ပြောသည်။

ယခုအခါ ပါကစ္စတန်စစ်တပ်၏ ပိုင်နက်အတွင်း တည်ရှိနေပြီး ကမ္ဘာလှည့်ခရီးသွားများစွာ လည်ပတ်ကြည့်ရှုရာ နေရာ ဖြစ်လာသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Tree in Pakistan remains ‘under arrest’ for 120 years (aa.com.tr)