အမေရိကန် သမ္မတ အပြောင်းအလဲကြောင့် ရွှေဈေး အတက်အကျကြမ်းနိုင်

အမေရိကန် သမ္မတအဖြစ် စီးပွားရေး လုပ်ငန်းရှင်ကြီး ဒေါ်နယ်ထရမ့် တက်ရောက်လာခြင်းကြောင့် ယခုရက်ပိုင်းအတွင်း ကမ္ဘာ့ရွှေဈေး အပြောင်းအလဲ များနိုင်ခြင်းကြောင့် ပြည်တွင်း ရွှေဈေးမှာလည်း အတက်အကျ ကြမ်းနိုင်ကြောင်း ရွှေလုပ်ငန်းရှင်များက ဆိုသည်။

ပြည်တွင်းရွှေဈေး အပြောင်းအလဲသည် တစ်ကျပ်သားလျှင် ကျပ် ၈ဝဝ,ဝဝဝ မှ ၉ဝဝ,ဝဝဝ အတွင်းသာ အတက်အကျ ကြမ်းမည်ဖြစ်ပြီး ကျပ် ၉ဝဝ,ဝဝဝ ကိုမူ ကျော်လွန်နိုင်ခြေ မရှိကြောင်း ၎င်းတို့က သုံးသပ် ပြောဆိုသည်။

ဒေါ်နယ်ထရမ့် သမ္မတအဖြစ် တက်ရောက်သည့်နေ့ (နိုဝင်ဘာ ၉ ရက်) က ကမ္ဘာ့ ရွှေဈေးသည် တစ်အောင်စလျှင် အမေရိကန် ဒေါ်လာ ၁၃၃ဝ ထိ မြင့်တက်ခဲ့ရာမှ နိုဝင်ဘာ ၁ဝ ရက်နေ့တွင်မူ တစ်အောင်စလျှင် ဒေါ်လာ ၁၂၉ဝ သို့ ပြန်လည် ကျဆင်းသွားကြောင်း ရွှေဈေးကွက် အတွင်းမှ သိရသည်။

ထို့ကြောင့် မြန်မာ့ရွှေဈေးသည်လည်း နိုဝင်ဘာ ၉ ရက်နေ့က ၁၆ ပဲရည် တစ်ကျပ်သားလျှင် ကျပ်တစ်သောင်းကျော်ထိ မြင့်တက်ခဲ့သော်လည်း ယခုအခါ တစ်ကျပ်သားလျှင် ကျပ် ၇ဝဝဝ ကျပ်ခန့် ပြန်လည် ကျဆင်းကြောင်း ရန်ကုန်မြို့တော် အတွင်းရှိ ရွှေဆိုင်များထံမှ သိရသည်။

“အရောင်းအဝယ်က ပုံမှန်ပဲ။ မနေ့တုန်းကတော့ ဒေါ်နယ်ထရမ့်ကြောင့် ကုန်သည်အချို့ ရွှေဝယ်စုလိုက်တဲ့အတွက် ကမ္ဘာ့ဈေး တက်သွားတယ်။ ဒီရက်ထဲ ဈေးက အပြောင်းအလဲ များနိုင်တယ်”ဟု ရွှေဆိုင်ပိုင်ရှင် တစ်ဦးဖြစ်သူ ဦးဇော်အောင်က ပြောဆိုသည်။

ရွှေဈေးနှုန်းများသည် နိုဝင်ဘာ ၈ ရက်နေ့က ၁၆ ပဲရည် တစ်ကျပ်သားလျှင် ၈၇၈,ဝဝဝ ကျပ်မှ နိုဝင်ဘာ ၉ ရက်နေ့တွင် ၈၉၁,ဝဝဝ မှ ယခုအခါ ကျပ် ၈၈၄,ဝဝဝ သို့လည်းကောင်း၊ ကမ္ဘာ့ဈေးမှာ နိုဝင်ဘာ ၈ ရက်နေ့က တစ်အောင်စလျှင် အမေရိကန် ဒေါ်လာ ၁၂၇ဝ မှ နိုဝင်ဘာ ၉ ရက်နေ့တွင် ၁၃၃ဝ မှ ယခုအခါ ၁၂၉ဝ သို့လည်းကောင်း အတက်အကျများ ဖြစ်ပေါ်ခဲ့ကြောင်း ရွှေဈေးကွက်အတွင်းမှ သိရသည်။



Credit: The Voice