စိတ်ဝင်စားဖွယ် အိမ်ခြံမြေ အမေးအဖြေများ

ဒီတစ်ပတ်မှာတော့ အိမ်ငှားအဖြစ်မှ အခမဲ့ခွင့်ပြုချက်အရ နေထိုင်သူအဖြစ်ပြောင်းလဲသွားခြင်းအကြောင်း သိလိုပါတယ်။.....ဆိုတဲ့ စိတ်ဝင်စားဖွယ်မေးခွန်းလေးအပါအဝင် မေးခွန်းသုံးခုကို ရှေ့နေမှ တိကျမှန်ကန်စွာဖြေကြားပေးထားပါတယ်။

မေးခွန်း(၁) ။ ။ အိမ်ငှားအဖြစ်မှ အခမဲ့ခွင့်ပြုချက်အရ နေထိုင်သူအဖြစ်ပြောင်းလဲသွားခြင်းအကြောင်း သိလိုပါတယ်။

မူလကငှားရမ်းခြင်း ပဋိညာဉ်စာချုပ်ချုပ်ဆို၍ အငှားတင်ထားသော အိမ်ငှားများမှာ အိမ်ရှင်၏ ခွင့်ပြုချက်အရ နောင်တစ်ချိန်တွင် အခမဲ့ခွင့်ပြုချက်ဖြင့် နေထိုင်သူအဖြစ် ရောက်ရှိသွားနိုင်ပြီး တချို့အိမ်ရှင်၏ ခွင့်ပြုချက်ဖြင့် မူလနေထိုင်သူများမှာ နောင်တချိန်အိမ်ငှားရမ်းခပေးအပ်ပါက မြို့ပြဆိုင်ရာ ဌားရမ်းခကြီးကြပ်ရေး အက်ဥပဒေပုဒ်မ- ၁၃(၁)အရ အိမ်ငှားအဖြစ် ရောက်ရှိသွားနိုင်ပါသည်။

မရွှေ့မပြောင်းနိုင်သောပစ္စည်းကို တစ်နှစ်ပြီးတစ်နှစ် ငှားရမ်းခြင်း၊ တစ်နှစ်ထက်ပို၍ ငှားရမ်းခြင်း၊ ငှားရမ်းခကို နှစ်အလိုက်သတ်မှတ်၍ ငှားရမ်းခြင်းစာချုပ်များမှာ စာချုပ်စာတမ်းမှတ်ပုံတင်ဥပဒေပုဒ်မ-၁၆(ဃ)နှင့်အညီ မှတ်ပုံမဖြစ်မနေ တင်ရှိရန်လိုပါသည်။

အိမ်ငှားမှ လစဉ်ပေးချေနေသော အိမ်ငှားခ (သို့) နှစ်စဉ်ပေးချေနေသော အိမ်ငှားခအား ပေးချေရန် ပျက်ကွက်လျက် ရှိပြီး အိမ်ရှင်မှလဲ ခွင့်ပြုထားလျှင် အိမ်ငှားအဖြစ်မှ အိမ်ငှားခ ပေးရန်မလိုသော အခမဲ့ခွင့်ပြုချက်ဖြင့် နေထိုင်သူအဖြစ်သို့ ရောက်ရှိသွားမည်ဖြစ်ပါသည်။ ခွင့်ပြုချက်ဖြင့်ထားသူအဖြစ် ရောက်ရှိသွားသူအား နှင်လိုသည့်အခါ ကာလစည်းကမ်းသတ်-(၆)နှစ်အတွင်း တရားစွဲဆိုရမည်ဖြစ်ပြီး အိမ်ငှားအား နှင်လိုမှုပြုလိုလျှင် ကာလစည်းကမ်းသတ်-(၁၂)နှစ်အတွင်း တရားစွဲဆို ရမည်ကို သတိပြုသင့်ပါသည်။ ခွင့်ပြုချက်ဖြင့် နေထိုင်သူ (သို့) အိမ်ငှားမှ နေအိမ်အား ဆန့်ကျင်လက်ရှိထားရှိခြင်းမှာ ကာလစည်းကမ်းသတ်ကျော်လွန်လျှင် အိမ်ရှင်မှာ တရားစွဲဆိုနိုင်သည့် အခွင့်အရေးရှိတော့မည်မဟုတ်ပါ။

အိမ်ရှင်မှ အခမဲ့နေထိုင်ခွင့်ပြုထားသူအား ပဋိညာဉ်တစ်ရပ်ချုပ်ဆို၍ နေထိုင်စေသည်များ ရှိသလို ပဋိညာဉ် ချုပ်ဆိုခြင်းမရှိဘဲ နှုတ်ဖြင့် ခွင့်ပြုနေထိုင်စေသည်များလဲရှိပါသည်။ တချို့မှာ အခမဲ့ခွင့်ပြုချက်အတွက် ကာလအပိုင်းအခြား သတ်မှတ်ချက်များရှိသလို တချို့မှာ မည်သည့်ကာလထိ ခွင့်ပြုကြောင်း သဘောတူထားချက်များမရှိပါ။ နေအိမ်အတွင်း ခွင့်ပြုချက်ဖြင့်ထားသူအား ဖယ်ရှားစေသည့်အခါမှ ဆန့်ကျင်လက်ရှိထားကာ ခုခံပြောဆိုလာသည်များလဲရှိပါသည်။

အငှားစာချုပ်ကဲ့သို့ အချိန်ကာလ ကတိပြုချက်မရှိသောကြောင့် ခွင့်ပြုချက်ဖြင့်ထားသူကို မည်သည့် အချိန်တွင်မဆို အိမ်ရှင်မှ နို့တစ်စာပို့၍ နှင်လိုမှုပြုနိုင်ပါသည်။ အိမ်ရှင်မှာ ခွင့်ပြုချက်ပြန်လည် ရုတ်သိမ်းသည်နှင့် အခမဲ့နေထိုင်သူမှာ ဖယ်ရှားပေးရန် တာဝန်ရှိပါသည်။ ခုခံဆန့်ကျင်နေခြင်းဖြင့် ကာလစည်းကမ်းသတ် ကျော်လွန်လျှင်လဲ နေထိုင်သူမှာ ပိုင်ရှင်ဖြစ်လာမည် မဟုတ်ပါ။ အိမ်ထောင်စုလူဦးရေစာရင်း၊ မီတာခနှင့် မြေခွန်ဆောင်ပေးခြင်းမှာလဲ ပိုင်ဆိုင်ခွင့်နှင့် မသက် ဆိုင်ကြောင်း သိရှိထားရပါမည်။

အခမဲ့ခွင့်ပြုချက်ဖြင့် နေထိုင်သူရှိနေသော နေအိမ်အား ဝယ်ယူရန် မသင့်ပါ။ မူလခွင့်ပြုခဲ့သူ ရောင်းချသူ ကိုယ်တိုင်မှသာ နေအိမ်တွင်းရှိနေသူအား နှင်လိုမှု တရားစွဲဆိုနိုင်သောကြောင့် ဖြစ်ပါသည်။ ခွင့်ပြုချက်ဖြင့်နေထိုင်သူမှာထဲတွင် အမွေဆိုင်များပါဝင်နေလျှင်လဲ တရားရုံးမှ အမွေပုံစီမံခန့်ခွဲပေးစေလိုမှုသာ တရားစွဲဆိုစေမည်ဖြစ်ကြောင်း ဖြေဆိုရေးသား ပေးလိုက်ပါသည်။ (ဒါဝတ်အီဘရာ ဟင်ဘိုင်မြားနှင့် ဝိုင်အေ မြား(ခ) ယာတီးယားအားမက်မြား ၁၉၉၀၊ မတစ (အထူး)၆၅)

မေးခွန်း(၂) ။ ။ တိုက်ခန်းဝယ်ပြီး ငွေအကြေးချေပြီးသည့်တိုင်အောင် အိမ်ငှားက မဖယ်ပေးရင် ဘယ်လိုလုပ်ရမလဲ။

အိမ်ငှားများအား ဥပဒေအရ နှင်လိုမှုဖြင့် တရားစွဲဆိုခွင့်ရှိသူမှာ မူလအိမ်ရှင် ရောင်းချသူသာဖြစ်ပါသည်။ ယခုတိုက် ခန်းအား အရပ်ကတိစာချုပ်ဖြင့် လွှဲပြောင်းဝယ်ယူသူမှာ အိမ်ငှားအား နှင်လိုမှု မပြုနိုင်ပါ။ ပစ္စည်းလွှဲပြောင်းခြင်း ဥပဒေနှင့် အညီ အရောင်းအဝယ်ပြုသည့် တိုက်ခန်း၊ နေအိမ်အားဝယ်ယူသူအနေဖြင့် လက်ရောက် ရရှိနိုင်သည့်အချိန်မှသာ အရောင်း အဝယ်တန်ဖိုးငွေအားလုံးအား ပေးချေပြုရမည် ဖြစ်ပါသည်။

မူလတိုက်ခန်း အရောင်းအဝယ်စရန်ပေးစာချုပ် ချုပ်ဆိုစဉ်တည်းက ငွေကြေစာချုပ်ချုပ်ဆိုမည့်အချိန်အား အိမ်ငှားများ ဖယ်ရှားသည့်နေ့ရက် ပေးချေမှုကြရန် ကတိပြုထားလျှင် ပိုမိုသင့်တော်ပါသည်။ ရောင်းချသူနှင့် သက်ဆိုင်သော အိမ်ငှားများ ဖြစ်သည့်အတွက် ယခုအချိန်ထိ အိမ်ငှား မဖယ်ရှားသေးလျှင် ရောင်းသူအား ပြန်လည်တောင်းဆိုမှုပြုပါ။ စာချုပ် တွင် ရောင်းသူတာဝန်အဖြစ် ထည့်သွင်းချုပ်ဆိုမှုပြုထားလျှင် ရောင်းသူမှ ငြင်းဆိုမည်မဟုတ်ပါ။

ရောင်းသူအိမ်ရှင်နှင့် အိမ်ငှားများမှာ ငှားရမ်းခြင်းစာချုပ်အရ အိမ်ငှားများ၏ အခွင့်အရေးများလဲ ရှိနေတတ်ပါသည်။ အမှန်မှာ ငှားရမ်းခြင်းစာချုပ်ပါ ကာလပြည့်မြောက်မှသာ အိမ်ရှင်ရောင်းချသူမှ တိုက်ခန်းအား လွှဲပြောင်း ရောင်းချနိုင်ပါသည်။ အိမ်ငှားများကို ဥပဒေနှင့်အညီသာ ဖယ်ရှားခွင့်ရှိပြီး တိုက်ခန်းအရောင်းအဝယ်အတွက်လဲ အိမ်ငှားများအားလဲ အနည်းဆုံး (၁)လ ကြိုတင် အသိပေးသင့်ပါသည်။ ကြိုတင်အသိပေးရာတွင် အထောက်အထားဖြစ်စေရန် နို့တစ်စာအား စာတိုက်မှတဆင့်ပေးပို့ကာ အိမ်ငှားမှ လက်ခံရယူလျှင် အတည်ဖြစ်စေပါသည်။

ကြိုတင်အသိပေးခြင်းမရှိဘဲ အရောင်းအဝယ်ပြုလုပ်ခြင်း၊ အတင်းအကြပ်နှင်ချခြင်း၊ သော့ဖျက်ခြင်း၊ သောပိတ်ခြင်း၊ လျှပ်စစ်/ရေဖြတ်ခြင်းများ ပြုလုပ်ခွင့်မရှိပါ။

ရောင်းသူမှ မိမိအိမ်ငှားအား ငှားရမ်းခြင်းကို ရပ်စဲကြောင်း နို့တစ်စာပေးပို့ခြင်း၊ ကာလစည်းကမ်းသတ်အတွင်း တရားစွဲဆိုခြင်းပြုကာ ဖယ်ရှားမှသာ တရားဝင်ဖြစ်ပါသည်။ အိမ်ငှားမှာ ငှားရမ်းခပေးချေရန် မလိုသော အခမဲ့ခွင့်ပြုချက်ဖြင့် နေထိုင်သူ ဖြစ်နေပါကလဲ မူလအိမ်ရှင် ရောင်းချသူနှင့်သာ သက်ဆိုင်ပြီး ၎င်းမှသာ ဖယ်ရှားနိုင်မည်ဖြစ်ကြောင်း ဖြေဆို ရေးသားပေးလိုက်ပါသည်။

မေးခွန်း(၃) ။ ။ ငှါးရမ်းတိုက်ခန်းကို အိမ်ရှင်ခွင့်ပြုချက် မရဘဲ ပြင်ဆင်ခြင်း ထပ်ခိုးတင်ခြင်း ပြုလုပ်လို့ ရ/မရ သိလိုပါတယ်။

အိမ်ရှင်အိမ်ငှား ငှားရမ်းခြင်းစာချုပ်အား ပြန်လည်ကြည့်ရှုရန်လိုပါသည်။ စာချုပ်တွင် ငှားရမ်းမှုအတွက် အငြင်းပွှား မှုမပေါ်ပေါက်စေရန် ငှားရမ်းပစ္စည်းစာရင်း၊ ခွင့်ပြုသတ်မှတ်ချက်၊ ကန့်သတ်ချက်များ၊ ငှားရမ်းကာလနှင့် ပျက်စီးမှု တစ်စုံတစ်ရာရှိပါက ပြင်ဆင်ရမည့်တာဝန်များအား ပဋိဉာဉ်ဥပဒေနှင့်အညီ ချုပ်ဆိုနိုင်ရန် တတ်ကျွမ်း နားလည်သူများနှင့် စာချုပ်ချုပ်ဆိုထားသင့်ပါသည်။ စာချုပ်တွင် တိုက်ခန်းပြင်ဆင်ရန်လိုအပ်လျှင် တိုက်ခန်းပြင်ဆင်မှုနှင့် ပတ်သတ်၍ သတ် မှတ်ချက်များ မဖြစ်မနေထည့်သွင်းချုပ်ဆိုထားရပါမည်။

ငှားရမ်းခြင်းစာချုပ်ပါ စည်းကမ်းချက်များအတိုင်းသာ တိုက်ခန်းတွင် နေထိုင်ခွင့်ရှိပါသည်။ စာချုပ်အား ဖောက်ဖျက်၍ တိုက်ခန်းအား ပြင်ဆင်ခြင်း၊ ပြောင်းလဲခြင်း၊ တိုးချဲ့ခြင်းပြုခြင်းမှာ ငှားရမ်းခြင်းစာချုပ်အား ချိုးဖောက်ခြင်းပင်ဖြစ်ပြီး ပျက်စီးမှုများအတွက် စပေါ်ငွေများထဲမှလဲ နုတ်ယူခြင်းပြုနိုင်ပါသည်။

အိမ်ရှင်အိမ်ငှားများမှာ မြို့ပြဆိုင်ရာငှားရမ်းခကြီးကြပ်ရေး အက်ဥပဒေပုဒ်မ- ၁၂(၁)(က)နှင့် သက်ဆိုင်စေပါသည်။ ပစ္စည်းလွှဲပြောင်းခြင်းအက်ဥပဒေပုဒ်မ - ၁၀၈ အရလဲ အငှားချထားသူ၏ သဘောတူညီချက်မရှိဘဲ ငှားရမ်းသူသည် အငှားချထားသည့် ပစည်းအပေါ်၌ အမြဲတမ်းအဆောက်အအုံ မဆောက်လုပ်နိုင်ကြောင်း ဖော်ပြထားပါတယ်။ အဆောက်အဦးအား ခွင့်ပြုချက်မရှိဘဲ ဆောက်လုပ်ခြင်း၊ အခိုင်အမာ ဆောက်လုပ်ခြင်းမှာ အိမ်ငှား တာ၀န်ဖောက်ဖျက်ခြင်းပင် ဖြစ်ပါ တယ်။

ပုံမှန်အားဖြင့် အိမ်ငှားများမှ မူလအဆောက်အဦးမှ တိုးချဲ့ကာ ထပ်ခိုးတင်ခြင်း၊ အဖီချဲ့ခြင်းများ ဆောင်ရွက်မရပါ။ ရန်ကုန်မြို့နယ်အတွင်းဖြစ်လျှင် စည်ပင်သာယာရေးကော်မတီမှ ချထားပေးသော BCC ခွင့်ပြုချက်ပါ အခန်းအရေအတွက်သာ လူနေထိုင်ခွင့်ရှိပြီး သွေဖယ်၍ ထပ်ခိုးများ တိုးချဲ့ခွင့်မရှိပါ။ အိမ်ရှင်မှာလဲ ပုံမှန်အရ ယိုယွင်းပျက်စီးမှုရှိသည့် အခြေအနေများအား အိမ်ငှားများ အဆင်ပြေစေရန် ပြင်ဆင်ရန် တာဝန်ရှိနေပါသည်။ အိမ်ပြင်ဆင် ပြုပြင်မှုဆိုရာ၌ ကောင်းမွန်စွာ အိမ်ငှားနေထိုင်နိုင်သည့်အခြေအနေကို ဆိုလိုပြီး ထပ်ခိုးတိုးချဲ့ခြင်းနှင့် မသက်ဆိုင်ပါ။

၁၉၆၀ပြည့်နှစ်၊ မြို့ပြဆိုင်ရာ ငှားရမ်းခကြီးကြပ်ရေး အက်ဥပဒေပုဒ်မ-၆ အရ အိမ်ရှင်သည် ဥပစာကို ပြုပြင်ရန် ဆောက်လုပ်‌ရေးပစ္စည်းများ ဈေးနှုန်းကြီးမြင့်လာခြင်း၊ တိုးတက်ကောင်းမွန်အောင် ပြုပြင်ခြင်း၊ ပုံသာန်ပြောင်းလဲ ဆောက်လုပ်ခြင်းတို့အတွက် ကြီးကြပ်ရေးဝန်ထံ စံငှားရမ်းခပြင်ပေးရန် လျှောက်ထားခြင်းလဲ ပြုနိုင်ကြောင်း ဖော်ပြထား သည်ကို တွေ့ရှိနိုင်ကာ အိမ်အားအကြီးစားပြင်ဆင်ခြင်းမှာ အိမ်ရှင်နှင့် သက်ဆိုင်ပါသည်။ အကယ်၍ အကြီးစား ပြင်ဆင်မှုအတွက် လိုအပ်လာလျှင်လဲ အိမ်ရှင်မှသာ ပြင်ဆင်ခွင့်ရှိပြီး အိမ်ငှားမှ ခေတ္တပြောင်းရွှေ့ပေးရပါမည်။ သတ်မှတ် ကာလအတွင်း ပြင်ဆင်မှုပြုပြီးပါက ငှားရမ်းစာချုပ်ပါကာလအတိုင်း အိမ်ငှားမှာ ပြန်လည်နေထိုင်ခွင့် ရရှိမည်ဖြစ်ကြောင်း ဖြေဆို ရေးသားပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com