နေအိမ်၊ အလုပ်အကိုင် အားလုံးဆုံးရှုံးခဲ့ရပြီး အိမ်ရာမဲ့ ဘဝရောက်သွားသူဟာ အမီတာဘဂျမ်းရဲ့ အအောင်မြင်ဆုံးရုပ်ရှင် Sholay ကို ရိုက်ကူးပေးခဲ့ပြီး သူဌေးပြန်ဖြစ်လာပုံ

သူဌေးသားဘဝက ငမွဲဘဝ၊ ငမွဲဘဝကနေ သူဌေးပြန်ဖြစ်သူ ဘောလိဝုဒ်သမိုင်းတလျှောက် အအောင်မြင်ဆုံး ရုပ်ရှင်များတွင် တစ်ခုအပါအဝင်ဖြစ်သော Sholay ကို ထုတ်လုပ်သူ ဂျီပီ ဆစ်ပီ (GP Sippy ) သည် အိန္ဒိယနှင့် ပါကစ္စတန် ၂ နိုင်ငံခွဲထွက်ချိန်ကာလ ဘုံဘေမြို့သို့ ပြောင်းရွှေ့စဉ်ကာလအတွင်း အိမ်ရာမဲ့ဘဝဖြင့် ဖြတ်သန်းခဲ့ရသူ ဖြစ်သည်။

ယင်းနောက် နှစ်အနည်းငယ်ကြာသောအခါ ဘောလိဝုဒ်၏ အအောင်မြင်ဆုံး ရုပ်ရှင်ထုတ်လုပ်သူ ဖြစ်လာခဲ့သည်။

အိန္ဒိယ ရုပ်ရှင်သည် နှစ်ပေါင်း ၁၀၀ ကျော် သက်တမ်းရှိခဲ့ပြီဖြစ်သည်။ အိန္ဒိယနိုင်ငံ လွတ်လပ်ရေးရပြီး မကြာမီ ၁၉၄၀ ပြည့်လွန်နှောင်းပိုင်းကာလများတွင် ရုပ်ရှင်လောက အရှိန်အဟုန်ဖြင့် အားကောင်းလာသည်။

ထိုကာလအတွင်း ရုပ်ရှင်ထုတ်လုပ်သူများ၊ ရုပ်ရှင်သရုပ်ဆောင်များ၊ ဂီတ ဒါရိုက်တာများနှင့် ရုပ်ရှင်လောက အတတ်ပညာရှင်များစွာမှာ ရုပ်ရှင်လောကသို့ ခြေချရန် အလုံးအရင်းကြိုးစားလာကြသည်။

အိန္ဒိယ-ပါကစ္စတန် ခွဲထွက်ကြပြီးနောက် ရုပ်ရှင်နယ်သို့ ခြေချလိုသူများစွာမှာ ဘုံဘေမြို့ (ယခု မွမ်ဘိုင်း) သို့ ပြောင်းရွှေ့လာကြခြင်းဖြစ်ရာ ရုပ်ရှင်လောက အဆက်အသွယ်ရှိသူ၊ ဆွေမျိုးသားချင်းရှိသူဟူ၍ မရှိသလောက်ပင်။

ထိုသူများတွင် ဂျီပီ ဆစ်ပီလည်း အပါအဝင် ဖြစ်သည်။ ဆစ်ပီသည် အိန္ဒိယရုပ်ရှင်သမိုင်း၏ အအောင်မြင်ဆုံးဇာတ်ကားဖြစ်သော Sholay ကို ထုတ်လုပ်ခဲ့သူ ဖြစ်သည်။

((ဘုံဖျားက သုညသို့))

ဂျီပီ ဆစ်ပီသည် ကရာချိမြို့ရှိ ချမ်းသာကြွယ်ဝသော မိသားစုမှ မွေးဖွားသည့် သူဌေးသားတစ်ဦးဖြစ်သည်။

သို့သော် အိန္ဒိယ- ပါကစ္စတန် ခွဲထွက်ချိန်တွင် ဆစ်ပီတို့မှာ ပိုင်ဆိုင်သမျှအားလုံး ထားခဲ့ရကာ ဘုံဘေမြို့သို့ ထွက်ပြေးလာခဲ့ကြရသည်။

၂ နိုင်ငံခွဲထွက်ချိန်တွင် ကြောက်မက်ဖွယ် အဓိကရုဏ်းများဖြစ်ခဲ့ရာ လူထောင်သောင်းများစွာ ပိုင်ဆိုင်မှုအားလုံး ဆုံးရှုံးခဲ့ရသည်။

ဆစ်ပီတို့ မိသားစုသည်လည်း ကရာချိရှိ နေအိမ်၊ ကျော်ကြားအောင်မြင်နေသော စီးပွားရေး အစရှိသည့်အားလုံး ဆုံးရှုံးခဲ့ရသည်။

ဆစ်ပီသည် ဘုံဘေတွင် အောက်ခြေမှ ဘဝပြန်စခဲ့ရပြီး မိသားစုကို ရှာဖွေကျွေးမွေးနိုင်ရန် ရုန်းကန်ခဲ့ရသည်။

ကရာချိတွင် အထက်တန်းစားဘဝဖြင့် နေထိုင်ခဲ့သူ ဆစ်ပီမှာ လူချမ်းသာဘဝသို့ ပြန်ရောက်ရန် ဘုံဘေ၏ လမ်းများပေါ်၌ အိပ်မက်မက်နေခဲ့သည်။ ထိုသို့ အိပ်မက်ရင်း ဘုံဘေတွင် အိမ်ရာမဲ့ဘဝသို့ ဆိုက်ရောက်သွားတော့သည်။

((သုညမှ ဘုံဖျားသို့ အိမ်ခြံမြေလောကမှတဆင့် ပြန်လည်လှမ်းတက်ခြင်း))

နယူးယောက်တိုင်းမ် သတင်းစာကြီး၏ ဖော်ပြချက်အရ ဆစ်ပီသည် ကော်ဇောများလိုက်ရောင်းရင်း ငွေစုနေခဲ့ကာ စားသောက်ဆိုင်ငယ်တစ်ခု ဖွင့်ခဲ့သော်လည်း အလုပ်မဖြစ်ခဲ့။

တစ်ရက်တွင်မူ ဘုံဘေမြို့၊ ကိုလာဘာအရပ်တွင် ဆောက်လက်စတန်းလန်း အိမ်တစ်လုံးကို တွေ့ခဲ့သည်။

ဆစ်ပီက ထိုအိမ်ကို ဝယ်ပြီး အမြတ်တင်ကာ ပြန်ရောင်းရန် ဆုံးဖြတ်ခဲ့သည်။ ထိုအိမ်တွင် မြိုးမြိုးမြက်မြက်ရလိုက်ရာ ဆစ်ပီက အိမ်များဆောက်ပြီး အမြတ်တင်ကာ ပြန်ရောင်းရန်အတွက် ဆောက်လုပ်ရေးလုပ်ငန်းလုပ်ရန် အကြံရခဲ့သည်။

ထိုအချိန်တွင် ဆစ်ပီမှာ ငွေအတန်အသင့်ရှိလာပြီဖြစ်သောကြောင့် ဘုံဘေ၏ လူကုံထံ အသိုင်းအဝိုင်းသို့ ဝင်ဆန့်လာသည်။

ထိုအခါ လူကုံထံတို့က ဆစ်ပီအနေဖြင့် ရုပ်ရှင်လောကတွင် ဝင်ရောက်ရင်းနှီးမြှုပ်နှံမှု လုပ်သင့်ကြောင်း အကြံပေးခဲ့ရာ ၁၉၅၃ ခုနှစ်တွင် Sazaa ရုပ်ရှင်ကို ထုတ်လုပ်ပြီး ရုပ်ရှင်လောကသို့ စတင်ဝင်ရောက်ခဲ့သည်။

ယင်းနောက်ပိုင်း ရုပ်ရှင်များ ဆက်လက်ထုတ်လုပ်လာခဲ့သည်။

သို့သော် ၎င်းထုတ်လုပ်ခဲ့သော ရုပ်ရှင်များမှာ ထင်သလောက် အမြတ်မရှိ။ ထိုအခါ ဆစ်ပီက လန်ဒန်တွင် ကျောင်းတက်နေသော သားဖြစ်သူ ရာမက်ရှ် ဆစ်ပီကို ပြန်ခေါ်လိုက်ပြီး မိမိ၏ လုပ်ငန်းများကို ဦးဆောင်ခိုင်းခဲ့သည်။

ရာမက်ရှ် ပြန်ရောက်လာချိန်တွင် Andaz နှင့် Seeta Aur Geeta တို့ကဲ့သို့ ရုပ်ရှင်များ ရိုက်ကူးထုတ်လုပ်ခဲ့သည်။ သို့သော် ဝက်ဝက်ကွဲ အောင်မြင်မှုရသွားသည်မှာ ၁၉၆၅ ခုနှစ်က ထုတ်လုပ်ခဲ့သော Sholay ရုပ်ရှင်ဖြင့် ဖြစ်သည်။ Sholay ကို ရိုက်ကူးရာတွင် ရူပီး ၃ ကုဋေသာ ကုန်ကျခဲ့သည်။

ထိုရုပ်ရှင်သည် ဟင်ဒီရုပ်ရှင်လောက၏ လမ်းကြောင်းကို ပြောင်းလဲစေခဲ့သည့် ရုပ်ရှင်ဖြစ်ပြီး ဆန်ဂျိ ကူးမား၊ အမီတာ ဘဂျမ်း၊ ဒါမန်ဒရာ၊ အမ်ဂျက်ခန်၊ ဂျာယာဘဂျမ်းတို့ ပါဝင်သရုပ်ဆောင်ထားသည်။

Sholay သည် ထိုခေတ်က ဟင်ဒီရုပ်ရှင်လောကတွင် အအောင်မြင်ဆုံး ရုပ်ရှင်ဇာတ်ကား ဖြစ်ခဲ့ပြီး ဆစ်ပီသည်လည်း ကျိကျိတက်ချမ်းသာသူ ဘဝသို့ ပြန်လည်ရောက်ရှိသွားခဲ့သည်။

Sholay ကို အိန္ဒိယတွင် ၅ နှစ်ကြာ ရုံတင်ပြသခဲ့ရသည်အထိ ဝက်ဝက်ကွဲ အောင်မြင်ခဲ့သည်။

ဆစ်ပီသည် ၂၀၀၇ ခုနှစ်တွင် ကွယ်လွန်ခဲ့ပြီး ကွယ်လွန်ချိန်တွင် အသက် ၉၃ နှစ် ရှိပြီ ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Bollywood producer lost his mansion and business, was homeless in Mumbai; made biggest film of Amitabh Bachchan’s career (indianexpress)