လယ်ယာမြေလုပ်ပိုင်ခွင့်နှင့် စပ်လျဉ်း၍ သိရှိထားသင့်သည့်အချက်အလက်များ

လယ်ယာမြေဆိုသည်မှာ လယ်မြေ၊ ယာမြေ၊ ကိုင်းကျွန်းမြေ၊ တောင်ယာမြေ၊ နှစ်ရှည်ပင် စိုက်ပျိုးသောမြေ၊ ဓနိမြေ၊ ဥယျာဉ်မြေတို့ကို ဆိုလိုပြီး ဟင်းသီးဟင်းရွက်၊ ပန်းမန်စိုက်ပျိုးသည့်မြေ၊ မြေနုကျွန်း စိုက်ပျိုးမြေများမှာလဲ ထိုလယ်ယာမြေအုပ်စုထဲ ပါဝင်ပါသည်။

လယ်ယာမြေအား မူလစိုက်ပျိုးရေးလုပ်ငန်းတွင် ပါဝင်သူ၊ လယ်ယာမြေ တည်ရှိရာ အရပ်ဒေသတွင် အခြေ တကျနေထိုင်သူ၊ (၁၈)နှစ် ပြည့်ပြီးသူ၊ နိုင်ငံသား၊ လယ်ယာမြေအား အမှန်တကယ်လုပ်ကိုင်လိုသော ကုမ္ပဏီအဖွဲ့ အစည်း၊ အစိုးရဌာနတစ်ခုခုမှ လယ်ယာမြေလုပ်ပိုင်ခွင့်ရရှိရန် ပုံစံ(၁) ဖြင့် လျှောက်ထားလာပါက လယ်ယာမြေလုပ်ပိုင်ခွင့်ပြု လက်မှတ်ပုံစံ -(၇) ထုတ်ပေးနိုင်ပါသည်။ လယ်ယာမြေလုပ်ပိုင်ခွင့်အား ငြင်းပယ်ခြင်း ခံရသူအား ဌာနမှ ပုံစံ - ၈ ဖြင့် အကြောင်းကြားစာ ထုတ်ပေးပါသည်။ လယ်ယာမြေလုပ်ပိုင်ခွင့် လျှောက်ထားသူအား ကန့်ကွက်လိုလျှင်လဲ ပုံစံ-၂ ဖြင့် ကန့်ကွက်ခြင်းပြုနိုင်ပါသည်။

ပုံစံ-(၇) အမည်ပေါက်ရရှိသူသည် သတ်မှတ်မြေခွန်အား ထမ်းဆောင်ရမည်။ လယ်ယာမြေအား တဆင့်ရောင်းချခြင်း၊ ပေါင်နှံခြင်း၊ ငှားရမ်းခြင်း၊ လဲလှယ်ခြင်း၊ ပေးကမ်းခြင်းတို့ ဆောင်ရွက်သည့်အခါ အမည် ပေါက်ပြောင်းရန်အတွက် ပုံစံ - ၉ ဖြင့် လျှောက်ထားရပါမည်။

တံဆိပ်ခေါင်းခွန်နှင့် စာချုပ်စာတမ်း မှတ်ပုံတင်ခတို့ကိုလဲ ထမ်းဆောင်နိုင်ရပါမည်။ ၂၀၁၂ ခုနှစ်၊ လယ်ယာမြေဥပဒေအရ လယ်ယာမြေအား ပေါင်နှံမှုပြုလိုလျှင် အစိုးရ အသိအမှတ်ပြုသော ဘဏ်တွင်သာ ပေါင်နှံမှုပြုနိုင်ပါသည်။

အမွေဆက်ခံမှုဖြင့် အမည်ပြောင်း လျှောက်ထားလိုလျှင်လဲ ဌာနမှသတ်မှတ်သည့် ပုံစံ - ၉ ဖြင့်ပင် လျှောက်ထားရမည်ဖြစ်ပါသည်။ မြေလွတ်၊ မြေလပ်၊ မြေရိုင်းအား လယ်ယာမြေအဖြစ် ပြောင်းလဲခွင့်ပြုရန် လျှောက်ထားသည့်အခါ ခွင့်ပြုပါက ဌာနမှ ပုံစံ - ၅ ဖြင့် မှတ်တမ်းတင်ပြီး ပုံစံ - ၇ ထုတ်ပေးနိုင်ပါသည်။

လယ်ယာမြေလုပ်ပိုင်ခွင့်နှင့် ပတ်သတ်၍ဖြစ်စေ၊ ပိုင်ဆိုင်မှုနှင့် စပ်လျဉ်း၍ဖြစ်စေ၊ အမွေဆက်ခံခွင့်အရ ဖြစ်စေ၊လယ်နီးနားစပ် ကန်သင်းတင် အငြင်းပွားမှုများ ပေါ်ပေါက်၍ဖြစ်စေ သက်ဆိုင်ရာရပ်ကွက်၊ ကျေးရွာအုပ်စု လယ်ယာမြေစီမံခန့်ခွဲမှုတွင် မူလမူခင်းဖွင့်လှစ်ကာ တိုင်ကြားနိုင်ပါသည်။ ခိုင်လုံသော အကြောင်းပြချက်မရှိဘဲ လယ်ယာမြေအား ချန်လှပ်ထားခွင့်မရှိ‌သောကြောင့် အငြင်းပွှားမှု ဖြစ်ပေါ်စဉ်တွင်လဲ လယ်ယာမြေစီမံခန့်ခွဲမှုအဖွဲ့ မှ ညွှန်ကြားသည့်သူမှ ယာယီဆက်လက် စိုက်ပျိုးနေရမည်ဖြစ်ပါသည်။

သက်ဆိုင်ရာရပ်ကွက်၊ ကျေးရွာအုပ်စု လယ်ယာမြေစီမံခန့်ခွဲမှုအဖွဲ့သည် နည်းဥပဒေ - ၆(က)နှင့်အညီ မူလတိုင်ကြားချက်အား စုံစမ်းစစ်ဆေးမည်ဖြစ်ပြီး (၁၅) ရက်အတွင်း ဆုံးဖြတ်မှုတစ်ရပ် ချမှတ်ပေးမည်ဖြစ်ပါ သည်။ ပုဒ်မ - ၂၂ အရ ချမှတ်သော အမိန့်တစ်ရပ်ကို မကျေနပ်သူမှာ မြို့နယ်လယ်ယာမြေစီမံခန့်ခွဲမှုအဖွဲ့သို့ ရက်ပေါင်း - (၃၀) အတွင်း အယူခံဝင်ရောက်နိုင်သလို ဌာနမှ ကွင်းဆင်းစစ်ဆေးခြင်းလဲ ဆောင်ရွက်ပါသည်။ ထိုမှတဆင့် ခရိုင်လယ် ယာမြေစီမံခန့်ခွဲမှုအဖွဲ့၊ တိုင်းဒေသကြီး / ပြည်နယ် လယ်ယာမြေစီမံခန့်ခွဲမှုအဖွဲ့ထိ အယူခံဝင်ရောက်နိုင်ကြောင်း ဥပဒေဗဟုသုတအနေဖြင့် ဖော်ပြ ရေးသားပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com