အမျိုးသားတစ်ဦးက ညစဉ် live လွှင့် ကပြကာ ကင်ဆာရောဂါဖြစ်ပွားနေသော ဇနီးနှင့် သမီးအတွက် ဆေးဖိုးငွေရှာ

တရုတ်ပြည် အနောက်တောင်ပိုင်းတွင် အသက် ၂၈ နှစ်အရွယ် အမျိုးသားတစ်ဦးသည် ညတိုင်း live-stream များတွင် ကပြကာ ကင်ဆာရောဂါဖြစ်ပွားနေသော ဇနီးနှင့် သမီးအတွက် ဆေးဖိုးငွေ ရှာဖွေလျက်ရှိသည်။

သူ၏ မယိမ်းမယိုင် ခိုင်မြဲသည့် ချစ်ခြင်းမေတ္တာမှာ ပြည်မကြီး လူမှုကွန်ရက်နှလုံးသားများကို လှုပ်ခတ်စေခဲ့ကာ ၎င်း၏ လူမှုကွန်ရက်အကောင့်ထံ လာရောက်လှူဒါန်းမှုများစွာရှိလာနေသည်။

ထိုအမျိုးသား၏ အမည်မှာ ဝမ်းဟိုင်ဘင်ဖြစ်ပြီး ဇနီး၏ အမည်မှာ ရန်ရှောင်ဟုန်ဖြစ်ကာ အထက်တန်းကျောင်းသားဘဝကတည်းက အတန်းဖော်များဖြစ်ကြသည်။

လက်ထပ်ပြီးချိန်တွင် ၎င်းတို့၏ ဇာတိမြေဖြစ်သော စီချွမ်ပြည်နယ်ရှိ မြို့ငယ်လေးမှသည် တရုတ်ပြည်တောင်ပိုင်း ကွမ်တုံပြည်နယ်သို့ အလုပ်အကိုင်အခွင့်အလမ်းများ ရှာဖွေရန် ပြောင်းရွှေ့လာခဲ့ကြသည်။

လွန်ခဲ့သော ၃ နှစ်က သမီးကြီးကို မွေးဖွားခဲ့ပြီး ယင်းနောက် ၁ နှစ်အကြာတွင် သမီးငယ်တစ်ဦး ထပ်မံထွန်းကားသည်။

ဝမ်းဟိုင်ဘင်တို့ ပျော်ရွှင်စရာမိသားစုလေး၏ ကံကြမ္မာမှာ ပြီးခဲ့သောနှစ် ဇွန်လတွင် တစ်ဆစ်ချိုး ပြောင်းလဲသွားသည်။

သမီးငယ်လေး ရှီးယန်မှာ ခန္ဓာကိုယ်အနှံ့အပြားမှ တစ်သျှူးပျော့များတွင် ဖြစ်ပွားတတ်သော တစ်သျှူးပျော့ ကင်ဆာ (rhabdomyosarcoma) ဖြစ်ပွားနေကြောင်း စစ်ဆေးတွေ့ရှိခဲ့သည်။

အဆိုပါ ကင်ဆာရောဂါမှာ စိတ်ဖြင့်ထိန်းချုပ်နိုင်သော ကြွက်သားနေရာများတွင် ဖြစ်ပွားလေ့ရှိပြီး အဖြစ်များသောနေရာများမှာ ခေါင်း၊ လည်ပင်း၊ ဆီးအိမ်၊ မိန်းမကိုယ်၊ လက်၊ ခြေနှင့် မျက်လုံးတဝိုက်မှ တစ်သျှူးပျော့များ ဖြစ်သည်။

ဇနီးဖြစ်သူ ရန်ရှောင်ဟုန်မှာလည်း ရင်သားကင်ဆာဖြစ်ပွားနေကြောင်း ပြီးခဲ့သော ဒီဇင်ဘာတွင် စစ်ဆေးတွေ့ရှိလာရာ ပိုမိုရင်ကျိုးဖွယ် ဖြစ်လာသည်။

(▲ သမီးငယ်လေးမှာ တစ်သျှူးပျော့ကင်ဆာဖြစ်ပွားနေကြောင်း ပြီးခဲ့သောနှစ် ဇွန်လတွင် စစ်ဆေးတွေ့ရှိ လိုက်ရာ အေးချမ်းပျော်ရွှင်စရာ ဝမ်းဟိုင်ဘင်တို့ မိသားစုလေးအတွက် ကြေကွဲဖွယ် အလှည့်အပြောင်းဖြစ်လာ သည်။ ယင်းနောက် ၆ လအကြာတွင် ဇနီးဖြစ်သူ၌လည်း ရင်သားကင်ဆာ ခံစားနေရကြောင်း သိလာရ ပြန်သည်။ ဓာတ်ပုံ- Baidu)

မိခင်နှင့် သမီး ၂ ဦးအတွက် ဆေးကုသစရိတ်များ အလွန်များပြားမည်ဖြစ်သောကြောင့် မိသားစုအတွက် ဝန်ထုပ်မပိစေရေး ရည်ရွယ်ကာ ဆေးကုသမှု မခံယူဘဲနေလိုက်ရန် ဇနီးဖြစ်သူ ရန်ရှောင်ဟုန်က စဉ်းစားခဲ့သည်။

သို့သော် ဝမ်းဟိုင်ဘင်က ဇနီးနှင့် သမီး ၂ ဦးလုံးကို ဆေးကုသရန် ဆုံးဖြတ်ခဲ့သည်။

ဝမ်းဟိုင်ဘင်မှာ မကျန်းမာသော ဇနီးနှင့် သမီးတို့ကို တစ်ဦးတည်း ပြုစုစောင့်ရှောက်နေရသောကြောင့် ဆောက်လုပ်ရေးလုပ်ငန်းခွင်တစ်ခုတွင် လုပ်ကိုင်နေသောအလုပ်မှ ထွက်လိုက်ရသည်။

ယင်းအခြေအနေတွင် သမီးကြီးကို ဘိုးဘွားများရှိရာ စီချွမ်ပြည်နယ်သို့ ပို့ထားလိုက်ပြီး ဆေးကုသမှုအတွက် ပိုမိုကောင်းမွန်မည့် ချုံကင်းမြို့အနီးရှိ တိုက်ခန်းတစ်ခန်းတွင် ငှားရမ်းနေထိုင်ခဲ့သည်။

ရှန်ရှောင်ဟုန်တို့ သားအမိ ၂ ဦးလုံး chemo ဖြင့် ကုသမှု ခံယူရန် လိုအပ်နေသည်။

တစ်ကြိမ်ကုသလျှင် ယွမ် ထောင်ချီ (ဒေါ်လာ ရာဂဏန်း) ကုန်ကျသည်။

Radiotherapy ဟုခေါ်သော ဓာတ်ကင်ခြင်း (သို့မဟုတ်) ဓာတ်ရောင်ခြည်ကုထုံးမှာလည်း တစ်ကြိမ်လျှင် ယွမ် ၁၀၀၀၀ (ဒေါ်လာ ၁၄၀၀) ခန့် ကုန်သည်။

ဝမ်းဟိုင်ဘင်တို့မိသားစုမှာ စုဆောင်းထားသမျှငွေ တက်တက်ပြောင်သွားသည့်အပြင် ယွမ် ၂၀၀,၀၀၀ ခန့် ကြွေးတင်လာသည်။

မြို့ကြီးပြကြီးတွင် ရွှေ့ပြောင်းလုပ်သားတို့အတွက် ငွေရလွယ်သည့် delivery အလုပ်မျိုးရှိသော်လည်း ချုံကင်းနှင့် ရင်းနှီးကျွမ်းဝင်မှု မရှိသောကြောင့် ဝမ်းဟိုင်ဘင်အတွက် ထိုအလုပ်မှာ မလွယ်လှ။

သို့နှင့် ယခုနှစ် ဧပြီလတွင် ဝမ်းဟိုင်ဘင်က နေ့ဘက်တွင် မကျန်းမာသော ဇနီးနှင့် သမီးကို ပြုစုစောင့်ရှောက်ပြီး ညဘက် ၎င်းတို့အိပ်သွားချိန်တွင် live-stream ပလက်ဖောင်းတစ်ခုမှတဆင့် ကပြကာ ဝင်ငွေရှာခဲ့သည်။

(▲ ဝမ်းဟိုင်ဘင်သည် နေ့ဘက်တွင် ဇနီးနှင့် သမီးကို ပြုစုပေးပြီး ညဘက်တွင် ကပြကာ ဝင်ငွေရှာသည်။ ဓာတ်ပုံ-Baidu)

ဝမ်သည် live လွှင့် ကပြမှုမှတဆင့် တစ်ညလျှင် ယွမ်ငွေ ဆယ်ဂဏန်းမှ ရာဂဏန်းအထိ ရသည်။ သူ၏ ကပြမှုကို ကြည့်ရှုရသူတို့က ကရုဏာစိတ်ဝင်ကာ လှူဒါန်းမှုများလည်း ပြုလုပ်ကြသည်။

ဝမ်တို့၏ အိမ်ရှင်ကလည်း အိမ်လခ ယွမ် ၉၀၀ (ဒေါ်လာ ၁၃၀) မှ ယွမ် ၆၀၀ သို့ လျှော့ပေးလာသည်။

ဝမ်က မိမိအနေဖြင့် လက်မလျှော့ရန် ဆုံးဖြတ်ထားကြောင်း ပြောသည်။

“ဒီလိုမှ မဟုတ်ရင် ကျွန်တော့်ဇနီးနဲ့ သမီးတွေ ကူကယ်ရာမဲ့သွားပါလိမ့်မယ်။ သူတို့အတွက် ဘာမဆို လုပ်သွားဖို့ ဆန္ဒရှိပါတယ်”

(▲ ဇနီးနှင့် သမီးအတွက် မည်သည့်အရာမဆို လုပ်ဆောင်သွားရန် ဆန္ဒရှိကြောင်း ဝမ်းက ပြောသည်။ ဓာတ်ပုံ-Baidu)

ခက်ခဲစွာ ရုန်းကန်နေရသော်လည်း ဝမ်းတွင် မျှော်လင့်ချက်များစွာရှိနေသည်။

ဇနီးနှင့် သမီး၏ ကင်ဆာရောဂါ ဆေးကုသမှုမှာ တိုးတက်မှုများ တွေ့လာရကြောင်း ဝမ်းက ပြောသည်။

သူ၏ မယိမ်းယိုင်သော ချစ်ခြင်းအပေါ် ပြည်မကြီး လူမှုကွန်ရက်သုံးစွဲသူတို့က လေးစားလျက် ရှိကြသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Chinese man dances on live-streams nightly to fund cancer treatments for wife and daughter Photo Credit-Baidu