ဘီလ်ဂိတ်က ကယ်လီဖိုးနီးယားတွင် ဒေါ်လာ ၄၃ သန်းတန် စံအိမ်ကြီးတစ်လုံးဝယ်ယူပြီး ဖြိုချခဲ့၊ ပတ်ဝန်းကျင်က အလွန်ဆူညံကြောင်း ပြောဆိုကြ၊ ဘီလ်ဂိတ်က ဆောက်လုပ်ရေးလုပ်ငန်းခွင်သို့ ကျည်ကာကားဖြင့် သွားရောက်ခဲ့

လွန်ခဲ့သော ၂၀၂၀ ပြည့်နှစ်က ဘီလ်ဂိတ်နှင့် မီလင်ဒါဂိတ်တို့သည် ကယ်လီဖိုးနီးယားပြည်နယ်၊ Del Mar မြို့ရှိ ကမ်းခြေစံအိမ်ကြီးတစ်လုံးကို ကန်ဒေါ်လာ ၄၃ သန်းဖြင့် ဝယ်ယူခဲ့ကြသည်။

ဗိသုကာပညာရှင် Ken Ronchetti က ဒီဇိုင်းရေးဆွဲဆောက်လုပ်ခဲ့သော စံအိမ်ဖြစ်ပြီး အိပ်ခန်း ၆ ခန်းနှင့် ရေချိုးခန်း ၃ ခန်း ပါဝင်သည်။

သို့သော် စံအိမ်ကြီး၏ သက်တမ်းမှာ ဘီလ်ဂိတ်၏ လက်ထဲတွင် တာရှည်မခံခဲ့ချေ။ ၂၀၂၁ ခုနှစ်တွင် ၎င်းတို့ဇနီးမောင်နှံ ကွာရှင်းပြတ်စဲကြောင်း ကြေညာခဲ့ပြီးနောက်ပိုင်း ဘီလ်ဂိတ်က အဆိုပါ စံအိမ်ကြီးကို ဖြိုချခဲ့သည်။

နယူးယောက်ပို့စ် သတင်းဌာန၏ ဖော်ပြချက်အရ မိုက္ကရိုဆော့ဖ်၏ ပူးတွဲတည်ထောင်သူ ဘီလ်ဂိတ်က စံအိမ်ကို ဖြိုချကာ ၎င်းတစ်ဦးတည်းနေထိုင်ရန် စံအိမ်သစ်ကို ခေတ်မီနည်းပညာများဖြင့် ဆောက်လုပ်သွားရန် စီစဉ်ခဲ့ခြင်း ဖြစ်သည်ဟု ဆိုသည်။

၂၀၂၂ ခုနှစ် အစောပိုင်းတွင် ဆောက်လုပ်ရေးလုပ်ငန်းများ စတင်ခဲ့ချိန်၌ သူ၏ လုပ်ငန်းခွင်မှာ ပတ်ဝန်းကျင်အတွက် စိတ်အနှောင့်အယှက် ဖြစ်စရာ ဖြစ်လာခဲ့သည်။

အိမ်နီးချင်းတို့က နယူးယောက်ပို့စ် သတင်းဌာနကို ပြောသည်မှာ ဘီလ်ဂိတ်၏ စံအိမ်ဆောက်လုပ်ရေး လုပ်ငန်းခွင်မှ လုပ်သားများမှာ အမြဲဆူညံနေကာ ပတ်ဝန်းကျင်ကို အနှောင့်အယှက်ဖြစ်စေကြောင်း ပြောသည်။

“တကယ့်ကို စိတ်အနှောင့်အယှက်ဖြစ်စရာပါပဲ။” ဟု အိမ်နီးချင်းတစ်ဦးက ပြောသည်။ “သူတို့က ဆူဆူညံညံတွေ လုပ်ကြတယ်။ ကျွန်မ ကလေးက အိပ်လို့တောင် မရဘူး။ ပတ်ဝန်းကျင်အတွက် တကယ့်အနှောင့်အယှက်ပါပဲ” ဟု အခြားတစ်ဦးက ပြောသည်။ ဘီလ်ဂိတ်က ဒေါ်လာ ၄၃ သန်းတန် စံအိမ်ကြီးကို ဖြိုချမှုမှာ တန်ဖိုးကြီး အိမ်ခြံမြေလောကတွင် များစွာ အံ့အားသင့်စေခဲ့သည်။

၎င်းဖြိုချခဲ့သောစံအိမ်မှာ ဆယ်စုနှစ် တစ်ခုခန့်သာ သက်တမ်းရှိသေးသည်။

သို့သော် ဘီလ်ဂိတ်ကမူ စံအိမ်ကို ဖြိုချကာ အသစ်ပြန်ဆောက်ရန်သာ ရွေးချယ်ခဲ့ပြီး ဇနီးနှင့် ကွာရှင်းပြီးနောက် ၎င်းတစ်ဦးတည်း နေထိုင်ရန် ရည်ရွယ်ဆောက်လုပ်ခဲ့ခြင်း ဖြစ်သည်ဟု ဆိုသည်။

ဘီလ်ဂိတ်သည် ဝါရှင်တန်ပြည်နယ်၊ Medina မြို့တွင်လည်း ဒေါ်လာ သန်း ၁၃၀ ခန့် တန်ကြေးရှိ စံအိမ်ကြီးတစ်လုံး ပိုင်ဆိုင်ထားသည်။

Del Mar မြို့တွင် ဆောက်လုပ်ရေး လုပ်ထုံးလုပ်နည်းများမှာ တင်းကျပ်သည်ဟု နာမည်ကြီးသည်။

သဘာဝပတ်ဝန်းကျင်ထိန်းသိမ်းရေးအပြင် ဇုန်နယ် သတ်မှတ်ချက် စည်းကမ်းများလည်းရှိရာ ဆောက်လုပ်ရေး စီမံကန်းများစွာမှာ နှစ်ပေါင်းများစွာ အပြီးမသတ်နိုင်ဘဲ ရှိတတ်သည်။

သို့သော် ဘီလ်ဂိတ်က လိုအပ်သည့် ခွင့်ပြုချက် ပါမစ်များ ရယူထားပြီးဖြစ်ကြောင်း၊ ဘီလ်ဂိတ်သည် ဆောက်လုပ်ရေးလုပ်ငန်းခွင်သို့ အနည်းဆုံး ၂ ကြိမ်ခန့် လာရောက်ခဲ့ကြောင်း အိမ်နီးချင်းတို့က နယူးယောက်ပို့စ် သတင်းဌာနသို့ ပြောသည်။

ဘီလ်ဂိတ်သည် လုံခြုံရေးအင်အားအပြည့်ဖြင့် ရောက်ရှိလာခြင်းဖြစ်ပြီး ကျည်ကာကားများဖြင့် လာရောက်ခဲ့ကြောင်း အိမ်နီးချင်းတို့က ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: 'My Baby Can't Sleep' – Bill Gates Demolished A $43 Million Mansion To Create A Bachelor Pad— Neighbors Were Annoyed And Called It A 'Nuisance'