စတန်းဖို့ဒ်တက္ကသိုလ်မှ သိပ္ပံပညာရှင်တို့က ကင်ဆာဆဲလ်များ မိမိဘာသာ သတ်သေစေမည့် မော်လီကျူးတစ်မျိုး တီထွင်လျက်ရှိ

(မှတ်ချက်။ စတန်းဖို့ဒ် ဆေးတက္ကသိုလ်၏ ဝက်ဘ်ဆိုက်တွင် ဖော်ပြထားသော ဆောင်းပါးကို အရပ်သား နားလည်လွယ်စေမည့် ပုံစံဖြင့် ပြန်လည်ရေးသားထားခြင်းဖြစ်ပြီး ဆေးပညာဆိုင်ရာ ဝေါဟာရများကို တတ်နိုင်သမျှ ရှောင်ရှားထားပါသည်။ အသေးစိတ်လေ့လာလိုသူများအနေဖြင့်မူ စတန်းဖို့ဒ် ဆေးတက္ကသိုလ်၏ ဝက်ဘ်ဆိုက် (med.stanford.edu ) တွင် Scientists glue two proteins together, driving cancer cells to self-destruct ဟူသော ဆောင်းပါးကို ရှာဖွေ ဖတ်ရှုနိုင်ပါသည်)

ကျွန်ုပ်တို့၏ ခန္ဓာကိုယ်သည် နေ့စဉ် ဆဲလ်အပျက်အစီး ၆၀ ဘီလီယံခန့်ကို ဖယ်ရှားဖျက်ဆီးပစ်လျက်ရှိရာ ယင်းကို apoptosis ဟု ခေါ်သည်။

အဆိုပါဆဲလ်များကို ဆဲလ်သစ်များဖြင့် အစားထိုးကြသည်။

စတန်းဖို့ဒ် ဆေးသိပ္ပံပညာရှင်များ၏ ကင်ဆာကုထုံးသစ်အဖြစ် ချဉ်းကပ်သည့် နည်းလမ်းသစ်အတွက် ခန္ဓာကိုယ်က မကောင်းသော ဆဲလ်များကို ဖျက်ဆီးဖယ်ရှားသည့် သဘာဝလုပ်ငန်းစဉ်ကို အသုံးချထားသည်။

ထိုသဘာဝလုပ်ငန်းစဉ်ကို အခြေပြုကာ ကင်ဆာဆဲလ်များ မိမိဘာသာ ဖျက်ဆီးဖယ်ရှားရန် စတန်းဖို့ဒ် သိပ္ပံပညာရှင်တို့က ရည်ရွယ်ခဲ့ခြင်း ဖြစ်သည်။

မကောင်းသော ဆဲလ်များကို ဖျက်ဆီးဖယ်ရှားပစ်သောကြောင့် အနီးရှိ ဆဲလ်များကို မထိခိုက်စေဘဲ ကျန်းမာစွာ နေထိုင်နိုင်ကြခြင်း ဖြစ်သည်။

ခီမိုကုထုံးကဲ့သို့ လက်ရှိ ကင်ဆာ ကုထုံးများမှာ ဗုံးကြဲခြင်းနှင့် အလားတူသည်။

ကင်ဆာဆဲလ်များကို ဖျက်ဆီးသည့်နည်းတူ ဆဲလ်ကောင်းများစွာကိုလည်း ထိခိုက်စေရာ ပြင်းထန်သည့် ဘေးထွက်ဆိုးကျိုးများ ရှိစေသည်။

ထို့ကြောင့် သိပ္ပံပညာရှင်တို့တွင် ထူးခြားသည့် အကြံတစ်ခု ပေါ်လာသည်။

ခန္ဓာကိုယ်က မကောင်းသော ဆဲလ်များကို ဖျက်ဆီးပစ်သည့် လုပ်ငန်းစဉ်ကို အသုံးချကာ ကင်ဆာဆဲလ်များကို ပစ်မှတ်ထားစေလျှင် မည်သို့ရှိမည်နည်း။

((ဘယ်လိုလုပ်မလဲ))

အတွေ့ရများသည့် သွေးကင်ဆာများတွင် BCL6 ဟုခေါ်သော ပရိုတိန်းသည် ဆဲလ်၏ DNA အပေါ်တွင် ဖိကာ ပိတ်ဆို့ထားသည်။

မကောင်းသောဆဲလ်များ မိမိဘာသာ ဖျက်ဆီးမည့် မျိုးဗီဇ ခလုတ်ပွင့်မလာစေရန် BCL6 က ပိတ်ဆို့ပေးထားပြီး ကင်ဆာဆဲလ်ကို ထာဝရ ရှင်သန်နေစေသည်။

သိပ္ပံပညာရှင်တို့က အထူး မော်လီကျူး ကော်တစ်မျိုး တီထွင်လိုက်ပြီး ပုံမှန်အားဖြင့် ဆက်စပ်မှု မရှိသော ပရိုတိန်း ၂ မျိုးကို ထိုကော်ဖြင့် ကပ်နေစေသည်။

ကင်ဆာ ပရိုတိန်းဖြစ်သော BCL6 နှင့် မျိုးဗီဇများ၏ အဖွင့်ခလုတ်အဖြစ် လုပ်ဆောင်သော CDK9 ပရိုတိန်းတို့ကို ကပ်ထားလိုက်ခြင်း ဖြစ်သည်။

မိမိဘာသာ ဖျက်ဆီးမည့် မျိုးဗီဇတို့ ပိတ်ဆို့ခံထားရသည့်ဘေးတွင် အဖွင့်ခလုတ် ပရိုတိန်းကို ကပ်လျက် ထားပေးလိုက်ခြင်းအားဖြင့် ဆဲလ်များ မိမိကိုယ်ကို ချေမှုန်းမည့် လုပ်ငန်းစဉ် ဖွင့်ပေးလိုက်ခြင်း ဖြစ်သည်။

ထိုနည်းလမ်းကို ဓာတ်ခွဲခန်းတွင် စမ်းသပ်ချက်များအရ ကင်ဆာဆဲလ်များကို ထိရောက်စွာ ချေမှုန်းနိုင်သည်ကို တွေ့ရသည်။

သိပ္ပံပညာရှင်တို့က ကြွက်များတွင်လည်း ဆက်လက် စမ်းသပ်ခဲ့ကြရာ သိသာဆိုးရွားသည့် ဘေးထွက်ဆိုးကျိုး ရှိသည်ကို မတွေ့ရချေ။

ယခုနည်းလမ်းမှာ ကောင်းသူထိပ် မကောင်းသူထိပ် ဗုံးချခြင်းထက် ပစ်မှတ်တိတိကျကျ သတ်မှတ်ကာ အထူးချေမှုန်းရေး တပ်ဖွဲ့တစ်ခု စေလွှတ်လိုက်ခြင်းမျိုးနှင့် အလားတူသည်။

ယခုနည်းလမ်းကို ပါမောက္ခ Gerald Crabtree က ကိုဗစ် ကပ်ဘေးကာလအတွင်း ကယ်လီဖိုးနီးယားပြည်နယ်၊ Palo Alto ၏ အနောက်ဘက် Kings Mountain မှ တောအုပ်များအတွင်း လမ်းလျှောက်နေစဉ် အကြံရခဲ့ခြင်း ဖြစ်သည်ဟု ဆိုသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: Scientists glue two proteins together, driving cancer cells to self-destruct