တရုတ်ပြည်တွင် အွန်လိုင်းဈေးဆိုင်တို့က ဓနသိဒ္ဓိပြီးသော မြေအိတ်များ ရောင်းချပေးနေရာ ဝယ်ယူသူ အလွန်များပြားနေမှု တရုတ်ပြည်တွင်း လူမှုကွန်ရက်သုံးစွဲသူတို့အကြား ကျော်ကြားပျံ့နှံ့

တရုတ်ပြည်တွင် “ဘဏ်မြေ” ဟု ခေါ်ကြသော မြေကြီးများကို အိတ်အတွင်း ထုတ်ပိုးကာ အွန်လိုင်းဈေးဆိုင် တို့က ရောင်းချပေးနေမှု နာမည်ကြီးနေသည်။

အွန်လိုင်းဈေးဆိုင်တို့က ပြောသည်မှာ ၎င်းတို့ ရောင်းချပေးသော မြေကြီးများမှာ တရုတ်ပြည်ရှိ အထင်ကရဘဏ်ကြီးများ၏ အပြင်ဘက်တွင် တူးဖော်ရယူထားသော မြေကြီးဖြစ်ကြောင်း၊ အဆိုပါမြေမှာ စည်းစိမ်ဥစ္စာပေါကြွယ်ဝစေအောင် ဆောင်ကြဉ်းပေးမည့် ဓနသိဒ္ဓိပြီးကြောင်း ပြောဆိုရောင်းချခြင်း ဖြစ်သည်။

ဘဏ်မြေတစ်အိတ်လျှင် ၈၈၈ ယွမ် (ကန်ဒေါ်လာ ၁၂၀) အထိ ဈေးနှုန်းမြင့်မားစွာ ရောင်းချနေခြင်း ဖြစ်သည်။

လူမှုကွန်ရက်တွင် နာမည်ကြီးနေသော သိဒ္ဒိဝင် ဘဏ်မြေကြီးကို ဘဏ်များရှေ့ သစ်ပင်ပန်းမန်များ စိုက်ပျိုးရာနေရာ၊ ဘဏ်အတွင်း ပန်းအိုးများမှမြေကြီးများကို ရယူထားခြင်းဖြစ်ပြီး ငွေရေစက်များမှ ရသည့် ဖုန်မှုန့်များပင် ပါဝင်သည်ဟု ဆိုသည်။

အွန်လိုင်းဈေးဆိုင်တစ်ခုဆိုလျှင် မြေအမျိုးအစား ၄ မျိုးအထိ ခွဲခြား ရောင်းချသည်။

၎င်းတို့ စုဆောင်းရယူထားသော မြေကြီးများမှာ တရုတ်ဗဟိုဘဏ်၊ စက်မှုနှင့် ကူးသန်းရောင်းဝယ်ရေးဘဏ်၊ စိုက်ပျိုးရေးဘဏ်၊ ဆောက်လုပ်ရေးဘဏ်နှင့် ဆက်သွယ်ရေးဘဏ်ဟူသော အထင်ကရဘဏ်ကြီး ၅ ခုမှဖြစ်သည်ဟု ဆိုသည်။

အဆိုပါ အွန်လိုင်းဈေးဆိုင်က ရောင်းချပေးသည့် မြေကြီးများအနက် ဈေးအနည်းဆုံးမှာ ၂၄ ယွမ် (၃ ဒေါ်လာ) ဖြစ်သည်။

“ဒီမြေကြီးတွေက ထိပ်တန်းဘဏ်ကြီး ၅ ခုကနေ ကိုယ်တိုင်သွားရောက် ရယူထားတဲ့ မြေကြီးတွေ ဖြစ်ပါတယ်။ သိပ္ပံနည်းကျ သက်သေမပြနိုင်ပေမယ့် ဒီမြေတွေဟာ ဥစ္စာဓန ပေါကြွယ်ဝစေပြီး မကောင်းတဲ့ အတိတ်နိမိတ် ကံကြမ္မာဆိုးတွေကို ဖယ်ရှားပေးနိုင်တယ်လို့ ယုံကြည်ထားကြပါတယ်” ဟု အဆိုပါအွန်လိုင်းဈေးဆိုင်၏ အရောင်းကိုယ်စားလှယ်တစ်ဦးက ပြောသည်။

(▲ ဘဏ်များ၏ အပြင်ဘက်ရှိ မြေကြီးများကို တူးဆွ ရယူခဲ့ပုံ ဗွီဒီယိုမှတ်တမ်းကို အွန်လိုင်းဈေးဆိုင်တို့က customer များထံ ပေးပို့ သက်သေပြလေ့ရှိသည်။ ဓာတ်ပုံ-Weibo)

“ဘဏ်တွေရှေ့က သစ်ပင်ပန်းမန် စိုက်ပျိုးထားတဲ့နေရာတွေက မြေကြီးတွေကို ညဘက်မှာ သွားယူထားတာ ဖြစ်ပါတယ်။ ဘဏ်တစ်ခုတည်းကနေ ယူတာ မဟုတ်ပါဘူး”

အခြား အွန်လိုင်းအရောင်းဆိုင်၏ ကြော်ငြာတွင် ဖော်ပြချက်အရ မြေကြီးကို မွန်းတည့် ၁၂ နာရီတိတိ အချိန်တွင်သာ ရယူထားခြင်းဖြစ်သည်ဟု ဆိုသည်။

တတိယ အရောင်းဆိုင်ကမူ ၎င်းတို့ရောင်းချပေးသော မြေကြီးမှာ ဓနသိဒ္ဓိအစွမ်းပြမှု ၉၉၉ ဒသမ ၉၉၉ ရာခိုင်နှုန်းရှိသည်ဟု ညွှန်းဆိုထားသည်။

အချို့အွန်လိုင်းအရောင်းဆိုင်တို့က ၎င်းတို့ရောင်းချသော မြေကြီးမှာ အစစ်ဖြစ်ကြောင်း သက်သေပြရန် အလို့ငှာ ဘဏ်ရှေ့မှ မြေကြီးကို တူးယူနေပုံ ဗွီဒီယိုမှတ်တမ်းများ လူမှုကွန်ရက်တွင် တင်ကြသည်။

တစ်ခုသော ဗွီဒီယိုဖိုင်တွင် တွေ့ရသည်မှာ ဘဏ်အဝင်ဝတွင် အမျိုးသားတစ်ဦးသည် မြေကြီးတစ်ပုံး ကိုင်ထားရင်း “ကွမ်တုံပြည်နယ်က သူဌေးလျူခင်ဗျာ….လူကြီးမင်းမှာယူထားတဲ့ မြေကြီး ဒီမှာ ရပါပြီ” ဟု ပြောဆိုနေပုံကို တွေ့ရသည်။

အခြားသော ဗွီဒီယိုဖိုင်တစ်ခုထဲတွင်လည်း အမျိုးသားတစ်ဦးက “ပေကျင်းမြို့က အစ်ကို ၀၈၆၃ ခင်ဗျာ…အခု ကျွန်တော် အစ်ကို့အတွက် ဘဏ်မြေကြီး တူးနေပါပြီ” ဟု ပြောဆိုနေသည်ကို တွေ့ရသည်။

ထို့နောက် ၎င်းက ဇွန်းတစ်ချောင်းဖြင့် မြေကြီးကို ကော်ယူကာ ရွှေရောင်ပန်းကန်ပြားငယ်တစ်ခုပေါ်သို့ တင်နေသည်ကို တွေ့ရသည်။

ရွှေရောင်ပန်းကန်ပြား များစွာတွင် စက္ကူစလစ်ပြားငယ်များ တွေ့ရပြီး ဓနသိဒ္ဓိဝင် မြေကြီးမှာယူသူတို့၏ အမည်နှင့် ဆက်သွယ်ရမည့် အချက်အလက်များ ရေးသားထားသည်။

Zejin Law Firm မှ ရှေ့နေတစ်ဦးဖြစ်သူ ဖူကျန်းက Red Star News သတင်းဌာနသို့ ပြောသည်မှာ မြေကြီးရောင်းချသူများအနေဖြင့် ဘဏ်မှရယူသောမြေကြီးဟုပြောပြီး အခြားနေရာမှ မြေကြီးများကို ရောင်းလျှင် လိမ်လည်မှုမြောက်ကြောင်း ပြောသည်။

ထိုသို့ဖြစ်ပွားပါက customer များအနေဖြင့် ငွေပြန်တောင်းခွင့်ရှိကြောင်းလည်း ဖူကျန်းက ပြောသည်။

(▲ တရုတ်ပြည်တွင် ရှေ့ဖြစ်ဟောခြင်းများမှာ အထူးနာမည်ကျော်သည်။ သို့သော် ဘဏ်ရှေ့မှ မြေကြီးများကို ဝယ်ယူနေမှုမှာ တမူထူးနေသည်။ ဓာတ်ပုံ-Shutterstock)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: China online shops sell ‘bank soil’ from top institutions for US$120, claims it brings wealth Photo Credit-Shutterstock,